Petero 2
TE FAAITE NEI PETERO E TUPU TE FEIA HAAVARE, E TO RATOU POHE A MURI ATU.
2 E peropheta haavare hoi to roto i te taata ati Iuda i mutaa iho, e e riro atoa i te orometua haavare to roto ia outou, o te faatupu omoe noa i te hairesi pohe ra, e te faarueraa i te Fatu tei hoo ia ratou ra, i te hopoiraa mai i te pohe oioi i nia ia ratou iho. 2 E e rave rahi te pee i ta ratou parau pohe; e no ratou e faainohia ˈi te eˈa parau mau ra. 3 E no te nounou taoˈa ra, e taoˈahia ta ratou ia outou i ta ratou parau haavare: aita râ ta ratou utua i faaitehia i tahito ra i faatautau, e to ratou pohe aore ïa i varea i te taoto.
4 Aore te Atua i faaherehere i te mau melahi i rave i te hara ra, tapea ˈtura râ ia ratou i te fifi ra o te pouri i te po ia vaiihohia e ia tae i te haavaraa; 5 e aore i faaherehere i to te ao nei i tahito ra, faaora ihora râ ia Noa i te taata i aˈo i te parau-tia ra, o te toovau ïa i te feia i faaorahia ra, a hopoi mai ai oia i te diluvi i teie nei ao paieti ore ra; 6 e faariro atura i na oire ra o Sodoma e Gomora ei rehu auahi, huri tumu atura ia ratou i te faahaparaa ˈtu, faariro atura ei hiˈoraa na te feia e mau i te paieti ore a muri atura; 7 e faaora ˈtura ia Lota parau-tia ra, o tei mauiui i te parau viivii a te feia parau iino ra: 8 (mauiui atura hoi te aau parau-tia o taua taata parau-tia ra i te parahiraa i roto ia ratou, i te hiˈoraa e te faarooraa ˈtu i tera mahana, i tera mahana, i ta ratou parau-tia ore.) 9 Ua ite maori te Fatu i te faaora i te feia paieti i roto i te ati ra, e te tapea i te feia parau-tia ore e ia tae i te mahana haavaraa, ia pohe:
10 E rahi atu râ i tei titau i ta te tino ra i te hinaaro faufau ra, e tei vahavaha i te feia i hau ra, e mǎtaˈu ore, e te mârô i to ratou iho hinaaro, aore ratou e mǎtaˈu ia faaino i te feia teitei. 11 Area te mau melahi o tei hau ê atu i te mana e te puai ra, e ore roa ïa e pari faaino ia ratou i mua i te aro i te Fatu ra. 12 Area teie nei feia, mai te mau puaa manaˈo ore, te au noa i ta te tino ra, i hamanihia no te haru e no te pohe, i te faainoraa i te mau mea itea ore ia ratou ra, e hope roa ïa i te pohe i to ratou iho ino; 13 i te noaaraa te utua o te parau-tia ore ra, i te feia i manaˈo e e mea maitai te hauti i te ao ra. E porao ïa, e ino ïa, te parahi ra ma te hauti i ta ratou haavare, amu noa ˈi ratou i te oroa e outou atoa ra; 14 ua î to ratou mata i te faaturi, e eita hoi e faaea i te rave i te hara, i te haafifiraa i te feia papu ore; e aau mataro to ratou i te nounou taoˈa; e tamarii faainohia ïa. 15 Ua faarue ratou i te eˈa mau, haere ê atura na te eˈa o Balaama a Bosora ra, o tei hinaaro i te utua o te parau-tia ore ra; 16 i aˈohia mai râ oia i ta ˈna ra hapa, na te asini parau ore i parau taata mai, e ua faaore i te haerea maamaa o taua peropheta ra. 17 E apoo pape ore ïa ratou, mai te ata i pee i te vero ra; no ratou te pouri taotao i vaiihohia ˈi e a tau noa ˈtu. 18 Ia parau hoi ratou i te parau rahi faufaa ore faaahaaha ra, te vare ra ia ratou, no te rahi o te taiata e te hinaaro o te tino ra, tei ora roa mai no roto i te feia i parahi i roto i te hapa ra. 19 Te parau faatiamâ ra ia ratou, e e tîtî hoi ratou iho na te ino; o ta te taata hoi e vi ra, ua tîtî ïa oia ia ˈna. 20 Ua ora hoi ratou i te viivii o teie nei ao i te ite i te Fatu ra i te ora ia Iesu Mesia, a fifi faahou ai e ua vi â ratou i te reira, e ino rahi tei to ratou hopea i tei mutaa ihora. 21 E huru maitai aˈe ratou ahiri eiaha roa ia ite i te parau-tia ra, eiaha ia ite ra a fariu ê atu ai i te parau moˈa i tuuhia ˈtu ia ratou ra. 22 Ua tupu iho nei râ ia ratou te maa parau mau ra e, Ua hoˈi te urî i to ˈna iho ruai, e te maiaa i mâ ra i to ˈna taaviriviriraa i te vari.