Te mau tavana

6 Rave faahou aˈera râ te ati Iseraela i te mea ino i te aro o Iehova.+ Tuu atura ïa Iehova ia ratou i te rima o te ati Midiana e hitu matahiti.+ 2 Haavî ihora te ati Midiana ia Iseraela.+ No te ati Midiana, hamani aˈera te ati Iseraela i te tahi mau vahi tapuniraa* no ratou i nia i te mouˈa, i roto i te mau ana, e i te mau vahi mea fifi ia haere atu.+ 3 Ia ueue te ati Iseraela i te huero maa, e aro te ati Midiana, te ati Amaleka+ e to hitia o te râ+ ia ratou. 4 E patia ratou i te puhapa no te aro ia ratou e e tuino ratou i te maa o te fenua tae roa i Gaza. Eita ratou e vaiiho i te tahi maa na te ati Iseraela, aita hoê aˈe mamoe, puaatoro aore ra asini.+ 5 E pauma mai hoi ratou e ta ratou mau animara e to ratou mau fare ie mai te vivi ra te rahi.+ Eita e nehenehe e taio ia ratou e ta ratou mau kamela.+ E tomo ratou i te fenua no te haamou i to reira. 6 Veve roa aˈera ïa te ati Iseraela i te ati Midiana, e tiaoro aˈera ratou ia Iehova ia tauturu mai.+

7 I te tiaororaa te ati Iseraela ia Iehova ia tauturu mai no te ati Midiana,+ 8 tono atura Iehova ia ratou ra i te hoê peropheta tei parau atu: “Teie ta Iehova te Atua o Iseraela i parau: ‘Ua aratai mai au ia outou mai Aiphiti mai, ua aratai mai ïa vau ia outou i rapae i te fenua* o te faatîtîraa.+ 9 Ua faaora ïa vau ia outou i te rima o Aiphiti e te feia atoa tei haavî ia outou. Ua tiahi au ia ratou mai mua ia outou e ua horoa vau i to ratou fenua no outou.+ 10 Parau atura vau ia outou: “O vau o Iehova to outou Atua.+ Eiaha roa outou e mǎtaˈu i te mau atua o te ati Amori no ratou te fenua ta outou e faaea nei.”+ Aita râ outou i faaroo ia ˈu.’”*+

11 I muri iho, haere maira ta Iehova melahi+ e parahi ihora i raro aˈe i te tumu raau rahi a Ioasa ati Abi-ezera i Ophera.+ Te tairiiri ra ta ˈna tamaiti o Gideona+ i te sitona i roto i te apoo taataahiraa vine ia ore te ati Midiana ia ite mai. 12 Fa maira ta Iehova melahi ia ˈna e na ô maira: “Tei ia oe ra Iehova,+ oe te aito puai.” 13 Na ô atura Gideona ia ˈna: “Eiaha na oe e inoino mai, to ˈu fatu, ahani tei ia matou ra Iehova, eaha ïa matou e roohia ˈi i teie mau mea atoa?+ Teihea ta ˈna mau ohipa faahiahia atoa ta to matou mau metua i faatia ia matou,+ a na ô ai: ‘Aita anei Iehova i aratai mai ia tatou i rapae i Aiphiti?’+ I teie nei, ua faarue Iehova ia matou+ e ua tuu oia ia matou i te rima o te ati Midiana.” 14 Fariu maira Iehova* ia ˈna e na ô maira: “A haere ma tera puai to oe, e e faaora oe ia Iseraela i te rima o te ati Midiana.+ E ere anei o vau te tono nei ia oe?” 15 Pahono atura Gideona ia ˈna: “Eiaha na e inoino mai, Iehova. E nafea vau e nehenehe ai e faaora ia Iseraela? Inaha, to ˈu te opu* haihai roa ˈˈe i rotopu ia Manase, e o vau te taata haihai roa ˈˈe i roto i te utuafare o to ˈu metua tane.” 16 Na ô maira râ Iehova ia ˈna: “No te mea ei ia oe ra vau,+ e tairi oe i te ati Midiana mai te mea ra hoê noa taata ratou.”

17 Parau atura oia ia ˈna: “I teie nei, mai te peu ua fariihia vau i to aro, a faaite mai i te tahi tapao e o oe iho â te paraparau nei ia ˈu. 18 Eiaha oe e reva e ia hoˈi roa mai au e ta ˈu ô e ia tuu vau i te reira i mua ia oe.”+ Na ô maira ïa oia: “E faaea vau i ǒ nei e ia hoˈi roa mai oe.” 19 Haere ihora Gideona, faaineine ihora i te tahi fanauˈa puaaniho e hamani ihora i te faraoa hopue ore hoê epha* faraoa ota.+ Tuu atura oia i te iˈo i roto i te farii e te pape iˈo puaaniho i roto i te pani. Hopoi atura oia i te reira i rapae ia ˈna ra, e tuu atura i mua ia ˈna i raro aˈe i te tumu raau rahi.

20 Na ô maira te melahi a te Atua mau ia ˈna: “A rave i te iˈo e te faraoa hopue ore, a tuu atu i nia iho i te ofai rahi i ǒ, e a manii atu i te pape iˈo puaaniho.” Na reira ˈtura oia. 21 Toro atura ta Iehova melahi i te raau i roto i to ˈna rima e tuu atura i te hopearaa o te raau i nia iho i te iˈo e te faraoa hopue ore, e ura ihora te auahi no roto i te ofai e pau aˈera te iˈo e te faraoa hopue ore.+ Moˈe atura ta Iehova melahi mai mua i to ˈna mata. 22 Taa ihora ia Gideona e o ta Iehova melahi+ tera.

I reira iho, na ô atura Gideona: “Auê hoi e te Arii hau ê e Fatu ra e Iehova, ua ite hoi au e aro e aro i ta Iehova melahi!”+ 23 Na ô maira râ Iehova ia ˈna: “Ei ia oe ra te hau. Eiaha e mǎtaˈu,+ eita oe e pohe.” 24 Hamani ihora ïa Gideona i te tahi fata i reira na Iehova, e parauhia ˈtura te reira Iehova-saloma*+ tae roa mai i teie mahana. Tei Ophera o te ati Abi-ezera noa â te reira.

25 Na ô maira Iehova ia ˈna i taua po ra: “A rave i te puaatoro oni apî a to oe metua tane, te piti o te puaatoro oni apî e hitu matahiti, a vavahi i te fata a Baala a to oe metua tane, e a tâpû i te raau haamoriraa* i pihai iho.+ 26 A apǎpǎ i te ofai e a hamani i te fata na Iehova to Atua i nia iho i tera pare. A rave i te piti o te puaatoro oni apî e a pûpû i te reira ei tusia taauahi i nia iho i te mau tâpû raau o te raau haamoriraa* ta oe e tâpû.” 27 Rave maira ïa Gideona hoê ahuru tane no rotopu i ta ˈna mau tavini e na reira ihora mai ta Iehova i parau ia ˈna. Ua mǎtaˈu roa râ oia i te utuafare o to ˈna metua tane e to te oire no te rave i te reira i te ao. Ua na reira ïa oia i te po.

28 Ananahi aˈe, i te tiaraa to te oire i te poipoi roa, ite aˈera ratou e ua vavahihia te fata a Baala, ua tâpûhia te raau haamoriraa i pihai iho e ua pûpûhia te piti o te puaatoro oni apî i nia iho i te fata tei hamanihia. 29 Ui aˈera ratou te tahi i te tahi: “Na vai i rave i teie ohipa?” I muri iho i to ratou titorotororaa, na ô aˈera ratou: “Na Gideona te tamaiti a Ioasa i rave i teie ohipa.” 30 Na ô aˈera ïa to te oire ia Ioasa: “A hopoi mai i ta oe tamaiti ia pohe oia, no te mea ua vavahi oia i te fata a Baala e ua tâpû i te raau haamoriraa i pihai iho.” 31 Parau atura Ioasa+ i te feia atoa tei mârô ia ˈna: “Na outou anei e paturu ia Baala? Na outou anei e faaora ia ˈna? Ia haapohehia te taata e paturu ia ˈna i teie poipoi.+ E atua o ˈna ra, na ˈna ïa e paturu ia ˈna iho,+ inaha ua vavahi te tahi taata i ta ˈna fata.” 32 Topa ˈtura oia ia Gideona i taua mahana ra i te iˈoa ra o Ierubaala,* a na ô ai: “Na Baala e paturu ia ˈna iho, inaha ua vavahi te tahi taata i ta ˈna fata.”

33 Amui aˈera te ati Midiana,+ te ati Amaleka+ e to hitia o te râ taatoa i ta ratou mau nuu,+ haere atura i te tahi atu pae o te anavai e tae atura i te peho o Iezereela e puhapa ihora i reira. 34 Ohipa maira to Iehova varua i nia* ia Gideona+ e faaoto ihora oia i te pu tara,+ e haere maira te ati Abi-ezera+ e turu ia ˈna. 35 Tono atura oia i te vea i to te opu atoa o Manase, e haere atoa maira ratou e turu ia ˈna. Tono atoa ˈtura oia i te vea i to te opu o Asera, to Zebuluna e to Naphatali, e pauma aˈera ratou e farerei ia ˈna.

36 Parau atura Gideona i te Atua mau: “Mai te peu te faaora nei oe ia Iseraela na roto ia ˈu, mai ta oe i fafau,+ 37 teie au e vauvau nei i te tahi iri huruhuru mamoe i nia i te vahi tairiiriraa huero maa.* Ia rari te iri huruhuru mamoe i te hupe, mea mǎrô râ te repo ati aˈe, e taa ïa ia ˈu e faaora oe ia Iseraela na roto ia ˈu, mai ta oe i fafau.” 38 E tera iho â tei tupu. Ananahi aˈe, i to ˈna tiaraa mai i te poipoi roa e to ˈna taviriraa i te iri huruhuru mamoe, ua î roa hoê auˈa rahi i te pape o te hupe no roto mai i tera iri huruhuru mamoe ta ˈna i taviri. 39 Tera râ, na ô atura Gideona i te Atua mau: “Eiaha na to oe riri e ura i nia ia ˈu. E ani faahou râ vau i te tahi mea. E rave au i te iri huruhuru mamoe no te tahi â tamataraa. Ia mǎrô noa te iri huruhuru mamoe, e ei hupe to nia iho i te repo ati aˈe.” 40 Na reira ˈtura ïa te Atua i taua po ra. Te iri huruhuru mamoe noa te mea mǎrô, e e hupe to nia iho i te repo ati aˈe.