Numera
25 A parahi ai Iseraela i Sitima,+ haamata ihora te nunaa i te rave i te peu taotoraa tia ore e te mau tamahine no Moabi.+ 2 Titau maira te mau vahine i te nunaa a pûpû ai ratou i te tusia i to ratou mau atua,+ amu aˈera te nunaa i te mau tusia e tuturi ihora i mua i to ratou mau atua.+ 3 Apiti ihora ïa Iseraela i te haamoriraa* i te Baala no Peora,+ e riri roa ihora Iehova ia Iseraela. 4 Na ô maira Iehova ia Mose: “A rave pauroa te raatira* o teie mau taata e a tarî ia ratou i mua ia Iehova i te avatea,* ia fariu ê te riri rahi o Iehova ia Iseraela.” 5 Parau atura Mose i te mau haava o Iseraela:+ “E haapohe outou tataitahi i to outou mau taata tei apiti i te haamoriraa* i te Baala no Peora.”+
6 Tera râ, i tera iho â taime, haere maira hoê ati Iseraela ma te aratai mai i pihai iho i to ˈna mau taeae i te tahi vahine Midiana+ i mua i te mata o Mose e o te amuiraa taatoa o te ati Iseraela, a taˈi noa ˈi ratou i te tomoraa o te tiahapa o te amuiraa. 7 I te iteraa Phinehasa+ te tamaiti a Eleazara te tamaiti a Aarona te tahuˈa i te reira, tia aˈera oia i reira iho mai rotopu i te amuiraa e rave maira i te tahi omore.* 8 Pee atura oia i te tane Iseraela i roto i te fare ie, patia ˈtura ia raua e pipiha roa ˈtura te omore, te tane Iseraela e te vahine na to ˈna mero atiraa. I reira, ore atura te ati i nia i te ati Iseraela.+ 9 Te feia tei pohe i taua ati ra, e 24 000.+
10 Na ô maira Iehova ia Mose: 11 “Ua faafariu ê Phinehasa+ te tamaiti a Eleazara te tamaiti a Aarona te tahuˈa i to ˈu riri rahi tahoo i te nunaa o Iseraela, no te mea aita oia i farii noa ˈˈe ia taiva te tahi o ratou ia ˈu.+ Aita ïa vau i haamou i te ati Iseraela, noa ˈtu e titau vau ia haamorihia o vau anaˈe.+ 12 No reira, a parau atu: ‘Te horoa nei au no ˈna i ta ˈu faufaa no te hau. 13 E e riro te reira ei faufaa no te hoê autahuˈaraa vai maoro no ˈna e to ˈna huaai i muri mai ia ˈna,+ no te mea aita oia i farii noa ˈˈe ia taiva te tahi i to ˈna Atua+ e ua pûpû oia i te faaoreraa hara* no te nunaa o Iseraela.’”
14 E te iˈoa o taua tane Iseraela ra tei haapohehia raua te vahine Midiana, o Zimeri ïa te tamaiti a Saru, te raatira o te hoê opu o te ati Simeona. 15 O Kozibi te iˈoa o te vahine Midiana, e tamahine na Zura,+ e raatira oia o te tahi opu i Midiana.+
16 Na ô faahou maira Iehova ia Mose: 17 “A haapeapea ˈtu i te ati Midiana e a tairi ia ratou,+ 18 no te mea ua haapeapea noa na ratou ia outou i ta ratou ravea haavarevare ia outou no nia ia Peora+ e ia Kozibi te tamahine a te tahi raatira no Midiana, to ratou tuahine tei haapohehia+ i te mahana i roohia ˈi outou i te ati no Peora.”+