Levitiko

25 Paraparau faahou maira Iehova ia Mose i nia i te mouˈa Sinai, a na ô ai: 2 “A parau i te ati Iseraela: ‘Ua tomo anaˈe outou i te fenua ta ˈu e horoa nei no outou,+ e haapao to outou fenua i te hoê Sabati no Iehova.+ 3 E ueue outou i te huero maa i roto i ta outou faaapu e ono matahiti, e tope outou i ta outou faaapu vine e ono matahiti, e e haaputu outou i te maa o te fenua.+ 4 I te hitu râ o te matahiti, e Sabati ïa, e mahana faafaaearaa no te fenua, e Sabati no Iehova. Eiaha outou e ueue i te huero maa i roto i ta outou faaapu aore ra e tope i ta outou faaapu vine. 5 Eiaha outou e ooti i tei tupu noa mai i te mau huero maa tei vaiihohia i muri iho i te ootiraa, e eiaha outou e pofai i te mau vine o ta outou faaapu vine aita i topehia. Ei matahiti faafaaearaa te reira no te fenua. 6 E nehenehe râ outou e amu i te maa o te fenua i te roaraa o te Sabati o te fenua. O outou, ta outou mau tavini tane e tavini vahine, ta outou rave ohipa tarahuhia, e te mau purutia ěê e parahi ra i ǒ outou te nehenehe e amu i te reira, 7 oia atoa te mau animara rata e oviri i to outou fenua. Pauroa ta te fenua e faatupu te nehenehe e amuhia.

8 “‘E taio outou e hitu matahiti Sabati, e hitu taime e hitu matahiti, e e raea 49 matahiti te rahiraa mahana o na hitu matahiti Sabati. 9 E faaoto haapuai outou i te pu tara i te ahuru o te mahana o te hitu o te avaˈe. I te Mahana faahauraa,+ e faaoto outou i te pu tara a faaroohia ˈtu ai na to outou fenua taatoa. 10 E haamoˈa outou i te 50raa o te matahiti e e faaite haere outou na to outou fenua i te tiamâraa i te feia atoa e noho ra i reira.+ E riro te reira ei Iubili no outou, e hoˈi mai to outou tâpû fenua ia outou tataitahi e e hoˈi outou tataitahi i to outou fetii.+ 11 E riro tera 50raa o te matahiti ei Iubili no outou. Eita outou e ueue aore ra e ooti i tei tupu noa mai i te mau huero maa tei vaiihohia, eita atoa e pofai i te mau vine o te mau faaapu vine aita i topehia.+ 12 E Iubili hoi te reira. Ei mea moˈa no outou. E nehenehe noa outou e amu i ta te fenua e faatupu mai.+

13 “‘I taua matahiti Iubili ra, e hoˈi mai to outou tâpû fenua ia outou tataitahi.+ 14 Ia hoo atu aore ra ia hoo mai outou i te tahi mea i to outou taata tupu, eiaha outou e taviri te tahi i te tahi.+ 15 E hoo mai outou i te tahi mea i to outou taata tupu, ma te haapao i te rahiraa matahiti i muri mai i te Iubili e e hoo atu oia ia outou ia au i te rahiraa matahiti e toe ra no te ootiraa maa.+ 16 Mea rahi anaˈe te matahiti e toe ra, e nehenehe oia e haamaraa i te hoo o ta ˈna e hoo atu, e mea iti anaˈe te matahiti e toe ra, e faaiti ïa oia i te hoo o ta ˈna e hoo atu, no te mea o te rahiraa ootiraa maa ta ˈna e hoo atu ra ia outou. 17 Eiaha te hoê i rotopu ia outou e taviri i to ˈna taata tupu,+ e e mǎtaˈu outou i to outou Atua,+ o vau hoi o Iehova to outou Atua.+ 18 I te haapaoraa outou i ta ˈu mau faatureraa e te auraroraa i ta ˈu mau faaotiraa haavaraa e parahi ai outou i te fenua ma te taiâ ore.+ 19 E horoa mai te fenua i te maa,+ e tamaa maitai outou e e parahi outou i reira ma te taiâ ore.+

20 “‘Ia na ô râ outou: “Eaha ta matou e amu i te hitu o te matahiti mai te peu e eiaha matou e ueue i te huero maa aore ra e haaputu i ta matou maa?”+ 21 E ninii au i ta ˈu haamaitairaa i nia ia outou i te ono o te matahiti, e e horoa mai te fenua i te maa e navai no e toru matahiti.+ 22 Ia ueue outou i te huero maa i te vaˈu o te matahiti, e amu noa outou i te maa ta outou i ooti i te ono o te matahiti. E amu noa outou i taua maa ra tae roa i te ootiraa o te iva o te matahiti.

23 “‘Eiaha te fenua ia hoohia ˈtu e a muri noa ˈtu,+ no te mea no ˈu te fenua.+ No ˈu, e taata ěê hoi outou e parahi ra i teie fenua e e purutia.+ 24 Na te fenua atoa ta outou e fatu, e tiaraa to te fatu matamua e hoo faahou mai i to ˈna fenua.

25 “‘Ia vevehia to outou taeae e ia hoo atu oia i te tahi tâpû fenua to ˈna, e haere mai ïa te hoê taata hoo faahou mai mea piri roa ia ˈna e e hoo faahou mai i ta to ˈna taeae i hoo atu.+ 26 Aita anaˈe to te tahi taata e taata hoo faahou mai, ua rahi mai râ ta ˈna taoˈa, a nehenehe atu ai oia e hoo faahou mai i te reira, 27 e numera ïa oia i te hoo o te maa i tera rahiraa matahiti mai to ˈna hooraa ˈtu i te reira e e faahoˈi oia i te moni toe i te taata ia ˈna to ˈna hooraa ˈtu te tâpû fenua. I reira to ˈna tâpû fenua e hoˈi mai ai ia ˈna.+

28 “‘Ia ore râ ia itea mai ia ˈna te ravea no te hoo faahou mai i te reira, e vai noa ïa ta ˈna i hoo atu i te taata tei hoo mai i te reira tae roa i te matahiti Iubili.+ E hoˈi mai te reira ia ˈna i te Iubili, e e hoˈi mai to ˈna tâpû fenua ia ˈna.+

29 “‘Ia hoo atu te tahi taata i te hoê fare i roto i te hoê oire auahia, e fanaˈo â oia i to ˈna tiaraa e hoo faahou mai tae roa i te hopea o te matahiti i hoo atu ai oia i te reira. Hoê matahiti taatoa e fanaˈo ai oia i to ˈna tiaraa e hoo faahou mai.+ 30 Ia ore râ te reira e hoo-faahou-hia mai ia hope hoê matahiti taatoa, e riro ïa te fare i roto i te oire auahia i te taata tei hoo mai i te reira e hope noa ˈtu to ˈna mau uˈi. Eiaha taua fare ra e faahoˈihia i te fatu matamua i te Iubili. 31 Area te mau fare nohoraa i roto i te hoê oire aita i auahia, ia hiˈohia ïa mai te mataeinaa. E tiaraa noa to te fatu matamua e hoo faahou mai i te reira, e ia faahoˈihia te reira ia ˈna i te Iubili.

32 “‘Area te mau fare o te ati Levi i roto i to ratou mau oire,+ e tiaraa vai tamau to te ati Levi e hoo faahou mai i te reira. 33 Ia ore te fare o te ati Levi e hoo-faahou-hia mai, e faahoˈi-atoa-hia to ratou fare tei hoohia ˈtu i roto i te oire i te Iubili,+ no te mea te mau fare o te mau oire o te ati Levi, o ta ratou ïa faufaa i rotopu i te ati Iseraela.+ 34 Hau atu â, eiaha te mau vahi+ e haaati ra i to ratou mau oire ia hoohia ˈtu, no ratou hoi te reira e a muri noa ˈtu.

35 “‘Ia roohia to outou taeae i rotopu ia outou i te veve, a ore atu ai e nehenehe e faatamaa ia ˈna, e tauturu outou ia ˈna+ mai ta outou e tauturu i te hoê taata ê e parahi ra i rotopu ia outou e te hoê purutia,+ a nehenehe atu ai oia e ora noa i rotopu ia outou. 36 Eiaha outou e ani ia ˈna i te moni taime aore ra e imi i te apî i nia i to ˈna tua.+ E mǎtaˈu outou i to outou Atua,+ e e ora noa ïa to outou taeae i rotopu ia outou. 37 Eiaha outou e horoa tarahu i ta outou moni na ˈna ma te ani i te moni taime+ aore ra e horoa i ta outou maa ia noaa mai te tahi mea. 38 O vau o Iehova to outou Atua, tei aratai ia outou i rapae i te fenua o Aiphiti+ no te horoa no outou i te fenua o Kanaana, no te faaite o vau to outou Atua.+

39 “‘Ia roohia to outou taeae i rotopu ia outou i te veve e ia hoo oia ia ˈna iho ia outou,+ eiaha outou e faarave ia ˈna i te ohipa a te tîtî.+ 40 E faarirohia oia mai te hoê rave ohipa tarahuhia,+ mai te hoê purutia. E rave oia i te ohipa i ǒ outou tae roa i te matahiti Iubili. 41 I reira oia e vaiiho mai ai ia outou, o ˈna e ta ˈna mau tamarii,* a hoˈi atu ai i to ˈna fetii. E hoˈi mai te fenua o to ˈna mau tupuna ia ˈna.+ 42 E tavini hoi ratou na ˈu ta ˈu i aratai i rapae i te fenua o Aiphiti.+ Eiaha ratou e hoo atu ia ratou mai te hoê tîtî ia hoohia. 43 Eiaha outou e rave ino ia ˈna+ e e mǎtaˈu outou i to outou Atua.+ 44 No roto mai ta outou mau tavini tane e tavini vahine i te mau nunaa ati aˈe ia outou e tia ˈi, ia ratou e nehenehe ai outou e hoo mai i te hoê tavini tane aore ra tavini vahine. 45 E nehenehe atoa outou e hoo mai i te mau tavini i te mau tamarii atoa a te mau purutia ěê e parahi ra i rotopu ia outou,+ ia ratou e i to ratou mau utuafare tei fanauhia mai i to outou fenua, e e riro outou ei fatu no ratou. 46 E nehenehe outou e horoa ia ratou ei faufaa na ta outou mau tamarii i muri mai ia outou ia fatu ratou i taua mau tavini ra e a muri noa ˈtu. E nehenehe outou e faarave ia ratou i te ohipa, eiaha râ e rave ino i to outou mau taeae Iseraela.+

47 “‘Tera râ, ia riro te hoê taata ê aore ra te hoê purutia e parahi ra i rotopu ia outou ei taata taoˈa rahi e ua roohia to outou taeae e ora ra i rotopu ia outou i te veve, a hoo atu ai oia ia ˈna i te taata ê aore ra te purutia e ora ra i rotopu ia outou, aore ra i te hoê mero o te utuafare o te taata ê, 48 e fanaˈo â oia i te tiaraa e hoo faahou mai i muri iho i to ˈna hooraa ia ˈna. E nehenehe hoê o to ˈna mau taeae e hoo faahou mai ia ˈna,+ 49 aore ra te taeae o to ˈna metua tane aore ra te tamaiti a te taeae o to ˈna metua tane te nehenehe e hoo faahou mai ia ˈna, aore ra te tahi fetii piri, hoê o to ˈna utuafare, te nehenehe e hoo faahou mai ia ˈna.

“‘Mai te peu e o ˈna tei riro mai ei taata taoˈa rahi, e nehenehe atoa o ˈna e hoo faahou mai ia ˈna.+ 50 Ia taio oia e te taata tei hoo mai ia ˈna i te rahiraa matahiti mai to ˈna hooraa ˈtu ia ˈna tae roa i te matahiti Iubili,+ e e tuati te moni o to ˈna hooraahia i taua rahiraa matahiti ra.+ E aufauhia ta ˈna mau mahana ohipa i tera roaraa mai tei aufauhia i te hoê rave ohipa tarahuhia.+ 51 Mea rahi anaˈe te matahiti e toe ra, e aufau oia i te hoo o to ˈna hoo-faahou-raa mai ia au i taua mau matahiti ra e toe ra. 52 Mea iti anaˈe râ te mau matahiti e toe ra tae roa i te matahiti Iubili, e numera oia no ˈna iho e e aufau oia i te hoo o to ˈna hoo-faahou-raa mai ia au i te mau matahiti e toe ra. 53 Ia tamau te fatu i te faaohipa ia ˈna i tera e tera matahiti mai te hoê rave ohipa tarahuhia, e ia ara outou eiaha oia e rave ino ia ˈna.+ 54 Teie râ, ia ore ta ˈna e nehenehe e hoo faahou mai ia ˈna na roto i teie mau ravea, i te matahiti Iubili ïa e tiamâ ˈi oia,+ o ˈna e ta ˈna mau tamarii.*

55 “‘E tavini hoi te ati Iseraela na ˈu. E tavini ratou na ˈu ta ˈu i aratai i rapae i te fenua o Aiphiti.+ O vau o Iehova to outou Atua.