Te mau tavana

TE HIMENE A DEBORA RAUA O BARAKA I TE ORARAA O ISERAELA.

5 Ua himene ihora Debora e o Baraka a Abinoama i taua mahana ra, na ô aˈera, 2 E haamaitai ia Iehova, o Iseraela i tahoohia ra, e te mau taata hoi i te mea ua horoa noa ia ratou ihora.

3 Ia ite mai outou, e te hui arii e, e faarooroo mai outou, e te hui tavana e! e himene na vau, o vau nei â ia Iehova; e himene au i te Atua no Iseraela ia Iehova.

4 Ia oe mai Seira mai, e Iehova e, ia oe i haere mai mai te fenua maira mai Edoma, ua aueue te fenua, ua tarapape te raˈi, ua tarapape te mau ata, ua riro ei pape! 5 Ua tahe te mouˈa i te aro o Iehova; o Sinai iho â i te aro o te Atua o Iseraela ra o Iehova. 6 I te anotau ia Samagara a Anata ra, i te anotau ia Iaela, aore te mau eˈatia rarahi ra i haerehia; ua na te eˈa rii moe ra te ratere i te haere: 7 ua ano te mau oire rii i Iseraela nei; ua ano, e ia itea maira vau o Debora ra, ia itea maira vau ei metua i Iseraela nei.

8 Ua rave ratou i te atua apî, ua tae roa te tamaˈi i roto i to ratou mau oire i reira! te itea ra anei te paruru e te mahae, e hoê iti aˈe, i roto ia Iseraela e maha atoa ahururaa o te tausani i reira? 9 Te au nei tau aau i te mau aratai ia Iseraela nei, o tei amui noa mai i roto i te mau taata nei; e haamaitai outou ia Iehova.

10 O te feia i parahi i nia iho i te mau asini teatea ra, o tei parahi i te faaauraa parau ra, e te feia i haere noa na te eˈatia ra, e parau na outou. 11 No te umere o te mau teˈa ra, i te area i te mau vahi hutiraa pape ra; ua parau ratou i te parau-tia a Iehova i reira, i ta ˈna ra ravea tia i te oire rii i Iseraela ra: ua haere to Iehova ra taata i te mau uputa o te oire i reira.

12 E ara, e ara, e Debora, e ara, e ara e himene i te himene. A tia, e Baraka a Abinoama, a aratai i te feia i tîtî ai oe ra ei tîtî.

13 Ua haamana maira oia i te toea i nia i te hui tavana ra o te taata; o Iehova tei haamana mai ia ˈu nei i nia i te feia puai ra.

14 No roto ia Epheraima te tumu no ratou i te aroraa ˈtu ia Amaleka: e i muri aˈe ia oe, o Beniamina ïa, i roto i to oe ra mau taata ra: e feia aratai tei haere mai no ǒ ia Makira ra, e no ǒ ia Zebuluna te feia papai parau ra. 15 Tei ia Debora te hui mana i ǒ Isakara ra; o Isakara e o Baraka atoa, i tonohia na raro i te vahi papu ra. E feruri rahi tei te vahi i ǒ Reubena ra! 16 Eaha oe i parahi noa ˈi i roto i to oe ra aua mamoe faaroo noa ˈi i te umee o te mau mamoe ra? e feruri rahi tei te vahi i ǒ Reubena ra.

17 E o Gileada atoa, parahi noa ˈtura i te tahi pae Ioridana ra, e eaha Dana i noho noa ˈi i te mau pahi? Tia ˈtura Asera i tahatai, e parahi ihora i roto i te mau ooa no ˈna ra.

18 O Zebuluna raua o Naphatali, o na taata ïa i faaruru i te pohe, i te toˈa roto mau i te aroraa ra.

19 Ua maraa maira te hui arii, ua aro maira; ua aro mai te hui arii o Kanaana i Tanaka, i te pae o te pape ra o Megido: e aore roa te hoê maa ario iti i riro ia ratou. 20 I na te raˈi mai te mau fetia i te aro, ua aro ïa ia Sisera i to ratou haerea. 21 Na te pape ra na Kisona ratou i rave e pau atura i taua pape tahito ra, te pape ra o Kisona. E tau varua e, e feia mana tei pau ia oe ra.

22 Ua fatifati te maiuu o te mau puaahorofenua i reira, i te horo pupara noa o te feia puai no ˈna ra. 23 E katara outou ia Meroza, te parau maira te melahi a Iehova, e katara hua outou i to reira, no te mea aore ratou i haere mai e tauturu ia Iehova, e tauturu ia Iehova, i taua feia puai ra.

24 Ia ora roa te vahine ra o Iaela, i te mau vahine ra; te vahine a Hebera ati Keni ra, e hau oia i te maitai i te mau vahine o te tiahapa ra. 25 Ua ani oia i te pape, e ua horoa ˈtu oia i te û; ua hopoi atu oia i te bata i roto i te farii maitai ra. 26 Ua haru tana rima aui i te tǐtǐ, e ua rave tana rima atau i te hamara teiaha: ua tiapai oia ia Sisera, o te upoo ta ˈna i tiapai; ua patǐtǐ pǔpû roa oia i to ˈna rahirahia. 27 Ua piˈo ihora oia, ua mairi hoi, e ua tiraha roa i raro i tana pae avae; ua mairi oia i tana pae avae, ua tiraha ïa oia; i te vahi i mairi ai oia ra, o te vai pohe-roa-raa ra ïa.

28 Ua hiˈo te metua vahine o Sisera na roto i te haamaramarama, ua na roto oia i te uputa i te faaao, ma te pii e, Eaha ra te maoro o ta ˈna pereoo i te haerea mai e? eaha ra ta ˈna pereoo i roroa ˈi e? 29 Ua na ô aˈera te mau hoa vahine paari no ˈna ra, ua parau atoa hoi oia iho i teie nei parau ia ˈna. 30 E ere anei ua manuïa ratou, e ua opere ratou i te taoˈa? te tataihoê ra e te taipiti hoi i te vahine i te taata hoê? ta Sisera ra, e tufaa taoˈa purepure ïa, e tufaa i ohipahia i te au, rave rahi te huru ra, e tufaa unauna no nia i te aˈî o tei pau, i ohipahia i te au, e piti atoa paeau ra?

31 Ia na reira atoa te mau enemi atoa no oe i te pohe, e Iehova e: area te feia i hinaaro ia ˈna ra, ia riro ïa ratou, mai te mahana ia hiti mai to ˈna anaana rahi ra! E muri aˈera, parahi noa ihora taua fenua ra ma te hau, e a maha aˈera ahururaa o te matahiti ra.