Levitiko

26 “‘Eiaha outou e hamani i te mau atua faufaa ore no outou,+ e eiaha outou e faatia i te mau tii taraihia+ aore ra te hoê pou haamoriraa no outou, e eiaha outou e tuu i te hoê tii ofai+ i to outou fenua no te tipapa i mua i te reira,+ o vau hoi o Iehova to outou Atua. 2 E haapao outou i ta ˈu mau Sabati e e faatura* outou i to ˈu nao.* O vau o Iehova.

3 “‘Ia tamau outou i te pee i ta ˈu mau faatureraa e i te auraro i ta ˈu mau faaueraa e ia haapao outou i te reira,+ 4 e horoa ˈtu vau i te ûa i te taime au,+ e faatupu mai te fenua i te maa+ e e horoa mai te mau tumu raau i to ratou maa hotu. 5 E taataahi outou i ta outou huero maa tae roa i te ootiraa vine, e ooti outou i te vine tae roa i te tau ueueraa i te huero maa, e tamaa maitai outou e e parahi ma te taiâ ore i to outou fenua.+ 6 E tuu vau i te hau i to outou fenua,+ e e taoto outou ma te ore e haamǎtaˈuhia.+ E faaatea ê au i te mau animara oviri taehae i to outou fenua, e e ore te ˈoˈe tamaˈi e na roto atu i to outou fenua. 7 E aˈuaˈu mau â outou i to outou mau enemi, e e pohe ratou ia outou i te ˈoˈe. 8 E aˈuaˈu e pae o outou 100, e e aˈuaˈu 100 o outou 10 000, e e pohe to outou mau enemi ia outou i te ˈoˈe.+

9 “‘E faatae au i ta ˈu haamaitairaa i nia* ia outou, e faarahi au i ta outou mau tamarii, e horoa ˈtu vau e rave rahi huaai+ e e haapao vau i ta ˈu faufaa ia outou.+ 10 A amu noa ˈi outou i te maa o te matahiti na mua ˈtu, e faarue outou i taua maa ra ia vata te fare haapueraa maa no te maa apî. 11 E tuu vau i to ˈu sekene i rotopu ia outou,+ e e ore au e faarue ia outou. 12 E haere au na rotopu ia outou e e riro vau ei Atua no outou,+ e o outou, e riro ïa ei nunaa no ˈu.+ 13 O vau o Iehova to outou Atua, tei aratai ia outou i rapae i te fenua o Aiphiti ia ore outou e faatîtî-faahou-hia e ratou, e ua ofati au i te auri o ta outou zugo e ua faahaere au ia outou ma te faateitei i to outou upoo.*

14 “‘Teie râ, ia ore outou e faaroo mai ia ˈu aore ra e auraro i teie mau faaueraa atoa,+ 15 ia patoi outou i ta ˈu mau faatureraa,+ e ia vahavaha outou i ta ˈu mau faaotiraa haavaraa, a ore atu ai outou e auraro i ta ˈu mau faaueraa atoa, e a ofati atu ai i ta ˈu faufaa,+ 16 o vau nei, teie ïa ta ˈu e rave ia outou: E faautua vau ia outou i te ati, te tutoo e te fiva rahi, a pohepohe atu ai to outou mata e a paruparu roa ˈtu ai outou. E ueue faufaa ore noa outou i ta outou huero maa, na to outou hoi mau enemi e amu i te reira.+ 17 E hiˈo vau ia outou ma te riri, e e pau outou i to outou mau enemi,+ e te feia mea hae na ratou ia outou, e taataahi ïa ia outou,+ e e horo ê outou noa ˈtu e aita outou e aˈuaˈuhia ra.+

18 “‘Ia ore â outou e faaroo mai ia ˈu noa ˈtu teie mau parau, e faautua vau ia outou e hitu atu â taime no ta outou mau hara. 19 E ofati au i to outou teoteo etaeta e e faariro vau i to outou raˈi mai te auri+ e to outou fenua mai te veo. 20 E pau faufaa ore noa to outou puai, e ore hoi to outou fenua e faatupu mai i te maa,+ e e ore te mau tumu raau o te fenua e horoa mai i te maa hotu.

21 “‘Ia tamau râ outou i te patoi mai ia ˈu e i te ore e faaroo mai, e tairi ïa vau ia outou e hitu atu â taime ia au i ta outou mau hara. 22 E faatae au i te mau animara oviri i rotopu ia outou,+ e faaere ratou ia outou i ta outou mau tamarii+ e e pau ia ratou ta outou mau animara rata e e iti mai outou, e aita e taata e itehia na nia i to outou mau purumu.+

23 “‘Ia ore â outou e farii i ta ˈu aˈoraa+ noa ˈtu teie mau parau, a onoono ai outou i te patoi mai ia ˈu, 24 e patoi atoa ïa vau ia outou, e na ˈu e tairi ia outou e hitu taime no ta outou mau hara. 25 E hopoi atu vau i te ˈoˈe tahoo i nia ia outou no te ofatiraa i te faufaa.+ Ia haapu outou i roto i to outou mau oire, e faatae au i te maˈi i rotopu ia outou,+ e e tuuhia outou i te rima o te enemi.+ 26 Ia faaore au i ta outou pueraa* pane,*+ ahuru vahine te nehenehe e eu i ta outou pane i roto hoê noa umu, a opere atu ai i ta outou pane ma te faito,+ e e tamaa outou, eita râ e paia.+

27 “‘Ia ore â outou e faaroo mai ia ˈu noa ˈtu teie mau parau, a onoono ai outou i te patoi mai ia ˈu, 28 e rahi atu â vau i te patoiraa ia outou+ e e faautua vau ia outou e hitu taime no ta outou mau hara. 29 E amu outou i te iˈo o ta outou mau tamaiti, e e amu outou i te iˈo o ta outou mau tamahine.+ 30 E faaore au i ta outou mau vahi teitei,+ e huri au i raro i ta outou mau fata mea noˈanoˈa, e apǎpǎ vau i to outou mau tino pohe na nia iho i ta outou mau idolo faufau* ora ore,+ e e fariu ê au ia outou ma te haafaufau.+ 31 E tuu atu vau i to outou mau oire i te ˈoˈe,+ e vavahi au i ta outou mau nao, e eita vau e au i te hauˈa noˈanoˈa au maitai* o ta outou mau tusia. 32 Na ˈu e faaano i to outou fenua,+ e e araara te mata o to outou mau enemi e parahi ra i ǒ outou i te hiˈoraa i te reira.+ 33 E haapurara vau ia outou na rotopu i te mau nunaa,+ e turai au i to outou mau enemi ia aro ia outou i te ˈoˈe,+ e ano to outou fenua+ e e mou to outou mau oire.

34 “‘I taua roaraa ra e vai ano ai to outou fenua, a ora ˈi outou i te fenua o to outou mau enemi, e haapao te fenua i te mau Sabati ta ˈna i ore i haapao na. I reira te fenua e faafaaea ˈi,* e haapao hoi te reira i te mau Sabati ta ˈna i ore i haapao na.+ 35 Pauroa te mahana e vai ano ai te fenua, e faafaaea te reira, no te mea aita te fenua i faafaaea i te roaraa o ta outou mau Sabati i parahi ai outou i reira.

36 “‘E te feia e ora ˈtu,+ e faaî au i to ratou aau i te hepohepo i te mau fenua o to ratou mau enemi. I te ahehe noa o te hoê rauere puhihia e te mataˈi, e horo ê ratou, e e horo ratou mai te hoê taata e horo ê ra i te ˈoˈe, a marua ˈtu ai noa ˈtu e aita ratou e aˈuaˈuhia ra.+ 37 E marua ratou te tahi na nia iho i te tahi mai te feia e horo ê ra i te ˈoˈe, noa ˈtu e aita ratou e aˈuaˈuhia ra. Eita e haere ia outou ia faaruru i to outou mau enemi.+ 38 E mou outou i rotopu i te mau nunaa,+ e e pau outou i te fenua o to outou mau enemi. 39 Tei toe mai i rotopu ia outou, e vaiihohia ïa ia ino ratou i te mau fenua o to outou mau enemi+ no ta outou hape. E ino mau â ratou no te mau hape a to ratou mau tupuna.+ 40 I reira ratou e faˈi ai i ta ratou iho hape+ e te hape a to ratou mau tupuna e to ratou taivaraa, e e farii ratou e ua taiva ratou i te patoiraa mai ia ˈu.+ 41 E patoi atoa ïa vau ia ratou+ ma te hopoi ia ratou i te fenua o to ratou mau enemi.+

“‘Peneiaˈe i reira to ratou aau peritome-ore-hia* e haehaa ˈi,+ e e amo ratou i te utua no ta ratou hape. 42 E haamanaˈo vau i ta ˈu faufaa ia Iakoba,+ e ta ˈu faufaa ia Isaaka,+ e haamanaˈo vau i ta ˈu faufaa ia Aberahama+ e e haamanaˈo vau i te fenua. 43 A faaruehia ˈi te fenua e ratou, e haapao te fenua i te mau Sabati ta ˈna i ore i haapao na,+ a vai ano atu ai aita ratou i reira, a amo ai ratou i te utua no ta ratou hape, no te mea ua patoi ratou i ta ˈu mau faaotiraa haavaraa e ua vahavaha i ta ˈu mau faatureraa.+ 44 Noa ˈtu râ teie mau mea atoa, a ora ˈi ratou i te fenua o to ratou mau enemi, e ore au e faarue roa ia ratou,+ e ore atoa vau e haafaufau ia ratou a haamou atu ai ia ratou, e ofati hoi te reira i ta ˈu faufaa+ ia ratou, o vau hoi o Iehova to ratou Atua. 45 No to ratou maitai, e haamanaˈo vau i te faufaa i to ratou mau tupuna+ ta ˈu i aratai i rapae i te fenua o Aiphiti i mua i te mata o te mau nunaa,+ no te faaite e o vau to ratou Atua. O vau o Iehova.’”

46 Tera te mau faaueraa, te mau faaotiraa haavaraa e te mau ture ta Iehova i haamau i rotopu ia ˈna e te ati Iseraela i nia i te mouˈa Sinai na roto ia Mose.+