E nafea ia atuatu i te itoito rahi
1 E nehenehe te itoito rahi o Apolo i te haapaoraa i ta ˈna taviniraa e haamanaˈo ia tatou i te mau hoa Kerisetiano i teie mahana o tei itoito rahi taa ê i roto i te ohipa pororaa. (Ohi. 18:24-28) Ua aˈohia râ ia tatou paatoa: “Eiaha ia toaruaru i te ohipa; ia itoito outou i te varua.” (Roma 12:11) Eaha te nehenehe e tauturu ia tatou ia noaa mai te itoito rahi e ia atuatu atu no te taviniraa Kerisetiano?
2 Faarahihia e te ite: I muri aˈe i to Iesu faraa ˈtu e piti o ta ˈna mau pǐpǐ e ‘faaiteraa ia raua i te auraa i te mau parau no ˈna iho i roto i te mau parau atoa i papaihia ra,’ ua parau raua e: “E ere, e hoa, i anaanatae to tâua aau ia ˈna i paraparau mai ia tâua i te aratia ra.” (Luka 24:27, 32) Aita atoa anei to tatou aau i anaanatae rahi i te noaaraa ia tatou te maramarama rahi atu â o te Parau a te Atua? Oia, ua faarahihia te faaroo e te ite. Te faataa ra te Roma 10:17: “Na te ite maori e noaa ˈi te faaroo.” Ia tiaturi papu roa to tatou aau i te mau parau fafau a Iehova, eita iho â tatou e tia ia ore ia parau i ta tatou i ite aˈenei!—Sal. 145:7; Ohi. 4:20.
3 Eita tatou e nehenehe e tiaturi noa i te ite tei noaa ia tatou na roto i te haapiiraa na mua ˈtu ia puai noa to tatou here i te Atua e to tatou itoito rahi no te tavini ia ˈna. E mea tia ia tamau tatou i te faarahi i to tatou maramarama o te parau mau e i te faahohonu i to tatou here ia Iehova, aita anaˈe e nehenehe ta tatou taviniraa e riro riirii ei mea faatia ture noa. (Apo. 2:4) Te aˈo nei te Parau a te Atua ia tatou ia ‘rahi noa te ite i te Atua.’—Kol. 1:9, 10.
4 Ta tatou mau peu matauhia i te pae haapiiraa: No reira, e mea tia ia hiˈopoa tatou i ta tatou mau peu matauhia i te pae haapiiraa. Ei hiˈoraa, e nehenehe paha tatou e papai i te mau pahonoraa i roto i te hoê tumu parau haapiiraa o Te Pare Tiairaa e e horoa i te mau tatararaa tano. Tera râ, te imi ra anei tatou i te mau irava i faahitihia e te feruri ra anei tatou e nafea ia faaohipa i te reira i roto i to tatou oraraa? I roto i te taioraa bibilia tahebedoma, te rave ra anei tatou i te tutavaraa no te rave i te maimiraa hau ia nehenehe to tatou mau tupuraa e te feruriruri ra anei i te mau haapiiraa i roto? (Sal. 77:11, 12; Mas. 2:1-5) E mea maitai ia haamanaˈo papu i te parau a te Atua e eiaha e faaea! (Tim. 1, 4:15, 16) E turu taua haapiiraa hohonu ra ia tatou e e haapuai ia tatou ia “itoito i te mau ohipa maitatai ra.”—Tito 2:14.