E haamahiti Solomona i te faufaaraa o te parau-tia. E na ô oia e: “Te taoˈa a te feia taoˈa rahi ra, o to ˈna ïa pare ati: o te pohe râ o te feia haehaa ra, o to ratou ïa veve. No te ora te ohipa a te feia parau-tia ra, o te taoˈa râ a te paieti ore ia noaa ra, no te hara ïa.”—Maseli 10:15, 16.

I te tahi aˈe pae, e aratai te ohipa tia a te hoê taata parau-tia i te ora, noa ˈtu e mea rahi aore ra mea iti ta ˈna i te pae materia. Nafea? Na roto ïa i te mauruururaa i ta ˈna mau mea. Eita oia e vaiiho e ia haafifi to ˈna huru oraraa i te pae moni i to ˈna tiaraa fariihia e te Atua. Mea taoˈa rahi aore ra mea veve oia, e hopoi mai te huru oraraa o te taata parau-tia i te oaoa i teie nei e i te tiaturiraa o te ora mure ore a muri aˈe. (Ioba 42:10-13) Eita te taata paieti ore e maitaihia noa ˈtu e e noaa mai ia ˈna te faufaa. Eita oia e mauruuru no te faufaaraa paruru o ta ˈna mau taoˈa rahi e e ora ia au i to te Atua hinaaro, e faaohipa maoti oia i ta ˈna mau faufaa no te ora i te hoê oraraa hara.