Levitiko

27 Paraparau noa maira Iehova ia Mose, a na ô ai: 2 “A paraparau i te ati Iseraela e a na ô atu: ‘Ia pûpû te hoê taata i te hoo faataahia o te hoê taata ia Iehova, na roto i te hoê euhe taa ê,+ 3 e 50 sekela* ario te hoo faataahia o te hoê tane mai te 20 tae atu i te 60 matahiti, ia au i te sekela o te vahi moˈa.* 4 Mai te peu râ e vahine, e 30 ïa sekela te hoo faataahia. 5 Mai te 5 tae atu i te 20 matahiti, e 20 sekela te hoo faataahia no te tane e 10 sekela no te vahine. 6 Mai hoê avaˈe tae atu i te pae matahiti, e pae sekela ario te hoo faataahia no te tamaroa e e toru sekela ario no te tamahine.

7 “‘Mai te 60 matahiti e hau atu, 15 sekela te hoo faataahia no te tane e 10 sekela no te vahine. 8 Mai te peu râ e mea veve roa oia no te aufau i te hoo faataahia,+ e haere ïa te taata pûpûhia e hiˈo i te tahuˈa, e na te tahuˈa e faataa i te tahi hoo no ˈna. E faataa te tahuˈa i te hoo ia au i te pee i te taata i euhe ia aufau.+

9 “‘Mai te peu e animara e tano ia pûpû ia Iehova tei euhehia, e riro te nehenehe e horoahia ia Iehova ei mea moˈa. 10 Eita oia e nehenehe e mono aore ra e taui i te animara maitai i te animara piaoao aore ra te animara piaoao i te animara maitai. Ia taui râ oia i te hoê animara i te tahi atu animara, e riro te animara matamua e te animara atoa tei ravehia ei taui ei mea moˈa. 11 Mai te peu e animara viivii,+ o te ore e nehenehe e pûpûhia ei tusia ia Iehova, e tuu oia i te animara i mua i te tahuˈa. 12 E faataa te tahuˈa i to ˈna hoo, tei te huru o te animara mea maitai anei aore ra mea piaoao. Te hoo faataahia e te tahuˈa, te reira ïa. 13 Ia hinaaro noa ˈtu râ oia e hoo faahou mai i te reira, e horoa atoa oia hoê tuhaa i nia e pae o to ˈna hoo faataahia.+

14 “‘Ia haamoˈa te hoê taata i to ˈna fare ei mea moˈa no Iehova, na te tahuˈa e faataa i te hoo o taua fare ra, tei te huru o te fare mea maitai anei aore ra eita. Ia au i te hoo ta te tahuˈa e faataa, te reira ïa te hoo.+ 15 Ia hinaaro râ te taata o te haamoˈa i to ˈna fare e hoo faahou mai i te reira, e horoa atoa ïa oia hoê tuhaa i nia e pae o te moni o te hoo faataahia o te reira, e no ˈna ˈtura ïa taua fare ra.

16 “‘Ia haamoˈa te hoê taata no Iehova i te tahi faaapu ta ˈna, e faataahia te hoo ia au i te rahiraa huero maa e ueuehia: hoê homera* huero kerite, e 50 ïa sekela ario. 17 Ia haamoˈa oia i ta ˈna faaapu i te matahiti Iubili,+ te reira ïa te hoo faataahia. 18 Ia haamoˈa oia i ta ˈna faaapu i muri mai i te Iubili, e faataa te tahuˈa i te hoê hoo iti aˈe ia au i te rahiraa matahiti e toe ra+ tae roa i to muri iho matahiti Iubili. 19 Ia hoo faahou mai râ te taata tei haamoˈa i ta ˈna faaapu i te reira, e horoa atoa oia hoê tuhaa i nia e pae o te moni o te hoo faataahia o te reira, e no ˈna noa ïa ta ˈna faaapu. 20 Ia ore oia e hoo faahou mai i te faaapu e e hoohia te faaapu i te tahi atu taata, eita e nehenehe e hoo faahou mai i te reira. 21 I te Iubili, ia faahoˈihia te faaapu e te taata tei hoo mai i te reira, e riro ïa ei mea moˈa no Iehova, ei faaapu tei pûpûhia ia ˈna. E riro te reira ei faaapu na te mau tahuˈa.+

22 “‘Ia haamoˈa te hoê taata no Iehova i te hoê faaapu ta ˈna i hoo mai, e ere mea tutuuhia mai,+ 23 e numera te tahuˈa no ˈna i te hoo o te reira tae roa i te matahiti Iubili, e e horoa oia i te hoo faataahia i taua mahana ra.+ Mea moˈa te reira no Iehova. 24 I te matahiti Iubili, e hoˈi te faaapu i te taata ia ˈna to ˈna hooraa mai i te reira, i te taata no ˈna te fenua.+

25 “‘Ia faataahia te hoo atoa ia au i te sekela o te vahi moˈa. Hoê sekela, e 20 ïa gera.*

26 “‘Teie râ, eiaha te taata e haamoˈa i te fanauˈa matamua o te mau animara, i te mea e ua fanauhia mai te reira ei fanauˈa matamua no Iehova.+ To te puaatoro oni anei aore ra to te mamoe, no Iehova ê na te reira.+ 27 Mai te peu e animara viivii e e hoo faahou mai oia i te reira ia au i te hoo faataahia, e horoa atoa oia hoê tuhaa i nia e pae o te hoo o te reira.+ Ia ore râ taua animara ra e hoo-faahou-hia mai, e hoohia ˈtu te reira ia au i te hoo faataahia.

28 “‘Aita râ e mea pûpûhia no roto mai i ta ˈna faufaa ta te hoê taata e pûpû ia Iehova e a muri noa ˈtu* e nehenehe e hoohia ˈtu aore ra e hoo-faahou-hia mai, e taata anei, e animara aore ra e faaapu na ˈna. Pauroa te mea pûpûhia, mea moˈa roa no Iehova.+ 29 Hau atu â, eita e nehenehe e hoo faahou mai i te tahi taata faautuahia tei faataahia no te haamouraa.+ E haapohe-mau-hia oia.+

30 “‘Pauroa te tuhaa ahuru+ o te fenua, no roto mai anei i te maa o te fenua aore ra te maa hotu o te mau tumu raau, na Iehova ïa. Mea moˈa te reira no Iehova. 31 Ia hinaaro noa ˈtu te tahi taata e hoo faahou mai i te tahi tuhaa o ta ˈna tuhaa ahuru, e horoa atoa oia hoê tuhaa i nia e pae o te hoo o te reira. 32 Pauroa te tuhaa ahuru o te nǎnǎ puaatoro e nǎnǎ mamoe e puaaniho, pauroa te animara e na raro aˈe i te raau a te tiai mamoe, e riro te ahuru o te animara* ei mea moˈa no Iehova. 33 Eiaha oia e hiˈopoa mea maitai anei te animara aore ra mea piaoao, eiaha atoa e taui i te reira i te tahi atu mea. Ia tamata noa ˈtu râ oia i te taui i taua animara ra, e riro taua animara ra e tei ravehia ei taui ei mea moˈa.+ Eita te reira e nehenehe e hoo-faahou-hia mai.’”

34 Tera te mau faaueraa ta Iehova i horoa ia Mose no te ati Iseraela i nia i te mouˈa Sinai.+