116 Mea here na ˈu ia Iehova,
Te faaroo mai ra hoi oia i to ˈu reo, ta ˈu mau aniraa i te tauturu.+
2 Te fariu mai ra hoi oia i to ˈna tariˈa ia ˈu nei,+
E tiaoro vau ia ˈna a ora noa ˈi au.
3 Ua haaati te mau taura o te pohe ia ˈu.
Ua noaa vau i te Apoo.+
Ua roohia vau i te ahoaho e te oto.+
4 Tiaoro atura râ vau i te iˈoa o Iehova:+
“E Iehova, a faaora mai ia ˈu!”
5 E Atua aumihi e te parau-tia o Iehova.+
E Atua aroha hamani maitai to tatou Atua.+
6 Te tiai nei Iehova i te feia e ere ra i te paari.+
Ua faahaehaahia vau, e ua faaora oia ia ˈu.
7 E faafaaea faahou â vau,
No to Iehova hamani maitai i nia ia ˈu.
8 Ua faaora mai hoi oe ia ˈu i te pohe,
To ˈu mata i te roimata, to ˈu avae ia ore ia turori.+
9 E haere au na mua ia Iehova i te fenua o te feia ora.
10 Ua faatupu vau i te faaroo, no reira vau i paraparau ai.+
I roohia na vau i te ahoaho rahi.
11 No to ˈu ahoaho, parau atura vau:
“E haavare anaˈe ta te taata atoa.”+
12 Eaha ta ˈu e faahoˈi ia Iehova
No to ˈna maitai rahi i nia ia ˈu?
13 E amo vau i te auˈa o te faaoraraa i nia,
E e tiaoro vau i te iˈoa o Iehova.
14 E faatupu vau i ta ˈu i euhe ia Iehova
I mua i to ˈna nunaa taatoa.+
15 E pau rahi i mua ia Iehova
Te pohe o to ˈna feia taiva ore.+
16 Te taparu nei au ia oe e Iehova,
E tavini hoi au na oe.
E tavini au na oe, e tamaiti na to tavini vahine.
Ua faaora oe ia ˈu i to ˈu mau taura.+
17 E pûpû vau i te tusia haamauruuru ia oe.+
E tiaoro vau i te iˈoa o Iehova.
18 E faatupu vau i ta ˈu i euhe ia Iehova+
I mua i to ˈna nunaa taatoa,+
19 I roto i te mau aua o te fare o Iehova,+
I rotopu ia oe, e Ierusalema.
Ia aruehia Ia!+