Levitiko

19 Na ô faahou maira Iehova ia Mose: 2 “A paraparau i te amuiraa taatoa o te ati Iseraela e a na ô atu: ‘Ia moˈa outou, no te mea o vau, o Iehova to outou Atua, mea moˈa vau.+

3 “‘E faatura* outou tataitahi i to outou metua vahine e metua tane+ e e haapao outou i ta ˈu mau Sabati.+ O vau o Iehova to outou Atua. 4 Eiaha outou e fariu i te mau atua faufaa ore+ aore ra e hamani i te mau idolo no outou.+ O vau o Iehova to outou Atua.

5 “‘Ia pûpû outou i te hoê tusia no te hau ia Iehova,+ ia tano ïa ta outou pûpûraa a fariihia ˈtu ai outou.+ 6 E amuhia ta outou tusia i te mahana e pûpûhia ˈi te reira e ananahi aˈe, area tei toe mai i te toru o te mahana, e taninahia ïa.+ 7 Ia amuhia râ maa vahi o taua tusia ra i te toru o te mahana, mea faufau te reira e eita e fariihia. 8 E faautuahia te taata tei amu i te reira no ta ˈna hape no te mea ua haaviivii oia i te hoê mea moˈa a Iehova, e haapohehia taua taata ra mai roto mai i to ˈna nunaa.

9 “‘Ia ooti outou i te maa auhune o to outou fenua, eiaha e ooti pauroa i te hiti o ta outou faaapu e eiaha e ohi haere i tei toe mai o ta outou ootiraa.+ 10 Eiaha atoa outou e haaputu i tei toe mai o ta outou faaapu vine aore ra e ohi haere i te mau vine na raro i ta outou faaapu. E vaiiho outou i te reira no te taata riirii*+ e te taata ê e parahi ra i rotopu ia outou. O vau o Iehova to outou Atua.

11 “‘Eiaha outou e eiâ,+ eiaha outou e haavare,+ e eiaha outou e taviri te tahi i te tahi. 12 Eiaha roa outou e horeo ma te haavare i to ˈu nei ora+ a haafaufaa ore atu ai i te iˈoa o to outou Atua. O vau o Iehova. 13 Eiaha oe e faaere i to taata tupu,+ e eiaha oe e eiâ.+ Eiaha oe e tapea i te moni aufau a te hoê rave ohipa tarahuhia i te po taatoa e poipoi noa ˈtu.+

14 “‘Eiaha oe e faaino* i te hoê taata tariˈa turi aore ra e tuu i te tahi mea e fifi ai te hoê taata matapo.+ E mǎtaˈu oe i to oe Atua.+ O vau o Iehova.

15 “‘Eiaha e haavaraa parau-tia ore ta outou. Eiaha outou e vahavaha i te taata riirii e e haafaufaa aˈe i te taata taoˈa.+ E haava oe i to oe taata tupu ma te parau-tia.

16 “‘Eiaha oe e haere e pari haavare na rotopu i to oe nunaa.+ Eiaha oe e imi i te ravea e pohe ai to taata tupu.*+ O vau o Iehova.

17 “‘Eiaha oe e hae i to oe taeae i roto i to aau.+ E aˈo iho â oe i to oe taata tupu,+ ia ore oe ia amo i te utua o ta ˈna hara e o ˈna atoa.

18 “‘Eiaha oe e tahoo+ e e inoino i te mau tamarii a to oe nunaa e e here oe i to taata tupu mai ia oe iho.+ O vau o Iehova.

19 “‘Ia auraro outou i ta ˈu mau faatureraa: Eiaha oe e faaouˈa e piti huru o ta oe mau animara rata. Eiaha oe e ueue e piti huru huero maa+ i roto i ta oe faaapu, e eiaha oe e oomo i te tahi ahu tei hamanihia i e piti huru taura tavirihia.+

20 “‘Ia taoto te tahi tane i te hoê vahine e e tavini vahine oia tei faataahia no te tahi atu tane, aita râ oia i hoohia mai aore ra i faatiamâhia, e topa te utua. Tera râ, eiaha raua ia haapohehia, aita â hoi oia i tiamâ ˈtura. 21 E hopoi mai te tane i ta ˈna tusia no te hapa ia Iehova i te tomoraa o te tiahapa o te amuiraa: te hoê mamoe oni o te tusia no te hapa.+ 22 E pûpû te tahuˈa i te faahauraa no ˈna i te mamoe oni o te tusia no te hapa i mua ia Iehova no te hara ta ˈna i rave, e e faaorehia te hara ta ˈna i rave.

23 “‘Ia tomo outou i te fenua ta ˈu e horoa no outou e ia tanu outou i te tahi tumu raau ei maa na outou, e hiˈo outou i to ˈna maa ei mea viivii e te opanihia.* E toru matahiti e opanihia ˈi* te reira no outou. Eiaha e amuhia. 24 I te maha râ o te matahiti, e moˈa pauroa to ˈna maa ei oaoaraa i mua ia Iehova.+ 25 E i te pae o te matahiti, e nehenehe outou e amu i to ˈna maa e e horoa rahi mai te reira i te maa. O vau o Iehova to outou Atua.

26 “‘Eiaha outou e amu i te tahi mea e toto to roto.+

“‘Eiaha outou e imi i te mau tapao aore ra e rave i te peu manamana.+

27 “‘Eiaha outou e hahu* na te hiti o to outou upoo aore ra e tâpû i te hiti o to outou huruhuru taa.+

28 “‘Eiaha to outou tino ia mutumutu ia outou no te hoê taata pohe,+ e eiaha e tǎtau ia outou. O vau o Iehova.

29 “‘Eiaha oe e faahaama i ta oe tamahine ma te faariro ia ˈna ei taiata,+ ia ore te fenua ta ˈu e horoa no outou ia viivii i te peu taiata e ia î i te mau haerea faufau.+

30 “‘E haapao outou i ta ˈu mau Sabati+ e e faatura* outou i to ˈu nao.* O vau o Iehova.

31 “‘Eiaha outou e fariu i te feia e demoni hiˈohiˈo to ratou,+ e eiaha e haere e hiˈo i te feia hiˈohiˈo+ a viivii atu ai outou ia ratou. O vau o Iehova to outou Atua.

32 “‘E tia oe i nia i mua i te rouru hinahina+ e e faatura oe i te hoê tane paari aˈe+ e e mǎtaˈu oe i to Atua.+ O vau o Iehova.

33 “‘Ia parahi te hoê taata ê i ǒ outou i to outou fenua, eiaha outou e hamani ino ia ˈna.+ 34 No outou, ia riro te taata ê e parahi ra i ǒ outou mai te hoê taata tumu i rotopu ia outou+ e e here oe ia ˈna mai ia oe iho, i ora na hoi outou ei taata ěê i te fenua o Aiphiti.+ O vau o Iehova to outou Atua.

35 “‘Eiaha outou e faaohipa i te faito tano ore ia faito outou i te roa, te teiaha aore ra te rahi.+ 36 E faaohipa outou i te faito tia, te ofai faito tia, te epha tia e te hina tia.+ O vau o Iehova to outou Atua, tei aratai ia outou i rapae i te fenua o Aiphiti. 37 No reira, e auraro outou i ta ˈu mau faatureraa atoa e ta ˈu mau faaotiraa haavaraa atoa e e pee outou i te reira.+ O vau o Iehova.’”