Levitiko

18 Paraparau noa maira Iehova ia Mose, a na ô ai: 2 “A paraparau i te ati Iseraela e a parau ia ratou: ‘O vau o Iehova to outou Atua.+ 3 Eiaha to outou haerea mai to te fenua o Aiphiti i ora ˈi outou, e eiaha outou e rave i ta ratou e rave ra i te fenua o Kanaana e aratai ai au ia outou.+ Eiaha outou e pee i ta ratou mau faatureraa. 4 A haapao i ta ˈu mau faaotiraa haavaraa, a auraro i ta ˈu mau faatureraa e a pee i te reira.+ O vau o Iehova to outou Atua. 5 E auraro outou i ta ˈu mau faatureraa e ta ˈu mau faaotiraa haavaraa, i te auraroraa i te reira e ora ˈi te taata.+ O vau o Iehova.

6 “‘Eiaha te hoê o outou e tapiri atu i te tahi fetii piri to ˈna no te taoto ia ˈna.*+ O vau o Iehova. 7 Eiaha oe e taoto i to metua tane, e eiaha oe e taoto i to metua vahine. E metua vahine o ˈna no oe, e eiaha oe e taoto ia ˈna.

8 “‘Eiaha oe e taoto i te vahine faaipoipo a to metua tane,+ e faatae oe i te haama i nia i* to metua tane.

9 “‘Eiaha oe e taoto i to tuahine, te tamahine a to metua tane aore ra te tamahine a to metua vahine, tei fanauhia anei i roto i te hoê â utuafare aore ra aita.+

10 “‘Eiaha oe e taoto i te tamahine a to tamaiti aore ra te tamahine a to tamahine, mea haama hoi no oe.

11 “‘Eiaha oe e taoto i te tamahine a te vahine faaipoipo a to metua tane, te tamahine a to metua tane, no te mea e tuahine o ˈna no oe.

12 “‘Eiaha oe e taoto i te tuahine o to metua tane. E fetii piri o ˈna no to metua tane.+

13 “‘Eiaha oe e taoto i te tuahine o to metua vahine, no te mea e fetii piri o ˈna no to metua vahine.

14 “‘Eiaha oe e faatae i te haama i nia i* te taeae o to metua tane ma te taoto i ta ˈna vahine faaipoipo. E fetii o ˈna no oe.+

15 “‘Eiaha oe e taoto i to hunoa vahine.+ E vahine faaipoipo oia na to tamaiti, e eiaha oe e taoto ia ˈna.

16 “‘Eiaha oe e taoto i te vahine faaipoipo a to taeae,+ no te mea e faatae te reira i te haama i nia i* to taeae.

17 “‘Eiaha oe e taoto i te hoê vahine e ta ˈna tamahine.+ Eiaha oe e rave i te tamahine a ta ˈna tamaiti e te tamahine a ta ˈna tamahine no te taoto ia ˈna. E fetii piri ratou no taua vahine ra. E ohipa faufau* te reira.

18 “‘Eiaha oe e rave i te tuahine o ta oe vahine faaipoipo ei vahine faaipoipo atoa na oe+ no te taoto ia ˈna e te ora noa ra ta oe vahine faaipoipo.

19 “‘Eiaha oe e tapiri atu i te hoê vahine tei viivii no to ˈna maˈi avaˈe no te taoto ia ˈna.+

20 “‘Eiaha oe e taoto i te vahine faaipoipo a to taata tupu,* a viivii atu ai oe.+

21 “‘Eiaha oe e faatia ia pûpûhia* hoê o ta oe mau tamarii ia Moleha.+ Eiaha oe e haafaufaa ore i te iˈoa o to Atua mai tera.+ O vau o Iehova.

22 “‘Eiaha oe e taoto i te hoê tane mai ta oe e taoto i te hoê vahine.+ E ohipa faufau te reira.

23 “‘Eiaha te hoê tane e taoto i te hoê animara a viivii ai oia i te reira, e eiaha te hoê vahine e horoa ia ˈna i te hoê animara no te taoto i te reira.+ E ofatiraa te reira i te mea natura.

24 “‘Eiaha e haaviivii ia outou i teie mau mea, i teie hoi mau mea atoa i viivii ai te mau nunaa ta ˈu e tiahi mai mua ia outou.+ 25 Ua viivii ïa to ratou fenua, e e faatae au i te utua i nia i to reira mau taata no ta ratou mau hape, e e pihaˈe mai taua fenua ra ia ratou.+ 26 Outou râ, a auraro i ta ˈu mau faatureraa e ta ˈu mau faaotiraa haavaraa,+ e eiaha outou e rave i teie mau mea faufau, e taata tumu anei aore ra e taata ê e parahi ra i rotopu ia outou.+ 27 I rave na hoi te mau taata i ora na i taua fenua ra na mua ˈtu ia outou+ i teie mau mea faufau atoa, e ua viivii taua fenua ra i teie nei. 28 I te mea aita outou i haaviivii i te reira, eita taua fenua ra e pihaˈe ia outou mai ta ˈna e pihaˈe i te mau nunaa na mua ˈtu ia outou. 29 Te taata atoa e rave i teie mau mea faufau, e haapohehia ïa mai rotopu mai i to ratou nunaa. 30 E haapao outou i ta ˈu i faaue atu ma te ore e rave i te mau peu faufau tei ravehia na mua ˈtu ia outou,+ a ore atu ai outou e haaviivii ia outou i te reira. O vau o Iehova to outou Atua.’”