Ua faaoti Iehova, no ˈna hoi to tatou ora, eiaha te toto ia amuhia. (Genese 9:3, 4) I roto i te Ture no Iseraela i tahito ra, ua taotia te Atua i te faaohiparaa i te toto no te mea o te ora tera. Ua faaoti oia e: “Tei te toto hoi te maa ora e ora ˈi te mau mea atoa ra, i haapao ai au i te reira e o ta outou ïa e hopoi i nia i te fata ei taraehara na outou iho.” E ia tupai te hoê taata i te hoê animala ei maa? Ua parau te Atua e: “E faatahe oia i te toto i raro a tapoˈi ai i te repo.”a (Levitiko 17:11, 13) Ua faahitihiti noa Iehova i teie faaueraa. (Deuteronomi 12:16, 24; 15:23) Te na ô ra te Soncino Chumash ati Iuda e: “Eiaha te toto ia haapuehia, ia ravehia râ eiaha ia amuhia na roto i te maniiraa ˈtu i raro i te repo.” Aita e ati Iseraela e tia ia ˈna ia rave na ˈna, ia haapue, e ia faaohipa i te toto o te tahi atu mea ora, no te Atua hoi to ˈna ora.

I te tahi taime, e faaitoito te hoê taote i te hoê taata maˈi ia haapue i to ˈna iho toto tau hebedoma hou te tâpûraa (TAD, haapotoraa na roto i te reo Farani no horoaraa i to ˈna iho toto hou te tâpûraa) ia nehenehe oia e pâmu i te taata maˈi i to ˈna iho toto i haapuehia, i te taime e hinaarohia ˈi. Te patoi tia ˈtura râ te raveraa, te haapueraa, e te pâmuraa i te toto i tei parauhia i roto i te Levitiko e te Deuteronomi. Eiaha te toto ia haapuehia; ia maniihia râ—mai te huru ra e ia faahoˈihia i te Atua ra. Parau mau, aita to te Ture a Mose e mana i teie nei. Teie râ, e faatura te mau Ite no Iehova i te mau faaueraa tumu ta te Atua i tuu i roto, e ua faaoti papu ratou e ‘haapae i te toto.’ No reira, eita matou e horoa i te toto, eita atoa matou e haapue i to matou toto e tia ia ‘faatahehia i raro’ no te pâmuraa. E patoi taua peu ra i te ture a te Atua.