Numera

18 Na ô maira Iehova ia Aarona: “Na oe, ta oe na tamaiti e to oe huaai e amo i te utua ia ravehia te tahi hara i te nao,*+ e na oe e ta oe na tamaiti e amo i te utua ia ravehia te tahi hara i to outou autahuˈaraa.+ 2 A hopoi atoa mai i to oe mau taeae o te opu o Levi, te opu o to oe tupuna, ia apiti mai ratou ia oe e ia tauturu ratou ia oe+ e ta oe na tamaiti i mua i te tiahapa o te Haamanaˈoraa.+ 3 E haapao ratou i ta ratou mau hopoia ia oe e i te tiahapa taatoa.+ Tera râ, eiaha ratou e faafatata ˈtu i te mau taoˈa o te vahi moˈa e te fata, ia ore ratou e oe atoa e pohe.+ 4 E apiti ratou ia oe e e haapao ratou i ta ratou mau hopoia no te tiahapa o te amuiraa e pauroa te taviniraa i te tiahapa, e eiaha te tahi taata aita i faatiahia* ia faafatata ia oe.+ 5 E haapao outou i ta outou mau hopoia no te vahi moˈa+ e te fata,+ ia ore te nunaa o Iseraela ia riri-faahou-hia.+ 6 Na ˈu i rave i to oe mau taeae, te ati Levi, no rotopu i te ati Iseraela ei ô na outou.+ Te horoahia ra ratou no Iehova no te haapao i te taviniraa i te tiahapa o te amuiraa.+ 7 Na oe e ta oe na tamaiti e haapao i ta outou mau hopoia autahuˈa no te fata e to muri mai i te paruru,+ na outou ïa teie taviniraa.+ Ua horoa vau i te taviniraa autahuˈa ei ô na outou, e te taata aita i faatiahia,* o te faafatata mai râ, e haapohehia ïa.”+

8 Na ô faahou maira Iehova ia Aarona: “Na ˈu i faatoroa ia oe i nia i te mau ô tei pûpûhia na ˈu.+ Ua horoa vau ia oe e ta oe na tamaiti i te hoê tuhaa o te mau mea moˈa atoa tei horoahia e te ati Iseraela ei tuhaa vai tamau.+ 9 Na oe te reira, no roto i te mau mea moˈa roa pûpûhia na roto i te auahi: te mau ô atoa ta ratou e pûpû, oia atoa ta ratou mau tusia huero maa,+ ta ratou mau tusia no te hara+ e ta ratou mau tusia no te hapa+ tei hopoihia mai e ratou ia ˈu. Mea moˈa roa te reira no outou e ta outou mau tamaiti. 10 I te hoê vahi moˈa roa e amu ai outou i te reira.+ E amu pauroa te tane i te reira. Ei mea moˈa roa te reira no outou.+ 11 Na oe atoa teie: te ô ta ratou i pûpû+ mai e pauroa te tusia taueuehia+ a te ati Iseraela. Ua horoa vau i te reira na oe e ta oe na tamaiti e tamahine ei tuhaa vai tamau.+ Pauroa te taata viivii ore i roto i to oe fare te nehenehe e amu i te reira.+

12 “Pauroa te hinu maitai roa ˈˈe e pauroa te uaina apî e te huero maa maitai roa ˈˈe, ta ratou mau hotu matamua,+ ta ratou e horoa na Iehova, e horoa vau i te reira na oe.+ 13 Te mau hotu para matamua atoa o to ratou fenua, ta ratou e hopoi mai ia Iehova, e riro ïa na oe.+ Pauroa te taata viivii ore i roto i to oe fare te nehenehe e amu i te reira.

14 “E riro na oe+ te mau mea atoa i pûpûhia* i Iseraela.

15 “Pauroa te matahiapo e pauroa te fanauˈa matamua+ ta ratou e hopoi mai ia Iehova, e riro na oe. Tera râ, ia hoo mai iho â oe i te mau matahiapo a te taata,+ e ia hoo mai+ oe i te fanauˈa matamua a te mau animara viivii. 16 Ia hoo mai oe i te reira i te hoo faataahia mai te hoê avaˈe e nia ˈtu, i te hoo faataahia e pae sekela* ario,+ ia au i te sekela o te vahi moˈa.* E 20 ïa gera.* 17 Te fanauˈa puaatoro oni matamua anaˈe, te fanauˈa mamoe oni aore ra te fanauˈa puaaniho eiaha oe e hoo mai.+ Mea moˈa te reira. E pîpî oe i to ratou toto i nia i te fata+ e e tutui oe i to ratou mii ia au auahi ei tusia pûpûhia na roto i te auahi ei mea hauˈa noˈanoˈa au maitai* ia Iehova.+ 18 E riro to ratou iˈo na oe. Mai te ouma o te tusia taueuehia e mai te huha atau, e riro te reira na oe.+ 19 Pauroa te ô ta te ati Iseraela e pûpû ia Iehova,+ ua horoa vau na oe e ta oe na tamaiti e tamahine ei tuhaa vai tamau.+ E faufaa o te miti papaa* vai tamau teie i mua ia Iehova no oe e no to oe huaai.”

20 Na ô faahou maira Iehova ia Aarona: “I to ratou fenua, aita ta outou e faufaa, e aita e tuhaa fenua i rotopu ia ratou te riro no outou.+ O vau ta outou tuhaa e to rotopu i te ati Iseraela ta outou faufaa.+

21 “Inaha, ua horoa vau na te ati Levi hoê tuhaa i nia ahuru+ i Iseraela ei faufaa na ratou, ei faahoˈiraa ïa no te taviniraa ta ratou e haapao ra, te taviniraa i te tiahapa o te amuiraa. 22 Eita faahou te nunaa o Iseraela e faafatata i te tiahapa o te amuiraa, a hara ratou a pohe atu ai. 23 Na te ati Levi anaˈe e haapao i te taviniraa i te tiahapa o te amuiraa, e na ratou e amo i te utua o ta ratou hara.+ E faatureraa vai maoro no to outou mau uˈi atoa eiaha ratou e fatu i te tahi tuhaa fenua i rotopu i te ati Iseraela.+ 24 Ua horoa hoi au ei faufaa na te ati Levi hoê tuhaa i nia ahuru o te mau ô pûpûhia e te nunaa o Iseraela, ta ratou e pûpû ia Iehova. No reira vau i parau ai ia ratou: ‘I rotopu i te ati Iseraela, eiaha ratou e fatu i te tahi tuhaa fenua.’”+

25 Na ô maira Iehova ia Mose: 26 “E parau oe i te ati Levi: ‘E fanaˈo outou i te ati Iseraela ra hoê tuhaa i nia ahuru ta ˈu i horoa ei faufaa na outou no ǒ mai ia ratou,+ e no roto i te reira e horoa outou hoê tuhaa i nia ahuru o te tuhaa ahuru ei ô na Iehova.+ 27 E e hiˈohia te reira ei ô na outou, mai te mea ra e huero maa,+ e uaina, aore ra e hinu na outou. 28 Mea na ô outou e pûpû atoa ˈi i te ô na Iehova no roto i te tuhaa ahuru atoa ta outou e fanaˈo i te ati Iseraela, e no roto i te reira, e horoa outou no Iehova i te ô ia Aarona te tahuˈa. 29 E pûpû outou i te ô e rave rau atoa na Iehova no roto i te mau mea maitai roa ˈˈe o ta outou mau ô atoa horoahia na outou+ ei mea moˈa.’

30 “E parau oe ia ratou: ‘Ia pûpû outou te ati Levi i te mea maitai roa ˈˈe o te reira, e hiˈohia te reira mai te mea ra e huero maa, e uaina, aore ra e hinu na outou. 31 E nehenehe outou e to outou utuafare e amu i te reira i te mau vahi atoa, no te mea o ta outou aufauraa tera ei faahoˈiraa i ta outou taviniraa i te tiahapa o te amuiraa.+ 32 Ia pûpû outou i te mea maitai roa ˈˈe o te reira, eita outou e harahia, e eiaha e haaviivii i te mau mea moˈa a te ati Iseraela, a pohe outou.’”+