Te mau tavana

2 Pauma aˈera ta Iehova melahi+ mai Gilagala+ tae roa i Bokima e na ô maira: “Ua aratai au ia outou i rapae i Aiphiti i te fenua ta ˈu i horeo i to outou mau tupuna.+ Hau atu â, ua parau vau: ‘E ore roa vau e ofati i ta ˈu faufaa ia outou.+ 2 Area outou, eiaha roa e faaau i te faufaa i te mau taata o teie fenua+ e e huri outou i ta ratou mau fata i raro.’+ Aita râ outou i faaroo i to ˈu reo.+ Eaha outou i na reira ˈi? 3 No reira vau i parau atoa ˈi: ‘Eita vau e tiahi ia ratou mai mua ia outou.+ E riro ratou ei marei no outou,+ e e faafariu ê to ratou mau atua ia outou ia ˈu.’”+

4 I te na reiraraa ta Iehova melahi i te parau i te ati Iseraela taatoa, auê aˈera te nunaa. 5 Topa aˈera ïa ratou i tera vahi i te iˈoa o Bokima* e pûpû aˈera i te tusia ia Iehova i reira.

6 I to Iosua tuuraa i te nunaa ia haere, haere aˈera te ati Iseraela tataitahi i ta ratou tuhaa no te rave i te fenua.+ 7 Tavini noa ˈtura te nunaa ia Iehova i te mau mahana atoa o Iosua e te mau mahana atoa o te mau matahiapo tei ora â i muri mai ia Iosua e tei ite i te mau ohipa faahiahia atoa ta Iehova i rave no Iseraela.+ 8 Pohe ihora Iosua, te tamaiti a Nuna, te tavini a Iehova, i te 110raa o to ˈna matahiti.+ 9 Huna ihora ïa ratou ia ˈna i te tuhaa fenua i tufahia na ˈna i Timina-sera,+ i te tuhaa fenua mouˈa o Epheraima, i apatoerau o te mouˈa Gaasa.+ 10 Amuihia ˈtura tera uˈi taatoa i to ratou mau tupuna,* e tia maira te tahi atu uˈi i muri mai o tei ore i ite o vai Iehova e o tei ore i ite i ta ˈna i rave no Iseraela.

11 Rave aˈera ïa te ati Iseraela i te mea ino i te aro o Iehova e tavini aˈera i te mau Baala.+ 12 Faarue aˈera ïa ratou ia Iehova, te Atua o to ratou mau metua, tei aratai mai ia ratou i rapae i te fenua o Aiphiti.+ Pee aˈera ratou i te tahi atu mau atua, te mau atua o te mau nunaa ati aˈe ia ratou,+ piˈo aˈera ratou i mua ia ratou e faainoino aˈera ia Iehova.+ 13 Faarue aˈera ratou ia Iehova e tavini aˈera ia Baala e te mau idolo o Asetoreta.+ 14 Ura ihora to Iehova riri ia Iseraela. Tuu atura ïa oia ia ratou i te feia e haru i ta ratou faufaa.+ Tuu atura oia ia ratou i te rima o te mau enemi ati aˈe ia ratou,+ e aita ˈtura ratou i nehenehe faahou e faaû i to ratou mau enemi.+ 15 I te mau vahi atoa ta ratou i haere, ua patoi te rima o Iehova ia ratou, a hopoi mai ai i te ati i nia ia ratou,+ mai ta Iehova iho â i parau e mai ta Iehova iho â i horeo ia ratou,+ e tei roto atura ratou i te ahoaho rahi.+ 16 Ua horoa ïa Iehova i te mau tavana o te faaora ia ratou i te rima o te feia haru faufaa.+

17 Aita atoa râ ratou i hinaaro e faaroo i te mau tavana e ua taiata ratou i te tahi atu mau atua e ua piˈo i mua ia ratou. Oioi aˈera ratou i te fariu ê i te hiˈoraa maitai o to ratou mau tupuna, ratou tei faaroo i te mau faaueraa a Iehova.+ Aita ratou i na reira. 18 I te mau taime atoa i horoa ˈi Iehova i te tavana no ratou,+ tei pihai iho Iehova i te tavana e ua faaora oia ia ratou i te rima o to ratou mau enemi i te mau mahana atoa o te tavana. Ua aroha*+ hoi Iehova a faaroo ai i ta ratou autâ no te feia e faahepo+ ra e e hamani ino ra ia ratou.

19 Ia pohe râ te tavana, ua rave faahou ratou i te ino hau atu â i to ratou mau metua ma te pee i te tahi atu mau atua, a tavini ai e a piˈo ai i mua ia ratou.+ Aita ratou i faarue i ta ratou mau peu e to ratou haerea etaeta. 20 Ura ihora to Iehova riri ia Iseraela,+ e na ô maira oia: “No te mea ua ofati teie nunaa i ta ˈu faufaa+ ta ˈu i faaue i to ratou mau tupuna ia haapao e ua faaroo ore ia ˈu,+ 21 eita atoa ïa vau e tiahi mai mua ia ratou hoê noa ˈˈe o te mau nunaa ta Iosua i vaiiho i nia i teie fenua hou oia a pohe ai.+ 22 E tamataraa te reira ia Iseraela e haapao anei ratou i te eˈa ta ˈu, o Iehova, i faaite+ a haere ai na reira mai ta to ratou mau metua i rave.” 23 Vaiiho noa ˈtura Iehova i tera mau nunaa ia faaea noa mai. Aita oia i tiahi oioi ia ratou, e aita i tuu ia ratou i te rima o Iosua.