E mafatu mahora anei to outou no te Atua?

E HERE anei outou i te Atua? Te hinaaro ra anei outou e ite hau atu â ia ˈna? Ua faaitehia mai nafea te reira e nehenehe ai a 19 senekele i teie nei. I taua tau ra, ua poro na te aposetolo Paulo i te hoê nahoa taata ati Iuda e Heleni i roto i te hoê sunago, i Tesalonia. Ua noaa ia ˈna i te haafarii i vetahi o te feia i faaroo na ia ˈna, e ua taui atura ratou i ta ratou haapaoraa, area te mau ati Iuda e rave rahi, “î aˈera ïa i te feii; e ua haaputuputu maira ratou i te taata iino haapao atâ ra, e putuputu aˈera ua tiarepu ihora i taua oire ra”.

I te poiri o te po, ua matara aˈera o Paulo mai roto atu i taua nahoa taata ra e ua haere atura i Berea, e ua poro aˈera i roto i te sunago i te mau Heleni e te mau ati Iuda. “E maitai mau to ratou i to Tesalonia, ua farii noa hoi ratou i te parau ma te aau mahora, e te imiraa i te parau i parauhia ra i te mau mahana atoa hoi i taua parau ra. E feia rahi maira to ratou i faaroo, e te mau vahine Heleni mana ra, e te tane atoa, e ere i te mea iti.” — Ohipa 17:1-12.

Ua tapea maite noa na te mau ati Iuda no Tesalonia i ta ratou haapaoraa tahito e rave rahi senekele te maoro e ta ratou mau peu tutuu o tei haafaufaa ore na i te Parau a te Atua (Mataio 15:1-9). Auê ïa taa-ê-raa e te feia no Berea tei faaroo atu ia Paulo ma te feruriraa mahora, tei hiˈopoa maite i roto i te mau Papai e mea mau anei ta ˈna mau parau e tei taui i ta ratou haapaoraa!

Ua parau te feia faaite manaˈo katolika i faahitihia i roto i te tumu parau i nia ˈˈe no nia i te mau Ite no Iehova e: “tei te parahiraa matamua paha [ta ratou haapaoraa] no te pae o te paieti, o te itoito, e te ohipa”. O ratou “te taata matamua o te faaohipa i te faaroo ta ratou e poro ra” e “e oraraa mâ e te parau-tia” to ratou. Te “farii nei [ratou ia vetahi ê] ma te tapao tamahanahana maitai e te ite nei ratou i te hoê autaeaeraa e te hoê tahoê-maite-raa”. “E Bibilia noa tei to ratou rima”, e “e au maite ta ratou faataaraa i te Bibilia i te mau hinaaro mau a te taata nei, hinaaro aita te tahi atu feia tuatapapa i te parau no nia i te Atua e haamâha faahou nei”. “Te tauturu nei [ta ratou poroi] i te taata tataitahi ia faaruru atu i to ˈna ahoaho i mua i te mau fifi o te ao nei”. Te reira te mau parau i parauhia e te mau upoo faatere haapaoraa e te feia horoa manaˈo katolika. E ere anei teie mau parau i te mau parau maitai roa no te mau Ite no Iehova?

E ere anei ïa i te mea maitai ia faaroo atu i te mau Ite ia haere mai ratou i to outou ra fare no te tauaparau ia outou i nia i te Bibilia? A haamanaˈo na outou e, e ere no te mea ua faaino te tahi no nia i te mau Ite mai te hoê “hairesi” e, ua hape ïa te reira. Ua piihia te mau kerisetiano matamua “te hairesi a te mau Nazôréens”. Ua horoa mai te Bibilia ia tatou paatoa nei i teie aˈoraa: “E hiˈopoa maite i te mau mea atoa ra; e tei maitai ra e tapea maite.” (Ohipa 24:5; Tesalonia 1, 5:21). Eita anei e tia i te feia atoa e here nei i te Atua e te hinaaro nei ia ite o vai mau na o ˈna, ia pee i teie aˈoraa i faauruahia e te Atua?

[Tumu parau tarenihia/Hohoˈa i te api 9]

Mai te peu e katolika outou e te hinaaro nei outou e ite hau atu â no nia i te Atua, a hiˈopoa na i te mau uiraa i mua nei ma te feruriraa mahora maitai e ma te haamaramaramahia e te mau irava bibilia i faahitihia.

Te faaite nei te Bibilia katolika o te abbé Crampon (reo farani, neneiraa matamua) e e pohe te nephe (âme) — te haapii ra anei ta outou Ekalesia e e mea pohe ore te nephe? — Ezekiela 18:4.

Te faaite ra oia e te utua no te hara, o te pohe ïa — te haapii ra anei ta outou Ekalesia e e haamauiuihia te feia rave hara i roto i te po auahi aore ra e mauiui ratou i roto i te vahi tamâraa? — Koheleta 9:5, 10; Roma 6:23.

Te parau nei oia e o Iehova te Atua hoê roa e aita o Iesu i aifaito ia ˈna — te haapii ra anei ta outou Ekalesia e tootoru taata aifaito o te Atua, e hoê o taua na taata tootoru ra o Iesu? — Deuteronomi 6:4; Ioane 14:28.

Te haapii nei oia e o Iesu te ofai tihi tei nia iho ia ˈna te paturaahia te Ekalesia o te Atua — te haapii ra anei ta outou Ekalesia e ua patuhia te reira i nia ia Petero? — Ephesia 2:20, 21; Petero 1, 2:4-8.

Te haapii nei oia e e tia ia pure i te Atua na roto i te arai o Iesu Mesia — te haapii ra anei ta outou Ekalesia e e tia ia pure i te tahi atu feia aore ra na roto i to ratou arai? — Philipi 4:6; Timoteo 1, 2:5.

Te haapii nei oia e e tia ia tatara i ta tatou mau hara ia te Atua ra e ia ani ia ˈna i te faaoreraa hara na roto atu i te arai o Iesu Mesia, to tatou paruru — te haapii ra anei ta outou Ekalesia e e noaa mai taua mau haamaitairaa ra na roto i te arai o te hoê perebitero? — Ioane 1, 1:9; 2:1.

E i te pae hopea, te haapii nei taua Bibilia katolika nei â e e riro tei hinaaro i teie nei ao e tei amui atu i roto i te politita ei taata au ore i te Atua — te amui atura anei ta outou Ekalesia i roto i te mau ohipa politita aore ra faehau no te ao nei? — Ioane 15:19; 18:36; Iakobo 1:27; 4:4.

[Hohoˈa]

Auahi ama o te po auahi?

Torutahi?

Arai?