Mea navai te maa na te ao nei na roto i teihea ravea?

“EITA paha ta tatou mau tutavaraa maitatai roa ˈˈe e navai no te paruru i te ereraa o te maa o ta tatou i ite no te rahiraa taata o teie senekele,” o ta Lester Brown, te peretiteni o te Pu maimiraa Worldwatch i te oire no Washington, ïa e parau ra. Ia au i te vea ra te New Scientist, i te haamataraa o te matahiti 1995, ua topa roa te mau haapueraa maa huero o te ao nei i te faito raro roa e 255 mirioni tane—e navai no te faaamu i te ao nei e 48 noa mahana. I te mau matahiti i mairi aˈenei, i te toparaa te mau haapueraa maa i raro mai i te faito e 60 mahana, ua nehenehe teie pueraa maa e noaa faahou. Teie nei râ, aita te pu maimiraa Worldwatch i papu e e noaa faahou mai anei te faito i pau i te fenua nei.

I muri aˈe e toru matahiti hoturaa ino, e te faaohiparaa e rave rahi fenua navai ore i te maa huero no te faaamuraa animala, e mea iti aˈe te maa huero e vai ra no te feia veve o te hinaaro ra i te reira ei maa matamua na ratou. Te faaara ra te New Scientist e mai te peu e eita teie nei tupuraa e haapao-oioi-hia, e nehenehe hoê miria taata o te haamâuˈa ra hoi e 70 % o ta ratou moni ohipa i nia i te maa, e haamata i te pohe i te poia.

Ua faaite atea mai te Bibilia e e roohia te mau taata o te fenua nei i to tatou tau i te “oˈe.” (Luka 21:11) Teie râ, aita te Atua e tâuˈa ore ra i teie nei fifi. Oia mau, e faaitehia ïa to ˈna tapitapi no te ati o te taata i te pae hopea, i te taime e faatere mai ai to ˈna ra Basileia i te mau ohipa o te fenua nei. I taua taime ra, “e hotu rahi mai ai te fenua.” “E riro hoi e maa sitona tei te fenua i nia i te tupuai o te mau mouˈa ra, e tei tupu ra.” (Salamo 67:6; 72:16) I reira e tupu roa ˈi teie nei mau parau tohu no nia i te Poiete: “Ua hiˈo mai oe e ua faararirari i te fenua; e ua rahi roa ïa i te tupu ia oe . . . ua î te mau peho i te sitona.”—Salamo 65:9, 13.

Te anaanatae ra anei outou i teie parau tǎpǔ faahiahia? E hinaaro anei outou ia ite e nafea outou ia fanaˈo atoa i te reira? A ani atu ïa i te mau Ite no Iehova ia faaite hau atu â ia outou no nia i teie Paradaiso i tǎpǔhia mai i te taime i mua nei, ia pii haere mai ratou i to outou opani fare. Mai te peu e te hinaaro ra outou ia haere mai te hoê taata no te aratai i te hoê haapiiraa Bibilia tamoni ore, a papai atu i te amaa a te Taatiraa “Te mau Ite no Iehova,” B. P. 7715, 98719 Taravao, TAHITI, aore ra i te hoê o te mau vahi nohoraa i te api 2.

[Faaiteraa i te fatu o te hohoˈa i te api 32]

Inset: Pictorial Archive (Near Eastern History) Est.