Te faataaraa—Te feia e mauiui nei

IA TIATURIHIA te mau parau atoa i papaihia e te feia “aravihi” no nia i te faataaraa i te mau matahiti i mairi aˈenei, e nehenehe tatou e faaoti e, ia faataa anaˈe te mau hoa faaipoipo i teie mahana, aita ïa e taata hape e aita e taata e mauiui.

E rave rahi mau metua tei arataihia ia faaoti e e ravea maitai te faataaraa inaha ua parare roa te tahi mau manaˈo mai teie te huru: Mea maitai aˈe no te mau tamarii ia faataa te mau metua maoti hoi i te faaoromai i te hoê faaipoiporaa peapea mau; ia taeahia te mau tamarii i te ‘faito matahiti e tano,’ eita ïa ratou e mauiui; e moe oioi noa to ratou mauiui, i roto tau matahiti noa.

Ua turu vetahi i teie mau manaˈo haapeapea ore. Ei hiˈoraa, aita na vahine papai buka ra o Susan Gettleman raua o Janet Markowitz e farii ra i te “aai no nia i te tamarii e roohia i te mauiui.” Te parau nei raua e eita roa ˈtu te tamarii e mauiui ahiri e e ‘faaau maitai te mau metua i to raua faataaraa.’ Te faaite atoa nei raua e e riro te faataaraa o te mau metua ei ravea no te tauturu i te mau tamarii ia faaruru i to ratou iho faataaraa a muri aˈe! Teie hoi ta raua tiaororaa: “Te faanahoraa o te faaipoiporaa e te oraraa utuafare, tera ïa te tia ia tauihia.”—Te itoito e titauhia no te faataa (beretane).

E parau mau anei râ taua mau tiaororaa puai ra? I roto i te hoê ao i reira te maraa noa ra te rahiraa o te mau faataaraa, eaha mau na ta te faataaraa e faahepo ra i nia i te mau tamarii? E parau mau anei e aita e taata e mauiui?

Te hoê hoo riaria mau

I te matahiti 1971, ua haamata na vahine maimi marite ra o Judith Wallerstein raua o Joan Berlin Kelly i te hoê maimiraa no nia i te mau faahopearaa o te faataaraa e tupu a muri aˈe i nia i te mau utuafare fetii. Ua maiti raua e 60 utuafare e faaruru ra i te faataaraa. Ua taiohia i roto i taua mau utuafare atoa ra e 131 tamarii i rotopu i te 2 e te 18 matahiti. Ua maere roa na vahine maimi i te iteraa e aita roa ˈtu te faataaraa i riro ei tamǎrûraa no te mau tamarii. E te reira, noa ˈtu e mea peapea roa te oraraa faaipoipo o to ratou mau metua. Tera râ, ua ahoaho roa te mau tamarii i te faataaraa o to ratou metua.

Ua moe oioi anei to ratou mauiui? Aita hoi. I muri aˈe e pae matahiti, e 37 % o te mau tamarii o tei roohia i te maˈi hepohepo i roto i te hoê faito au noa aore ra i roto i te hoê faito ino roa. Te tiaturi noa ra hoi te rahiraa o ratou e e hoˈi faahou to ratou mau metua—e e faaipoipo faahou raua! I muri aˈe e 10 e tae roa i te 15 matahiti, fatata te afaraa o te mau tamarii tei hiˈopoahia o tei “riro ei feia paari peapea, tei ore i taeahia i te hoê faito maitai, o te haafaufaa ore ia ratou iho, e i te tahi mau taime, ei mau tane e ei mau vahine apî riri vave noa.”

Te patoi ra teie mau faahopearaa i te mau mea i manaˈo-noa-hia na mua ˈˈe. Teie ta Wallerstein Vahine i papai: “Aita roa ˈtu te mea i itea mai e mâua i tuea e te mea o ta mâua i tiaturi na. E rave rahi o tei ore i farii i teie mau parau, e no to ratou riri, ua papai mai te tahi mau taote, te mau metua, e te mau haapao ture e e parau haavare anaˈe ta matou.”

Aita râ te mau tamarii i haavare mai; ua haapapu mai te mau maimiraa ê atu i te faaotiraa a Wallerstein raua o Kelly. Ua papai te Vea no te mau ohipa totiale (beretane) e, “te tiaturi nei” te rahiraa o te feia aravihi, mai te mau aivanaa e maimi ra no nia i te huru o te taata e, “e faahopearaa hohonu ino roa to te faataa-ê-raa te mau metua e te faaoreraa i te faaipoiporaa i nia i te mau tamarii e te mau taurearea.” Te parau faahou ra te vea e “ua haapapu-rahi-hia” teie mau tiaturiraa, ma te faahiti i te tahi mau ohipa i itehia mai oia hoi: Mea rahi aˈe te ohipa ino e te haerea faahuehue i rotopu i te mau tamarii o te faataaraa ia faaauhia i te mau tamarii aita to ratou metua i taa; ua tataipitihia te rahiraa tamarii o te faataaraa i tapeahia i roto i te mau fare maˈi e rapaau i te feruriraa ia faaauhia i te mau tamarii aita te mau metua i taa; o te faataaraa paha te tumu matamua e faatupu i te hepohepo rahi o te mau tamarii.

Eaha te huru o te mau tamarii paari aˈe?

E ere te mau tamarii paari aˈe i te mea maitai aˈe i te mau tamarii nainai. Ia ite anaˈe te mau taurearea i to ratou mau metua ia faataa, e nehenehe ratou e faatupu i te hoê manaˈo haaparuparu rahi o te faaino i to ratou hiˈoraa no nia i te faaipoiporaa e te tahi atu mau faanahoraa, mai te fare haapiiraa. Te faaoti nei vetahi e eita roa ˈtu e nehenehe e tiaturi ia vetahi ê, inaha i te pae hopea, e haavarehia ratou e e faaruehia mai ratou.

I te mea e aita ratou e taa faahou ra e nafea râ, e topa roa vetahi mau taurearea i roto i te mau haerea ino roa ia faataa anaˈe to ratou mau metua. E fariu atu vetahi i nia i te raau taero, e rave atu te tahi i te peu taiata, e faarue mai te tahi atu pae i te fare. E au ra e, i te omuaraa, e farii maitai vetahi i te faataaraa, i muri iho râ te fifi e tupu mai ai. E ere paha i te mea hape noa i te mea e, ia au i ta te vea ra The Washingtonian e papai ra, i te maraaraa te mau faataaraa, ua maraa atoa te rahiraa o te mau fifi o te tamaaraa e te mau taurearea o tei haapohe ia ratou iho.

No reira, e nehenehe te mau metua e tiai ra i te taime e tano, oia hoi ia naeahia ta ratou mau tamarii i te ‘faito matahiti e tano,’ e tiai maoro. Inaha, aita e ‘faito matahiti tano’ i reira te tamarii e farii ohie ai i te faataaraa a to ˈna metua ma te ore e roohia i te mauiui.a Ua faaite atoa hoi te taata tuatapapa i te huru o te taata ra o Norval D. Glenn i roto i te vea Psychology Today e, e riro te mau tamarii i te faaoromai i te mauiui ino mau no roto mai i te faataaraa o te “ore roa ˈtu e tumâhia i roto i to ratou oraraa taatoa.” Te faaoti nei oia e: “E tia ia hiˈopoa maitai i te manaˈo peapea ra e e faatupu te maraaraa rahi o te mau tamarii o te faataaraa i te hoê toparaa mǎrû e te papu atoa râ o te maitairaa o te huiraatira taatoa.”

Noa ˈtu râ e e mea peapea roa teie mau faaotiraa, teie mau maimiraa e teie mau numera, e ere ïa te auraa e e titauhia te taatoaraa o te mau tamarii o te faataaraa ia ora i te hoê oraraa peapea. Te faaite nei râ te reira e ua riro te faataaraa ei ohipa atâata roa no te mau tamarii. Teie ïa te uiraa: Mea nafea te mau tamarii ia paruruhia i te mau faahopearaa o te faataaraa?

Eaha te tiaturiraa no te mau tamarii?

Aita ˈtu parururaa maitai aˈe maoti râ te imiraa i te ravea ia ore te ati e tupu. Mai ta te taote ra o Diane Medved e faataa ra i roto i ta ˈna buka Te patoiraa i te faataaraa (beretane): “Eiaha tatou e vaiiho faahou i te mau tapao miimii ia riro ei tumu hoê roa no te turu i te faataaraa.” Mea papu maitai e na te haerea miimii o te haapao-noa-raa ia ˈna iho, tei mau hohonu roa i roto i te totaiete o teie nei tau, i faaino roa i te mau faaipoiporaa e rave rahi. Nafea te feia faaipoipo e nehenehe ai e aro atu i teie mana ino e ia paruru i to ratou faaipoiporaa?

Te Tumu o te Bibilia, O ˈna atoa ïa te Tumu o te faaipoiporaa. Ei haapapuraa i teie parau, te itehia ra e mea aravihi mau te mau aˈoraa a te Bibilia no nia i te faaipoiporaa. Ua tauturu te reira i te mau mirioni tane e vahine ia haamaitai i to ratou orararaa utuafare. Ua tauturu te Bibilia e rave rahi feia faaipoipo ia ape i te faataaraa. E nehenehe atoa outou e fanaˈo i teie tauturu.b

Tera râ hoi te vahi peapea, eita e nehenehe e ape aore ra e arai i te faataaraa i te mau taime atoa. E tuhaa hoi te reira no te ao o teie nei tau. Te haapii nei vetahi mau metua i te mau ture a te Atua no nia i te faaipoiporaa, e inaha, ua faataa ê na ratou. Te pee maite nei vetahi i teie mau ture, tera râ, na to ratou hoa miimii e te faaturi o te taiva ia ratou. Te farii ra hoi te Bibilia iho e e nehenehe te faataaraa e faatiahia i roto i te tahi mau huru tupuraa taa ê roa. (Mataio 19:9) Teie râ, mai ta Iesu i haapii mai, eita roa ˈtu e nehenehe e rave i te hoê faaotiraa paari ma te ore e feruri na mua ‘i te hoo.’—Luka 14:28.

Ahiri e ua taa ê na outou, eiaha ïa e haaparuparu ma te faahapa ia outou iho aore ra ma te tatarahapa noa. A imi râ i te ravea no te tamǎrû i te mau tamarii. E nehenehe hoi e manuïa! Te haapapu ra te taote ra o Florence Bienenfeld, te hoê vahine aˈo e te hoê arai i te pae no te faataaraa faatura-rahi-hia, i te mau metua tei faataa e: “Eita e titauhia ia riro te faataaraa mai te hoê hautiraa teata heleni i reira e pohe pauroa te taata. E nehenehe te mau taata atoa e ora mai, e i roto i te roaraa o te tau, e ore roa te pepe, e mea maitai roa ïa.”—Nafea ia tauturu i ta outou tamarii ia manuïa i muri aˈe i te faataaraa.

Nafea râ? Eaha ta te mau metua, te mau fetii, e te mau hoa e nehenehe e rave no te taututu i te mau tamarii o te faataaraa?

[Nota i raro i te api]