Levitiko

24 Paraparau noa maira Iehova ia Mose, a na ô ai: 2 “A faaue i te ati Iseraela ia hopoi mai i te hinu olive anoi-ore-hia no te mau mori, ia ama noa te mau mori.+ 3 I rapaeau atu i te paruru o te Haamanaˈoraa i roto i te tiahapa o te amuiraa, e haapao Aarona ia ama noa te mau mori mai te ahiahi e poipoi noa ˈtu i mua ia Iehova. E faatureraa vai tamau teie no to outou mau uˈi atoa. 4 E haapao noa oia i te mau mori i nia i te vairaa mori+ auro tamâhia i mua ia Iehova.

5 “E rave oe i te faraoa ota oro-maitai-hia, a eu atu ai ei 12 pane mai te hei ra. Ei piti tuhaa i nia ahuru o te hoê epha* te pane tataitahi. 6 E apǎpǎ oe i te reira ei piti anairaa, e ono hoê anairaa,+ i nia i te iri vairaa pane auro tamâhia i mua ia Iehova.+ 7 Ia tuu oe i te tapau libano anoi-ore-hia i nia iho i te anairaa tataitahi, e e pûpûhia te reira ei pane no te hoê tusia taipe*+ pûpûhia ia Iehova na roto i te auahi. 8 I te mahana Sabati tataitahi, e apǎpǎ noa oia i te reira i mua ia Iehova.+ E faufaa vai maoro teie e te ati Iseraela. 9 E riro te reira na Aarona e na ta ˈna na tamaiti,+ e e amu ratou i te reira i roto i te hoê vahi moˈa,+ no te mea mea moˈa roa te reira no ˈna no roto mai i te mau tusia pûpûhia ia Iehova na roto i te auahi, ei faaueraa vai maoro.”

10 I rotopu râ i te ati Iseraela, te vai ra te tahi tamaiti a te hoê vahine ati Iseraela e a te hoê tane no Aiphiti,+ e tupu ihora te hoê taputôraa i rotopu ia ˈna e te hoê tane ati Iseraela i te puhapa. 11 Faahiti ihora te tamaiti a te vahine ati Iseraela i te Iˈoa* ma te tano ore e faaino atura i te reira.+ Aratai maira ratou ia ˈna ia Mose.+ O Selomita to ˈna metua vahine, te tamahine a Diberi o te opu o Dana. 12 Tuu aˈera ratou ia ˈna i roto i te tapearaa e ia faaite-roa-hia mai ta Iehova faaotiraa ia ratou.+

13 Na ô maira Iehova ia Mose: 14 “A aratai i te taata faaino i rapaeau i te puhapa, e tuu te feia atoa tei faaroo ia ˈna i to ratou rima i nia i to ˈna upoo, e ia pehi te amuiraa taatoa ia ˈna i te ofai.+ 15 E parau oe i te ati Iseraela: ‘Ia faaino te tahi taata i to ˈna Atua, e faautuahia oia no ta ˈna hara. 16 E haapohe-mau-hia te taata o te faahiti i to Iehova iˈoa ma te tano ore.+ E pehi iho â te amuiraa taatoa ia ˈna i te ofai. E haapohehia te taata ê e parahi ra i rotopu ia outou, mai te taata tumu, no to ˈna faahitiraa i te Iˈoa ma te tano ore.

17 “‘Ia haapohe te tahi taata i te tahi atu taata,* e haapohe-mau-hia oia.+ 18 Te taata o te taparahi e o te haapohe i te hoê animara rata,* e horoa oia i te faahoˈiraa no te reira, e ora e ora. 19 Ia pepe i te tahi taata to ˈna taata tupu, ia na reira-atoa-hia oia mai ta ˈna i rave.+ 20 E fati ei fati ïa, e mata ei mata, e niho ei niho, te ino ta ˈna i rave i nia i te tahi atu taata, ia rave-atoa-hia ïa i nia ia ˈna.+ 21 Te taata o te taparahi e o te haapohe i te hoê animara, e horoa oia i te faahoˈiraa no te reira.+ Area te taata o te taparahi e o te haapohe i te tahi atu taata, e haapohehia ïa.+

22 “‘Hoê â faaotiraa haavaraa no outou, e taata ê anei e parahi ra i rotopu ia outou aore ra e taata tumu,+ no te mea o vau o Iehova to outou Atua.’”

23 Paraparau atura ïa Mose i te ati Iseraela, e aratai maira ratou i tei faahiti i te parau faaino i rapaeau i te puhapa, e pehi aˈera ia ˈna i te ofai.+ Ua rave ïa te ati Iseraela mai ta Iehova iho â i faaue ia Mose.