E mau parau patiatia aore ra rapaau anei ta outou?

I ROTO i teie mau tau fifi, e ere i te mea maere e te vai nei e rave rahi feia “aau paruparu” e “aau taiâ.” (Salamo 34:18) No reira, i roto i te mau parau a te aposetolo Paulo, te vai ra te hoê hinaaro tamau no te “haamahanahana ˈtu i te aau taiâ” e no te “tauturu atu i tei paruparu.” (Tesalonia 1, 5:14). Eaha râ mai te peu e e faaino mai to tatou hoa ia tatou aore ra e rave oia i te hoê ohipa fifi mau? I roto i teie huru tupuraa, peneiaˈe e manaˈo tatou e faatitiaifaro na roto noa i te aˈoraa i taua taata ra. Teie râ, e tia ia haapao-maitai-hia te hoê tuhaa. E nehenehe te aˈoraa, noa ˈtu e mea tano, e faaino mai te peu e e horoahia te reira na roto i te hoê huru etaeta mau. Te faataa ra te Maseli 12:18 e: “Te taata vavi noa ra, e au ïa i te ˈoˈe patiatia ra.”

No reira, ia opua anaˈe tatou e horoa i te aˈoraa aore ra e faatitiaifaro i te hoê taa-ore-raa, mea faufaa roa ia haamanaˈo tatou i te tuhaa piti o te Maseli 12:18: “O te arero râ o te taata paari ra, mai te raau rapaau maˈi ra ïa.” E aniani noa na tatou ia tatou iho e, ‘Mai te peu e e hinaaro vau i te aˈoraa, mea nafea vau ia farii i te reira?’ E hau atu â te rahiraa o tatou i te farii i te faaitoitoraa maoti i te faaino. No reira, eiaha tatou e haamarirau i te faaite i te hamani maitai e te haapopou. E pinepine te reira i te horoa i te taata faaino i te itoito no te haamaitai, e e rahi atu â ïa to ˈna mauruuru no te tauturu i afaihia ˈtu.

Auê ïa i te faufaaraa ia faaau noa tatou i ta tatou mau parau ma te mǎrû! E au te mau manaˈo hohonu o te hoê taata i faaroo i te mau parau rapaauraa i to te papai salamo, tei papai e: “A papai mai te taata parau-tia ra ia ˈu, e mea hamani maitai ïa; e aˈo mai hoi oia ia ˈu ra, e riro ïa mai te monoˈi maitai ra, e ore tau upoo e paruparu i te reira.”—Salamo 141:5.