27 Haere maira te hoê taata o te Atua ia Eli ra e na ô maira: “Teie ta Iehova e parau ra: ‘Aita anei au i faaite roa ˈtu ia ˈu i te utuafare o to oe tupuna, a ora ˈi ratou i Aiphiti ei tîtî no te utuafare o Pharao?+ 28 E ua maitihia to oe tupuna i rotopu i te mau opu atoa o Iseraela+ no te tavini ei tahuˈa na ˈu e no te haere i nia i ta ˈu fata+ no te pûpû i te tusia, no te pûpû i te mea noˈanoˈa,* e no te oomo i te hoê tiputa i mua ia ˈu. No reira vau i farii ai ia rave oia e to ˈna huaai i te tahi tuhaa o te iˈo ta te ati Iseraela* e hopoi mai no te pûpû ei tusia taauahi ia ˈu.+