Aita te mau varua i ora aˈenei e i pohe i te fenua nei

Te vai mau ra te mau varua! I roto i te ao varua, te vai ra te mau varua maitai e te mau varua ino. E mau taata anei ratou tei ora aˈenei e tei pohe i nia i te fenua nei?

Eita, eita roa ˈtu. Ia pohe te hoê taata, eita oia e haere i te ao varua, mai ta te rahiraa o te taata e tiaturi nei. Nafea hoi tatou e nehenehe ai e ite i te reira? No te mea te haapapu mai ra te Bibilia i te reira. E buka parau mau te Bibilia no ǒ mai i te Atua mau ra, o Iehova. Na Iehova i poiete i te taata. Ua ite maitai o ˈna eaha te ohipa e tupu i nia ia ratou ia pohe ratou.—Salamo 83:18; Timoteo 2, 3:16.

Te parau ra te Bibilia e ua poiete te Atua i te taata matamua ra o Adamu ma te faaohipa “i te repo fenua.” (Genese 2:7) Ua tuu aˈera te Atua ia ˈna i roto i te paradaiso, oia hoi i roto i te ô i Edene. Ahiri Adamu i auraro i te ture a Iehova, eita roa ˈtu ïa oia e pohe. E ora noâ oia i nia i te fenua nei i teie mahana. Ua ofati râ Adamu i te ture a te Atua e ua na ô maira te Atua ia ˈna: “E hoˈi noa ˈtu oe i raro i te repo, no reira mai hoi oe; e repo hoi oe, e e hoˈi faahou atu â oe i te repo.”—Genese 3:19.

Eaha ïa te auraa? Teihea o Adamu hou Iehova i poiete ai ia ˈna maoti te repo fenua? Aita roa ˈtu hoi o Adamu. Aita atoa oia i te raˈi ei varua fanau-ore-hia. Aita hoi oia i vai na. No reira, ia parau Iehova ia Adamu e “e hoˈi oia i raro i te repo,” te hinaaro ra ïa Oia e parau e e pohe o Adamu. Eita oia e haere i te ao varua. Ia pohe oia, e ere ïa o Adamu i te ora. Te pohe, o te ereraa ïa i te ora.

Eaha râ no te tahi atu mau taata tei pohe? Ua ere-atoa-hia anei ratou i te ora? Te pahono ra te Bibilia:

• “Te haere nei [te taata e te animara] i te vahi otahi; no te repo anaˈe ratou e te hoˈi anaˈe nei i te repo â.”—Koheleta 3:20.

• “Aita râ a te feia i pohe ra e parau itea.”—Koheleta 9:5.

• “To ratou aroha e to ratou riri, e to ratou feii, ua mou anaˈe ïa.”—Koheleta 9:6.

• “Aore hoi e ohipa, aore e imiraa, aore hoi e ite, aore hoi e paari, i te apoo ta oe e haere na.”—Koheleta 9:10.

• “Te hoˈi nei [te taata] i to ˈna ra repo; mou roa ˈtura ta ˈna i opua i taua mahana ra.”—Salamo 146:4.

Mea fifi anei na outou ia farii i teie mau irava? Mai te peu e e, ia feruri na ïa outou i teie hiˈoraa: i roto e rave rahi utuafare, na te tane e imi i te moni no te aupuru i to ˈna utuafare. Ia pohe te tane, e fifi ïa te utuafare taatoa. I te tahi taime, eita ta ˈna vahine e ta ˈna mau tamarii e navai maitai i te moni no te hoo mai i te maa. Peneiaˈe e hamani ino te mau enemi o te metua tane ia ratou. I teie nei, a ui na: ‘Mai te peu e te ora ra teie taata i roto i te ao varua, no te aha ïa aita oia e tamau ai i te aupuru i to ˈna utuafare? No te aha aita oia e paruru ai i to ˈna utuafare i te mau taata iino?’ No te mea mea tano te mau irava Bibilia: ua erehia taua taata ra i te ora e eita ˈtura ta ˈna e nehenehe e rave i te tahi noa ˈˈe ohipa.—Salamo 115:17.

Te auraa anei ïa e eita roa ˈtu te feia pohe e ora faahou mai? E ere roa ˈtu. E faahiti tatou i te parau no nia i te tia-faahou-raa i muri iho. Papu maitai, aita te feia pohe e ite ra i te ohipa ta outou e rave ra. Aita ratou e nehenehe e ite, e faaroo aore ra e paraparau ia outou. Aita ïa e faufaa ia mǎtaˈu ia ratou. Eita ratou e nehenehe e tauturu e e hamani ino ia outou.—Koheleta 9:4; Isaia 26:14.