Koheleta

7 Mea au aˈe te hoê iˈoa maitai* i te monoˈi maitai,+ e mea au aˈe te mahana poheraa i te mahana fanauraa. 2 Mea au aˈe e haere i te fare otoraa i te haere i te fare tamaaraa,+ o te hopearaa hoi tera o te taata atoa, e ia feruri maitai te taata ora i te reira i roto i to ˈna aau. 3 Mea au aˈe te ahoaho i te ata,+ e maitai mai hoi te aau i te oto o te hohoˈa mata.+ 4 Tei te fare otoraa te aau o te taata paari, tei te fare oaoaraa* râ te aau o te maamaa.+

5 Mea au aˈe e faaroo i te tamaˈiraa a te hoê taata paari+ i te faaroo i te himene a te maamaa. 6 E au hoi te ata a te maamaa+ i te paapaaina o te raau taratara i raro aˈe i te pani. Mea faufaa ore atoa te reira. 7 E nehenehe râ te taata paari e maamaahia no te hepohepo, e e piˈo te aau i te ohipa peta.+

8 Mea au aˈe te hopearaa o te tahi ohipa i to ˈna haamataraa. Mea au aˈe te faaoromai i te aau faateitei.+ 9 Eiaha oe e inoino oioi,*+ i roto hoi i te maamaa e vai ai te inoino.*+

10 Eiaha e parau: “No te aha mea au aˈe te mau mahana na mua ˈˈe i teie mau mahana nei?,” e ere hoi na roto i te paari oe e ui ai i te reira.+

11 Mea maitai e mea au aˈe te paari apitihia i te faufaa no te feia o te ite ra i te marama o te ao.* 12 E parururaa hoi te paari+ mai te moni e parururaa atoa,+ te faufaaraa râ o te ite: E faaherehere te paari i te ora o to ˈna fatu.+

13 A hiˈo i te ohipa a te Atua mau, o vai hoi te nehenehe e faaafaro i ta ˈna i haafefe?+ 14 I te mahana maitai, a faaite atu i teie maitai.+ I te mahana fifi* râ, a haamanaˈo e ua faataa te Atua i teie e tera atoa,+ ia ore ia papu i te taata* eaha te tupu no ratou a muri aˈe.+

15 I te roaraa o to ˈu oraraa faufaa ore,+ mea rahi te mea ta ˈu i ite: te taata parau-tia te pohe i roto i to ˈna parau-tia+ e te taata ino te ora maoro noa ˈtu to ˈna ino.+

16 Eiaha e faataata parau-tia roa ino ia oe,+ eiaha atoa e faaite e taata paari roa oe.+ Eaha oe e hopoi mai ai i te ati i nia ia oe?+ 17 Eiaha e faarahi roa i te ino, eiaha atoa e haamaamaa ia oe.+ Eaha oe e pohe ai hou to oe taime?+ 18 Mea maitai aˈe ia haapao i te faaararaa matamua ma te ore e haapae i te tahi atu.+ E haapao hoi te taata e mǎtaˈu ra i te Atua i tera e piti.

19 E faariro te paari i te taata paari ei taata mana aˈe i e ahuru taata puai i roto i te oire.+ 20 Aita hoi e taata parau-tia i te fenua o te rave noa i te maitai e o te ore roa e hara.+

21 Eiaha atoa e haapao i te mau parau atoa ta te taata e parau,+ a faaroo oe i ta oe tavini ia faaino ia oe. 22 Ua ite maitai hoi oe i roto i to oe aau e rave rahi taime to oe faainoraa i te tahi atu.+

23 Ua tamata vau pauroa te reira ma te paari, e ua parau vau: “E noaa ia ˈu te paari.” Aita râ i haere ia ˈu. 24 Eita e noaahia te ohipa i tupu e mea hohonu roa. O vai te taa i te reira?+ 25 Ua faaue au i to ˈu aau ia taa, ia hiˈopoa e ia maimi i te paari e te tumu o te mau mea, e ia taa i te ino o te maamaa e te maamaa o te neneva.+ 26 Ite ihora ïa vau i teie: Te vahine o te au i te hoê marei, e au to ˈna aau i te upeˈa a te hoê taata aˈuaˈu animara e to ˈna rima i te fifi auri, mea avaava aˈe ïa i te pohe. Eita te taata ta te Atua mau e mauruuru e noaahia ia ˈna,+ e noaahia râ te taata rave hara.+

27 “A hiˈo, teie tei itehia mai ia ˈu,” te parau ra te taata haaputuputu.+ “Ua hiˈopoa vau i te tahi mea i muri iho i te tahi ia itehia ia ˈu te puohuraa, 28 ta ˈu râ i imi noa na, aita ïa i itehia mai ia ˈu. Ua ite mai au hoê tane* i nia hoê tausani, aita râ e vahine ta ˈu i ite mai i rotopu ia ratou. 29 Teie noa ta ˈu i ite mai: Ua hamani te Atua mau i te taata ei taata afaro,+ ua pee râ ratou e rave rahi opuaraa.”+