Te mau tavana
SAMASONA I TE HOPOIRAA I NA OPANI I GAZA RA.
16 Haere atura Samasona i Gaza, ite atura i te hoê vahine faaturi; e ua haere atura ia ˈna ra. 2 E faaitehia ˈtura to Gaza e, Teie mai nei Samasona. Ua haaati aˈera ratou ia ˈna, taotooto atura ia ˈna i taua rui ra, i pihaiiho i te uputa o te oire, aore i muhu i taua rui ra, na ô aˈera e, Ia poipoi, tei te aoraa ra, a rave ai tatou, a taparahi. 3 Taoto ihora Samasona e tui aˈera te po; ua tia aˈera oia i nia i taua tuiraa po ra, ua rave ihora i na opani o te oire, ma te pou atoa e piti, e te teˈa atoa; ua tuu aˈera i nia i te tapono, haere atura, hopoi roa ˈtura i nia i te mouˈa i pihaiiho i te oire ra o Heberona.
4 E i muri aˈe i te reira, ua hinaaro aˈera oia i te hoê vahine i Nahala-soreka, o Delila to ˈna iˈoa. 5 Ua haere maira te hui tavana o te Philiseti ia ˈna ra, e ua na ô maira ia ˈna, E taparu aˈe na oe ia ˈna ia itea to ˈna puai rahi i te vairaa, e te ravea e noaa ˈi oia ia matou ia ruuruu atu, ia vi oia: e na matou e horoa ˈtu i na sekela ario na oe, e tataihoê tausani e hoê hoi hanere ta te taata hoê. 6 Ua parau atura Delila ia Samasona, E faaite mai na oe, i to oe ra puai rahi i te vairaa, e te mea e mau ai oe ia ruuruu, e pohe ai oe ra? 7 Ua parau maira Samasona ia ˈna, Ia ruuruu ratou ia ˈu i na ieie ota e hitu aore â i mǎrô ra, e riro vau mai te taata atoa ra i te paruparu i reira. 8 Ua hopoi maira taua mau tavana o te Philiseti ra i te ieie ota e hitu aore â i mǎrô ra, ua ruuruu ihora oia ia ˈna i te reira. 9 Te tiai noa ra te taata tei roto i te piha o taua vahine ra, ua parau atura oia, E Samasona, teie iho te Philiseti e rave ia oe na. Motu noa ihora taua ieie ra ia ˈna mai te huˈa iti lino e motu ia tiaia i te auahi ra. Aita ˈtura to ˈna puai i itea. 10 Ua parau atura Delila ia Samasona, Inaha, ua vare au ia oe, e parau haavare ta oe i parau mai ia ˈu; e tena na, e faaite mai na oe ia ˈu i te mea e mau ai oe ra. 11 Ua parau maira oia ia ˈna, Ia ruuruu ratou ia ˈu i te taura apî aore â i ravehia ra, e riro vau mai te taata atoa ra i te paruparu i reira. 12 Ua rave ihora Delila i te taura apî, e ua ruuruu ihora ia ˈna i te reira, te tiai noa ra te taata i roto i te piha, ua parau atura oia, E Samasona teie iho te Philiseti e rave ia oe na, Motu noa ihora taua na taura i nia i na rima no ˈna mai te aho au ahu ra. 13 Ua parau atura Delila ia Samasona, Te vare noa nei â vau ia oe, e parau haavare ta oe i parau mai ia ˈu nei, e faaite mai oe ia ˈu i te mea e mau ai oe ra. Ua parau maira oia ia ˈna, Ia raraa atoa oe i na io rouru e hitu o tau upoo nei i roto i tena na ahu. 14 Ua taai ihora oia i nia i taua tǐtǐ ra, e ua parau atura ia ˈna, E Samasona teie iho te Philiseti e rave ia oe na. Ua ara aˈera oia i taua taoto no ˈna ra, haere noa ˈtura ma te tǐtǐ o te raraaraa e te ahu atoa ra.
15 Ua parau atura oia ia ˈna, Eaha oe i parau mai ai e e hinaaro to ˈu ia oe, e aore hoi to aau i riro mai ia ˈu nei? a toru aˈenei a oe haavareraa mai ia ˈu, e aita oe i faaite mai ia ˈu i te vairaa o to oe na puai rahi. 16 E no te mea ua onoono maite atura taua vahine ra ia ˈna, aita e mahana tuua, i te mârôraa ˈtu ia ˈna, e pohe roa aˈera tana aau i te peapea; 17 ua faaite hua maira oia i ta ˈna parau, na ô maira ia ˈna, Aore roa e reta i tae mai i nia i tau upoo, e Nazira hoi au na te Atua, mai te opu mai â o tau metua vahine: ahiri vau i hahuhia ra, e ore taua puai no ˈu nei i reira, e riro vau mai te taata atoa nei i te paruparu i reira. 18 Ite aˈera Delila e, ua faaite hua mai oia i ta ˈna parau ia ˈna, ua tono oia i te vea e tii i te mau tavana o te Philiseti, na ô atura, E haere mai outou hoê haerea toe, ua faaite hua mai hoi oia ia ˈu i ta ˈna parau. Ua haere maira te mau tavana o te Philiseti ia ˈna ra ma te moni atoa i to ratou rima i te hopoiraa mai. 19 Ua faataoto ihora oia ia ˈna i nia i to ˈna turi; e ua parau atura oia i te hoê taata e ua faaue atura ia ˈna e hahu i na io rouru e hitu i tana upoo ra; e ua haavivi atura oia ia ˈna, ua reva ˈtura hoi taua puai no ˈna ra. 20 Ua parau atura oia, E Samasona teie iho te Philiseti e rave ia oe na. Ua ara aˈera oia i taua taoto no ˈna ra, e ua na ô aˈera, E haere â vau i rapae e faaitoito ia ˈu iho mai tei mutaaihora; aore â hoi oia i ite e, ua faarue Iehova ia ˈna. 21 Ua rave ihora te Philiseti ia ˈna, e ua haapo atura i to ˈna mata, aratai atura ia ˈna i raro i Gaza ra, e ua tapea ihora ia ˈna i te tapea veo; e ua taviri ihora oia i te sitona i roto i te fare tapearaa ra.
22 E ua tupu faahou aˈera te rouru o tana upoo i vauhia ra. 23 Ua haaputuputu ihora te mau tavana o te Philiseti e hopoi i te hoê tusia rahi na to ratou atua na Dagona, e ei oaoaraa hoi no ratou, te parau ra hoi ratou e, Ua tuu mai to tatou atua i to tatou enemi ia Samasona i to tatou nei rima. 24 E ia hiˈo mai te mau taata ia ˈna ra, ua haamaitai atura i to ratou atua, ua na ô aˈera hoi ratou, Ua tuu mai to tatou atua i to tatou enemi i to tatou nei rima, o tei taparahi mai i to tatou e rave rahi aˈenei, e i pau ai hoi to tatou nei fenua. 25 E rearea aˈera to ratou aau, ua na ô aˈera, E tii ia Samasona ei faaarearea ia tatou. Ua tii atura ratou ia Samasona i roto i te fare tapearaa ra; e ua vaiiho ihora ratou ia ˈna i te area i ropu i na pou o taua fare ra; rearea aˈera ratou ia ˈna. 26 Ua na ô aˈera Samasona i te tamaiti i mau i tana rima ra, E faaite mai na oe ia ˈu i na pou i mau ai teie nei fare ia fafa na vau, e ia tiaturi noa na vau i reira. 27 Ua î roa taua fare ra i te taata, i te tane e te vahine; e tei reira te mau tavana atoa o te Philiseti; e toru hoi tausani o te taata i te parahiraa i nia ra, te tane e te vahine, te mataitai maira ia Samasona i te faanavenaveraa ia ratou. 28 Ua tiaoro atura Samasona ia Iehova, na ô atura, E tau Fatu, e Iehova, e haamanaˈo mai oe ia ˈu, o ta ˈu ïa pure ia oe i teie nei, e faaetaeta mai oe ia ˈu nei, hoê roa ra faaetaetaraa toe o teie anaˈe nei, e tau Atua e, ia tahoo na vau i te Philiseti nei i to ˈu nei pue mata. 29 Ua rave ihora Samasona i na pou e piti i ropu i mau ai taua fare ra, e o te mau ïa i etaeta ˈi taua fare ra, hoê pou i te rima atau, hoê hoi i te rima aui. 30 E ua na ô aˈera Samasona, Ia pohe noa ˈtu vau i te poheraa o te Philiseti nei. Ua piˈo ihora oia i raro, ua faahope aˈera i te puai; mairi ihora taua fare ra i raro i nia i te mau tavana e te mau taata atoa i roto ra. E rahi atura te feia i pohe ia ˈna i taua poheraa no ˈna ra, i tei taparahihia e ana i te oraraa ra. 31 Ua haere maira tana mau taeae, e te utuafare atoa o to ˈna ra metua i raro, ua rave ihora ia ˈna ua hopoi i nia, e ua tanu ihora ia ˈna i te area i Zora e Esetaola, i te tanuraa o to ˈna ra metua tane o Manoa. A hoê taau aˈera o ˈna matahiti i te faatiaraa ia Iseraela.