Apokalupo

TE FAATURI I BABULONIA, E TE PARAHIRAA I NIA I TE PUAA, E HITU AFII, AUAHURU HOI TARA RA.

17 Ua haere maira te hoê o taua na melahi toohitu i mau i na auˈa e hitu ra, ua paraparau maira ia ˈu, na ô maira, A haere mai na i ǒ nei; e faaite au ia oe i te utua a te vahine faaturi rahi, o tei parahi i nia iho i te pape e rave rahi; 2 o tei faaturihia e te hui arii o te ao nei; e o tei taero to te ao nei i te uaina ra o ta ˈna ra faaturi. 3 Ua aratai atura oia i tau varua i te medebara ra: ite atura vau i te hoê vahine i te parahiraa i nia iho i te hoê puaa uteute ra, ua ati roa i te iˈoa faaino, e hitu o ˈna omii, auahuru hoi tara. 4 Te ahu ra taua vahine ra i te ahu uraura e te uteute, e ua faaunaunahia i te auro, e te ofai maitatai ra, e te poe, e e auˈa auro tei tana rima ua î i te mea faufau, e te ino no ta ˈna ra faaturi: 5 e e iˈoa tei papaihia i nia iho i to ˈna rae, E mea aro, o Babulonia rahi, o te metua vahine o te mau faaturi, e no te mau mea faufau o te ao nei. 6 E ua ite au i taua vahine ra i te taeroraa i te toto o te feia moˈa ra, e te toto o te mau ite no Iesu i pohe ra: maere atura vau i taua iteraa no ˈu ia ˈna ra, e maere rahi to ˈu. 7 Ua parau maira taua melahi ra ia ˈu, Eaha oe i maere ai? na ˈu e faaite atu ia oe i te parau moe o teie nei vahine, e no te puaa e afai ia ˈna ra, no ˈna na omii e hitu nei e na tara auahuru nei. 8 Taua puaa ta oe i hiˈo ra e te vai na, e aita nei; e ua fatata i te aˈe aˈe i nia mai raro mai i te abuso ra, a reva ˈtu ai i te vahi pohe: e te feia e parahi i te ao nei, o tei ore i papaihia to ratou iˈoa i roto i te buka ora mai te matamua mai â o teie nei ao, e maere anaˈe ïa ia hiˈo ratou i taua puaa i vai na, e aita nei, e te vai noa nei â hoi. 9 Ei ǒ nei te aau paari. Na omii e hitu ra, e hitu ïa mouˈa e parahihia e taua vahine ra. 10 O na arii toohitu ra hoi ratou: ua pohe aˈenei e toopae, te vai nei te hoê, e aitâ te tahi i tae mai; e ia tae mai hoi oia ra, e parahiraa poto â to ˈna. 11 E taua puaa i vai na, e aita nei, o te toovau ïa, e no te toohitu ra oia, e e reva ˈtu â i te pohe. 12 E na tara auahuru ta oe i hiˈo ra, e arii ïa tino ahuru, aitâ i noaa ta ratou basileia: e noaa râ to ratou mana arii hoê â noaaraa e to te puaa ra. 13 E riro hoê â o ratou aau, e e horoa ratou i to ratou mana e te puai i te puaa ra. 14 E e tamaˈi mai ratou i te Arenio ra, e e pau ratou i te Arenio: o te Fatu hoi oia o te mau fatu atoa ra, e te Arii o te mau arii atoa ra: e to ˈna atoa ra paeau, e feia parauhia ïa, e te maitihia, e te haapao mau. 15 Ua parau maira oia ia ˈu, O te mau pape ta oe i hiˈo ra e parahihia e taua faaturi ra, e mau nunaa ïa, e mau pupu rarahi taata ïa, e mau fenua ïa, e mau reo ěê ïa. 16 E na tara hoê ahuru ta oe i hiˈo ra, e te puaa ra, e faufau ïa i taua faaturi ra, e e pau oia ia ratou i te haru, e e veve roa, e e amu i to ˈna tino, e e tutui ia ˈna i te auahi. 17 Ua tuu hoi te Atua i te manaˈo i roto i to ratou aau ia rave ratou i to ˈna hinaaro, e ia au ratou, e ia horoa i to ratou mana arii i te puaa ra, e ia hope te parau a te Atua i te tupu. 18 E te vahine ta oe i hiˈo ra, o taua oire rahi ra ïa, o tei hau i te mana i nia iho i te hui arii o te ao nei ra.