Te mau tavana

11 E aito puai o Iepheta+ ati Gileada. E tamaiti o ˈna na te tahi vahine taiata, e o Gileada to ˈna metua tane. 2 Fanau atoa maira râ ta Gileada vahine faaipoipo i te tahi mau tamaiti na ˈna. I te paariraa mai te mau tamaiti a ta ˈna vahine faaipoipo, tiahi atura ratou ia Iepheta e na ô atura ia ˈna: “Aita e tuhaa e noaa ia oe i te utuafare o to tatou metua tane, e tamaiti hoi oe na te hoê vahine ê.” 3 Horo ê atura ïa Iepheta i to ˈna mau taeae e faaea ihora i te fenua o Toba. Amui maira te tahi mau tane ohipa ore ia Iepheta, e pee aˈera ia ˈna.

4 I muri aˈe, aro maira te ati Amona ia Iseraela.+ 5 E i te aroraa te ati Amona ia Iseraela, i reira iho haere aˈera te mau matahiapo no Gileada ia Iepheta ra i te fenua o Toba e parau ia ˈna ia hoˈi mai. 6 Ua parau ratou ia Iepheta: “A haere mai e a riro ei raatira no matou, ia nehenehe tatou e aro i te ati Amona.” 7 Parau atura râ Iepheta i te mau matahiapo no Gileada: “E ere anei outou tei hae roa ia ˈu a tiahi atu ai ia ˈu i rapae i te fare o to ˈu metua tane?+ Eaha ïa outou e haere mai ai ia ˈu i teie nei tei roto outou i te ahoaho?” 8 Na ô maira te mau matahiapo no Gileada ia Iepheta: “No reira matou i hoˈi mai ai ia oe. Ia haere mai oe na muri ia matou e ia aro i te ati Amona. E riro oe ei aratai no matou, no te mau taata atoa o Gileada.”+ 9 Parau atura ïa Iepheta i te mau matahiapo no Gileada: “Ia faahoˈi outou ia ˈu e aro i te ati Amona a pau atu ai ratou ia ˈu maoti Iehova, e riro iho â vau ei aratai no outou!” 10 Parau maira te mau matahiapo no Gileada ia Iepheta: “Ia riro Iehova ei ite* i rotopu ia tatou, e rave iho â matou mai ta oe e parau ra.” 11 Haere atura ïa Iepheta na muri i te mau matahiapo no Gileada, e faariro atura te nunaa ia ˈna ei aratai e ei raatira no ratou. Faahiti faahou ihora Iepheta i ta ˈna mau parau atoa i mua ia Iehova i Mizepa.+

12 Tono atura Iepheta i te vea e parau i te arii o te ati Amona:+ “Eaha ta oe faahaparaa ia ˈu* i haere mai ai oe e aro i to ˈu fenua?” 13 Parau maira ïa te arii o te ati Amona i te mau vea a Iepheta: “Ua rave Iseraela i to ˈu fenua i to ratou paumaraa mai Aiphiti mai,+ mai Aranona+ tae roa i Iaboka e haere roa i Ioridana.+ Teie nei, a faahoˈi mai i te reira ma te hau.” 14 Tono faahou atura râ Iepheta i te mau vea i te arii o te ati Amona 15 no te parau ia ˈna:

“Teie ta Iepheta i parau: ‘Aita Iseraela i rave i te fenua o te ati Moabi+ e te fenua o te ati Amona.+ 16 I to ratou hoi paumaraa mai Aiphiti mai, ua haere Iseraela na te medebara tae roa i te miti Uteute+ e ua tae i Kadesa.+ 17 Tono atura Iseraela i te vea e parau i te arii o Edoma:+ “A vaiiho na ia matou ia haere na to oe fenua.” Aita râ te arii o Edoma i faaroo. Faatae atoa ˈtura ratou i te poroi i te arii o Moabi,+ aita râ oia i farii. Faaea noa ihora ïa Iseraela i Kadesa.+ 18 Ia ratou i haere na te medebara, haere aˈera ratou na pihai iho i te fenua o Edoma+ e te fenua o Moabi. Tere aˈera ratou i hitia o te râ o te fenua o Moabi+ e puhapa ihora i te tuhaa fenua o Aranona. Aita ratou i tomo i te otia o Moabi,+ o Aranona hoi te otia o Moabi.

19 “‘I muri iho, tono atura Iseraela i te vea e parau ia Sihona arii o te ati Amori, arii no Hesebona: “A vaiiho na ia matou ia haere na to oe fenua ia tae matou i te vahi ta matou e haere ra.”+ 20 No to ˈna râ tiaturi ore ia Iseraela, aita Sihona i faatia ia ratou ia haere na to ˈna tuhaa fenua. Haaputuputu maira ïa Sihona i to ˈna mau taata atoa, puhapa ihora i Iahaza e aro aˈera ia Iseraela.+ 21 Tuu atura ïa Iehova te Atua o Iseraela ia Sihona e to ˈna mau taata atoa i te rima o Iseraela, a pau atu ai ratou e rave maira Iseraela i te fenua taatoa o te ati Amori, te mau taata o tera fenua.+ 22 Rave maira ïa ratou i te tuhaa fenua taatoa o te ati Amori mai Aranona tae roa i Iaboka e mai te medebara tae roa i Ioridana.+

23 “‘O Iehova te Atua o Iseraela tei tiahi i te ati Amori mai mua i to ˈna nunaa o Iseraela,+ e teie nei e hinaaro oe e tiahi ia ratou? 24 Aita anei oe e fatu ra i ta to oe atua o Kemosa+ i horoa no oe? No reira, te taata atoa ta Iehova to matou Atua i tiahi mai mua ia matou, o ta matou ïa e tiahi.+ 25 Mea maitai aˈe anei oe ia Balaka+ te tamaiti a Tipora, te arii o Moabi? Aita hoi oia i taputô aˈenei ia Iseraela, aita atoa i aro aˈenei ia ratou. 26 A 300 matahiti i teie nei to Iseraela faaearaa i Hesebona e to ˈna mau oire ati aˈe,+ e i Aroera e to ˈna mau oire ati aˈe e i te mau oire atoa na te hiti o Aranona. Eaha ïa oe i ore ai i tamata aˈenei i te rave faahou i te reira i tera roaraa?+ 27 Aita vau i hara ia oe, ua hape râ oe i te aro mai ia ˈu. Ia riro Iehova te Haava+ ei haava i teie mahana i rotopu i te nunaa o Iseraela e te nunaa o Amona.’”

28 Aita râ te arii o te ati Amona i hinaaro e faaroo i te poroi ta Iepheta i faatae ia ˈna.

29 Ohipa maira to Iehova varua i nia ia Iepheta,+ e haere atura oia na Gileada e te tuhaa fenua o Manase no te haere i Mizepe i Gileada,+ e mai Mizepe i Gileada haere atura oia i te ati Amona.

30 Euhe+ ihora Iepheta ia Iehova e na ô ihora: “Ia tuu mai oe i te ati Amona i to ˈu rima, 31 te taata o te haere mai na roto i te uputa o to ˈu fare e farerei ia ˈu ia hoˈi mai au ma te hau mai te aroraa i te ati Amona, e riro ïa taua taata ra no Iehova,+ e e pûpû vau ia ˈna ei tusia taauahi.”+

32 Haere ihora ïa Iepheta e aro i te ati Amona, e tuu maira Iehova ia ratou i to ˈna rima. 33 Tairi ihora oia ia ratou i te tahi taparahiraa rahi mau mai Aroera mai haere roa i Minita, e 20 oire, e tae roa i Abela-kerami. Vî ihora te ati Amona i mua i te ati Iseraela.

34 Tae maira Iepheta i ǒ ˈna i Mizepa.+ E inaha, te haere mai ra ta ˈna tamahine e farerei ia ˈna, a hauti ai i te tariparau e a ori ai! O ˈna anaˈe hoi ta ˈna tamarii. Aita e tamaiti e aita e tamahine ta ˈna, o ˈna anaˈe. 35 I to ˈna iteraa ia ˈna, hahae ihora oia i to ˈna ahu e na ô maira: “Auê hoi e ta ˈu tamahine! Ua mauiui roa to ˈu aau* ia oe, ua riro hoi oe ei taata o ta ˈu i tiahi. Ua hamǎmǎ hoi au i to ˈu vaha ia Iehova, e eita ta ˈu e nehenehe e faaore i ta ˈu parau.”+

36 Na ô atura râ oia ia ˈna: “To ˈu metua, mai te peu ua hamǎmǎ oe i to vaha ia Iehova, a rave ia ˈu mai ta oe i fafau,+ inaha ua farii Iehova ia tahoo oe i to oe mau enemi, te ati Amona.” 37 Parau atura oia i to ˈna metua tane: “Teie ta ˈu aniraa: E faaea vau o vau anaˈe e piti avaˈe, e haere au i nia i te mouˈa, e e taˈi au e to ˈu mau hoa tamahine, eita hoi au e faaipoipo.”

38 Na ô maira oia: “Haere!” Tuu ihora ïa oia ia ˈna e piti avaˈe. Haere aˈera oia i nia i te mau mouˈa e to ˈna mau hoa e taˈi no te mea eita oia e faaipoipo. 39 I te hoperaa e piti avaˈe, hoˈi atura oia i to ˈna metua tane, e haapao ihora Iepheta i ta ˈna euhe no ˈna.+ Aita oia i taoto aˈenei i te hoê tane. E ua riro teie ei peu* i Iseraela: 40 I tera e tera matahiti, e haere te mau vahine apî i Iseraela e haapopou i te tamahine a Iepheta ati Gileada e maha mahana i te matahiti.