Te mau tavana

19 I taua mau mahana ra aita e arii i Iseraela,+ te vai ra hoê ati Levi e ora ra i te tahi vahi atea o te tuhaa fenua mouˈa o Epheraima.+ Rave maira oia i te tahi atu vahine no Betelehema+ i Iuda ei vahine faaipoipo na ˈna. 2 Taiva ˈtura râ tera vahine faaipoipo ta ˈna ia ˈna, e faarue maira ia ˈna no te haere i te fare o to ˈna metua tane i Betelehema i Iuda. Faaea ihora oia i reira e maha avaˈe. 3 Tapapa ˈtura ta ˈna tane faaipoipo ia ˈna e taparuparu atura e hoˈi mai, o ta ˈna tavini tane e e piti asini tei na muri ia ˈna. Aratai atura oia ia ˈna i roto i te fare o to ˈna metua tane. I te iteraa to ˈna metua tane i ta ˈna hunoa, oaoa ihora oia i te farerei ia ˈna. 4 Taparuparu atura ïa to ˈna metua tane hoovai, te metua tane o te vahine apî, ia ˈna ia faaea i ǒ ˈna e toru mahana. Ua inu e ua tamaa ratou, e ua taoto oia i reira.

5 I te maha o te mahana, i te tiaraa mai ratou i te poipoi roa no te haere, parau maira te metua tane o te vahine apî i ta ˈna hunoa: “A tamaa ia itoitohia oe, i muri iho e nehenehe ai outou e haere.” 6 Parahi ihora ïa raua, tamaa e inu aˈera raua. I muri iho parau maira te metua tane o te vahine apî i te tane: “A taoto na i ǒ nei i teie po e ia oaoa to aau.” 7 I te tiaraa mai te tane no te haere, taparuparu noa maira to ˈna metua tane hoovai ia ˈna, taoto ihora ïa oia i reira i tera atoa po.

8 I te tiaraa mai oia i te poipoi roa i te pae o te mahana no te haere, parau maira te metua tane o te vahine apî: “A tamaa na ia itoitohia oe.” Faataere aˈera raua e fatata roa te ahiahi, e tamaa noa ˈtura raua. 9 I te tiaraa te taata i nia no te haere e ta ˈna vahine faaipoipo e ta ˈna tavini, parau maira to ˈna metua tane hoovai, te metua tane o te vahine apî: “A hiˈo, fatata te ahiahi i teie nei. A taoto na i ǒ nei i teie po. Te po atu ra te mahana. A taoto i ǒ nei e ia oaoa to aau. Ananahi outou e tia ˈi i te poipoi roa no to outou tere e no te hoˈi i to fare.”* 10 Tera râ, aita te tane i hinaaro e taoto faahou i reira, tia aˈera ïa oia i nia e tere atura tae roa i Iebusi, oia hoi Ierusalema.+ Na piti asini, ta ˈna vahine faaipoipo e ta ˈna tavini tei na muri ia ˈna.

11 I te piriraa ratou ia Iebusi, fatata roa te po. Na ô maira ïa te tavini i to ˈna fatu: “E faaea anei tatou i teie oire o te ati Iebusi a taoto atu ai i ǒ nei?” 12 Na ô atura râ to ˈna fatu ia ˈna: “Eiaha tatou e faaea i te tahi oire e ere te taata i ǒ i te ati Iseraela. E tere â tatou tae roa i Gibea.”+ 13 Na ô atura oia i ta ˈna tavini: “Mai, e tamata anaˈe i te haere i te hoê o taua mau vahi ra. E taoto tatou i Gibea anei aore ra i Rama.”+ 14 Tamau aˈera ïa ratou i to ratou tere, e te topa ˈtu ra te mahana a piri ai ratou i Gibea no Beniamina.

15 Faaea ihora ïa ratou i reira e tomo aˈera i Gibea no te taoto. I reira, parahi ihora ratou i te mahora o te oire, aita râ hoê taata i rave ia ratou i to ˈna fare no te taoto.+ 16 E i taua po ra, haere maira te tahi tane ruhiruhia na ta ˈna ohipa mai i te faaapu. No te tuhaa fenua mouˈa o Epheraima+ oia, e te faaea ra oia i Gibea e ere mea maoro. E ati Beniamina+ râ te mau taata o te oire. 17 I to ˈna iteraa i te ratere i te mahora o te oire, na ô maira te tane ruhiruhia: “Te haere ra oe ihea, e nohea mai oe?” 18 Pahono atura oia: “Na Betelehema i Iuda mai ra matou e te haere nei matou i te tahi vahi atea i te tuhaa fenua mouˈa o Epheraima, no reira mai au. Ua haere au i Betelehema i Iuda,+ e te haere nei au i te fare o Iehova,* aita râ e taata e rave ra ia ˈu i ǒ ˈna. 19 Ua navai te maa na ta matou mau asini,+ e te faraoa+ e te uaina na ˈu, teie vahine e ta mâua tavini. Aita matou e ere ra i te tahi mea.” 20 Tera râ, na ô maira te tane ruhiruhia: “Ei ia oe na te hau! E aupuru vau ia oe i te mau mea atoa ta oe e hinaaro mau ra. Eiaha râ e taoto i te mahora o te oire.” 21 Aratai maira ïa oia ia ratou i roto i to ˈna fare e paru atura i te mau asini. Horoi aˈera ratou i to ratou avae, tamaa e inu aˈera.

22 A ataata ˈi ratou, haaati aˈera te tahi mau tane haapaoraa ore o te oire i te fare e tupaipai aˈera i te opani. Na ô noa maira ratou i te tane ruhiruhia no ˈna te fare: “A tuu mai i te tane tei tomo i roto i to fare, ia nehenehe matou e taoto ia ˈna.”+ 23 Haere ihora te fatu fare i rapae e na ô atura ia ratou: “Eiaha, to ˈu mau taeae, eiaha e rave i te mea ino. E manihini teie tane i roto i to ˈu fare. Eiaha na e rave i teie ohipa haama. 24 Teie ta ˈu tamahine aita i taoto aˈenei i te tane, e te vahine faaipoipo a teie tane. A vaiiho ia ˈu ia aratai mai ia raua i rapae, e e nehenehe outou e faahaama ia raua mai te peu tera ta outou i faaoti e rave.*+ Eiaha râ outou e rave i teie ohipa haama i teie tane.”

25 Aita râ te mau tane i hinaaro e faaroo ia ˈna. Mau ihora i te tane ta ˈna vahine faaipoipo+ e tuu atura ia ˈna i rapae ia ratou ra. Mafera e rave ino aˈera ratou ia ˈna i te po taatoa e poipoi noa ˈtu. Tuu aˈera ratou ia ˈna a haamata ˈi i te marama. 26 I te poipoi roa, haere maira te vahine e topa ihora i te tomoraa o te fare o te tane to reira to ˈna fatu e tarava ihora i reira e ao noa ˈtura. 27 I te tiaraa mai to ˈna fatu i te poipoi e to ˈna tatararaa i te mau uputa o te fare no te haere i to ˈna tere, ite atura oia i teie vahine, ta ˈna vahine faaipoipo, e tarava ra i te tomoraa o te fare, to ˈna rima i te pae uputa. 28 Na ô atura ïa oia ia ˈna: “A tia i nia, haere anaˈe.” Aita râ e pahonoraa. Tuu atura te tane ia ˈna i nia iho i te asini e reva ˈtura i to ˈna fare.

29 I te taeraa oia i to ˈna fare, rave maira oia i te tipi tupai animara, mau ihora ia ˈna ta ˈna vahine faaipoipo, tâpûpû ihora ia ˈna tera e tera mero ei 12 tuhaa, e faatae atura hoê tuhaa i roto i te mau tuhaa fenua tataitahi o Iseraela. 30 Na ô aˈera pauroa tei ite i te reira: “Aita e ohipa mai teie te huru i tupu e i itehia aˈenei mai te mahana mai â i haere ai te ati Iseraela i rapae i te fenua o Aiphiti tae roa mai i teie mahana. A feruriruri i te reira, a aparau,+ e a faaite mai ia matou eaha te rave.”