Deuteronomi

5 Titau maira Mose pauroa te ati Iseraela e parau atura: “A faaroo mai, e Iseraela, i te mau faaueraa e faaotiraa haavaraa ta ˈu e faaite nei ia outou i teie mahana. E haapii e e haapao maitai outou i te reira. 2 Faaau maira Iehova to tatou Atua i te hoê faufaa ia tatou i Horeba.+ 3 E ere i to tatou mau tupuna to Iehova faaauraa i teie faufaa, ia tatou râ, tatou pauroa i ǒ nei e ora nei i teie mahana. 4 Ua paraparau Iehova ia tatou e aro e aro i nia i te mouˈa na roto mai i te auahi.+ 5 I taua taime ra, te tia ra vau i ropu ia outou e ia Iehova+ no te faatae i te parau a Iehova ia outou, te mǎtaˈu ra hoi outou no te auahi e aita outou i pauma i nia i te mouˈa.+ Na ô maira oia:

6 “‘O vau o Iehova to oe Atua, tei aratai ia oe i rapae i Aiphiti, te fenua* o te faatîtîraa.+ 7 Eiaha roa ˈtu to oe ei atua ê atu ia ˈu nei.+

8 “‘Eiaha roa oe e hamani na oe i te hoê tii taraihia,+ aore ra te hoê hohoˈa no te tahi mea i nia i te raˈi, i raro i te fenua nei aore ra i roto i te pape. 9 Eiaha roa oe e piˈo i raro i mua ia ratou aore ra e umehia e tavini ia ratou,+ no te mea o vau, o Iehova to oe Atua, e Atua ïa o te titau ra ia haamori ia ˈna anaˈe,+ o te faatae ra i te utua no te hape a te metua i nia i te tamarii, te mootua e te hina a te feia mea hae ia ˈu,+ 10 o te faaite râ i te here taiva ore* e tausani noa ˈtu te uˈi o te feia mea here ia ˈu e o te haapao ra i ta ˈu mau faaueraa.

11 “‘Eiaha roa oe e faahiti faufaa ore i te iˈoa o Iehova to oe Atua,+ e faautua hoi Iehova i te taata o te faahiti faufaa ore i to ˈna iˈoa.+

12 “‘A haapao i te mahana Sabati no te haamoˈa i te reira, mai ta Iehova iho â to oe Atua i faaue ia oe.+ 13 E haa e e rave oe i ta oe mau ohipa atoa e ono mahana,+ 14 area te hitu o te mahana, e Sabati ïa no Iehova to oe Atua.+ Eiaha roa oe e rave i te tahi ohipa,+ o oe e ta oe tamaiti, ta oe tamahine, ta oe tavini tane, ta oe tavini vahine, ta oe puaatoro, ta oe asini, ta oe animara rata e te taata ê e faaea ra i to oe mau oire.*+ E faafaaea atoa ta oe tavini tane e ta oe tavini vahine mai ia oe.+ 15 A haamanaˈo e i riro na oe ei tîtî i te fenua o Aiphiti e ua aratai Iehova to oe Atua ia oe i rapae ma te rima puai e te rima faatorohia.+ No reira Iehova to oe Atua i faaue ai ia oe ia haapao i te mahana Sabati.

16 “‘A faatura i to metua tane e to metua vahine,+ mai ta Iehova iho â to Atua i faaue ia oe, ia ora maoro oe e ia rahi ta oe mau faufaa* i te fenua ta Iehova to Atua e horoa nei no oe.+

17 “‘Eiaha roa oe e taparahi pohe i te taata.+

18 “‘Eiaha roa atoa oe e faaturi.+

19 “‘Eiaha roa atoa oe e eiâ.+

20 “‘Eiaha roa atoa oe e riro ei ite haavare i te pariraa i to oe taata tupu.+

21 “‘Eiaha roa atoa oe e nounou i te vahine faaipoipo a to oe taata tupu.+ Eiaha roa atoa oe e nounou ma te miimii i te fare o to oe taata tupu, ta ˈna faaapu, ta ˈna tavini tane, ta ˈna tavini vahine, ta ˈna puaatoro e ta ˈna asini e te tahi atu faufaa a to oe taata tupu.’+

22 “Ua parau Iehova i tera mau faaueraa* i ta outou amuiraa taatoa i nia i te mouˈa, na roto mai i te auahi, te ata, e te rumaruma rahi,+ ma te reo puai, e aita ˈtu e parau ta ˈna i tuu hau atu i te reira. Papai ihora oia i te reira i nia e piti pǎpǎ ofai e horoa maira ia ˈu.+

23 “Tera râ, i te faarooraa iho â outou i te reo no roto i te poiri a ura noa ˈi te mouˈa i te auahi,+ faafatata maira te mau upoo atoa o to outou mau opu e te mau matahiapo ia ˈu. 24 Parau maira outou: ‘Ua faaite Iehova to tatou Atua i to ˈna hanahana e to ˈna mana, e ua faaroo matou i to ˈna reo na roto mai i te auahi.+ I teie mahana ua ite matou e nehenehe te Atua e paraparau i te taata a ora noa ˈi oia.+ 25 No te aha ïa matou e pohe ai? E pau hoi matou i teie auahi rahi. Ia faaroo noa matou i te reo o Iehova to tatou Atua, e pohe mau â matou. 26 O vai hoi taata tei faaroo, mai ia matou, i te reo o te Atua ora e paraparau ra na roto mai i te auahi a ora noa ˈi oia? 27 Na oe e tapiri atu no te faaroo i te mau parau atoa ta Iehova to tatou Atua e parau, e na oe e parau mai ia matou i te mau parau atoa ta Iehova to tatou Atua e parau ra ia oe, e e faaroo matou a rave atu ai i te reira.’+

28 “Faaroo ihora ïa Iehova i ta outou i parau ia ˈu, e na ô maira Iehova ia ˈu: ‘Ua faaroo vau i ta teie nunaa i parau ia oe. Mea maitai ta ratou mau parau atoa.+ 29 Ahiri to ratou aau i turai noa ia ratou ia mǎtaˈu ia ˈu+ e ia haapao i ta ˈu mau faaueraa atoa,+ e maitai ïa ratou e ta ratou mau tamarii e a muri noa ˈtu!+ 30 A haere e parau ia ratou: “A hoˈi i to outou mau fare ie.” 31 Area oe, a faaea mai ia ˈu nei. E parau vau ia oe pauroa te faaueraa, te ture e te faaotiraa haavaraa ta oe e haapii ia ratou e ta ratou e haapao i te fenua ta ˈu e horoa nei no ratou ia fatu atu.’ 32 E haapao maitai ïa outou ia rave i ta Iehova iho â to outou Atua i faaue ia outou.+ Eiaha outou e fariu ê i te pae atau aore ra i te pae aui.+ 33 Ia haere noa outou na te mau eˈa atoa ta Iehova to outou Atua i faaue ia outou,+ e ora outou, e rahi ta outou mau faufaa e e maoro to outou pue mahana i te fenua ta outou e fatu.+