Hau i roto i te ao taatoa nei i raro aˈe i te Faatereraa a te “Arii no te hau”

“E te tupuraa o to ˈna mana i te rahi e to ˈna hau, aore ïa e hopea; e mana hoi oia i nia i te terono o Davida, e i nia i to ˈna ra basileia ei haamau e ei faaitoito i te reira, ma te parau au e te parau-tia i teie nei e a muri noa ˈtu: na te itoito o Iehova sabaota teie e rave.” — ISAIA 9:7.

1, 2. a) Nafea te fanauraahia te Basileia o te Atua ia fariihia, e anafea te reira e tupu ai? b) Eaha te hopoia ta te Haapueraa ture a te mau Hau amui e horoa ra na to ˈna mau melo, e eaha hoi te tiaraa o te faufaa i faaauhia no te Basileia ta ˈna e horoa ra na Iesu Mesia? c) Nafea tatou e ite ai e e tapea mau â Iehova i taua faufaa ra?

MAI te fanauraahia o Iesu, taua tamarii tamaroa hara ore ra, i riro ei ohipa oaoa mau, e riro atoa te fanauraahia mai to ˈna Basileia i tǎpǔhia maira mea maoro i teie nei, ei ohipa oaoa mau (Salamo 96:10-12). Te haapapu maira te aamu o teie nei tau e ua tuuhia taua basileia nei i nia i te tapono o Iesu i faahanahanahia i te matahiti 1914 ra. Te haapapu maitai maira hoi te mau Hau amui i te reira. E ere hoê noa ˈˈe faatere o na fenua melo 159 o te mau Hau amui no roto i te fare o Davida. Inaha, ia ratou ra hoi te Haapueraa ture a taua faanahonahoraa ra, tei riro ei totovaraa rahi i roto i te ao taatoa nei, e ia ratou atoa ra hoi i te horoaraahia ˈtu no te faatupu i te hau e te ino ore i roto i te huitaata nei.

² Teie râ, aita roa ˈtu te faufaa i faaauhia no nia i te Basileia, no ô mai ia Iehova ra, i faaorehia aˈenei. I roto i te Isaia 9:7, te haapapu maira te parau ra “i nia i te terono o Davida” i te faufaa ta Iehova i faaau atu ia Davida ra no te hoê basileia mure ore. Taa ê atu i te reira, ua tǎpǔ maira Iehova e manuïa mau â taua faufaa i faaauhia ra, e te haamaramarama maira te Salamo 89:3, 4, 35, 36 e e tapea mau â oia i ta ˈna faufaa i te na ôraa e: “Ua fafauhia e au te faufaa i tei haapaohia e au ra; ua tǎpǔ vau i tau tavini ra ia Davida: e haamau â vau i to oe ra huaai e a muri noa ˈtu, e patu vau i to oe ra terono e tae noa ˈtu i te mau ui atoa ra. Hoê aˈenei a ˈu nei tǎpǔraa i to ˈu ihora moˈa, e e ore au e haavare ia Davida. E vai â to ˈna huaai e a muri noa ˈtu; e to ˈna terono, mai te mahana ïa i mua ia ˈu ra.” Oia mau, mai ta te parau ra “Arii no te hau” e faaite maira, e horoa taua faufaa ra i faaauhia, no Iesu Mesia i te tiaraa e faatupu i te hau i roto i te ao taatoa nei.

3. No te aha te tau i reira te “Arii no te hau” e haamata ˈi i te faatere e ore ai e riro ei matahiti hau, no te raˈi e no te fenua nei?

³ Teie râ, eita te anotau te Atua ra o Iehova e tuu atu ai te faatereraa i nia i te tapono o ta ˈna tamaiti Hui arii mono, e riro ei matahiti hau, i nia i te raˈi e i nia i te fenua nei. Ia au i te Apokalupo pene ahuru ma piti, e apeehia mai te fanauraahia to ˈna Basileia e te hoê tamaˈi i roto i te raˈi. Inaha, ua aro te Diabolo ra o Satani e ta ˈna mau demoni i te faatereraa i haamauhia aita i maoro aˈenei, e ua aro te Arii i haamau-apî-hia e tae noa ˈtu hoi ta ˈna mau melahi moˈa, i taua mau puai demoni ra. E, ua hurihia maira o Satani e ta ˈna mau demoni mai te raˈi mai i nia i te fenua nei. Ua faaroohia ˈˈera hoi te hoê reo i te na ôraa e: “E ati ra hoi to te fenua e to te tai, tei raro atu na hoi te diabolo ia outou na; e riri rahi to ˈna no te mea ua ite oia e maa taime poto to ˈna e toe nei.” (Apokalupo 12:12). Atae râ hoi e, mai te huriraahia mai â te Diabolo i raro, to te fenua riroraa mai ei teataraa no te mau ohipa taparahi taata e te tamaˈi hoi tei ore aˈenei i iteahia aˈenei. Oia mau, e hinaaro mau â te huitaata nei i te Faatereraa a te “Arii no te hau”, e na ˈna e hopoi mai i te hau i roto i te ao taatoa nei.

4. No te aha e ore ai e tia ia tatou ia anoi noa i te tiaraa ra “Atua puai” e te tiaraa o te Atua puai hope ra?

⁴ Ia au i te Isaia 9:6, e amui-faahou-hia mai te tahi atu mau tiaraa taa ê i te “Arii no te hau”, i te iˈoa hanahana ra o Iesu Mesia. Te hoê o taua mau tiaraa ra, te “Atua puai” ïa. Eita o Iesu e piihia te Atua mana-hope, mai te huru ra ïa e melo oia no te torutahi oia hoi e toru atua hoê â puai. I te mahana atoa o to ˈna faatia-faahou-raahia mai, ua faaite aˈera hoi oia e e iti aˈe oia ia Iehova. Ua fa atura oia i mua ia Maria Magadala e ua tono atura ia ˈna ia haere atu oia e faaara i ta ˈna mau pǐpǐ e peapea noa ra e te hoˈi ra oia i to ratou Metua ra e to ˈna Metua, i to ratou Atua ra e to ˈna Atua (Ioane 20:17). Aita oia i faaea e tae roa mai i teie nei mahana, i te aratai i te huitaata nei i roto i te haamoriraa a te “Atua no te mau atua ra”, oia hoi o Iehova (Daniela 11:36). No reira, e Atua atoa ˈtura ïa to Iesu Mesia; e taua Atua ra e ere ïa o Iesu iho, o te Metua râ i nia i te raˈi ra oia hoi o Iehova. Ua riro mau â te “Arii no te hau” ei Afai parau no te hoê hau e te hoê ino ore e vai maoro atu i roto i te ao taatoa nei.

5. No te aha o Iesu Mesia te nehenehe mau e aratai maite i te mau taata atoa i roto i te haamoriraa a te Atua ora mau ra o Iehova?

⁵ E aratai te Tamaiti a te Atua, tei faahanahanahia i teie nei, i te taatoaraa o te mau taata i roto i te haamoriraa a te Atua ora ra o Iehova, e a muri noa ˈtu. E maraa mau â taua ohipa ra i te Tamaiti a te Atua. Oia mau, i roto i te mau mea atoa i poietehia i nia i te raˈi e i raro i te fenua nei, o ˈna tei ite maitai o vai mau na Iehova e te reira, mea maoro i teie nei. I roto i te Korinetia 1, 2:11, teie ta aposetolo Paulo e faaite ra: “O vai hoi te ite i te mau mea a te taata nei maori râ o te [feruriraa] taata i roto ia ˈna ra?” Hoê â atoa ïa huru no Iesu Mesia. Noa ˈtu â ïa, ua faaohipahia oia e te Atua ra o Iehova no te poiete i te huitaata nei, e ohipa taa ê ïa no ˈna ia riro mai oia ei taata, ia ite i te mau mea atoa o te oraraa i nia i te fenua nei e te iteraa oia iho i te mau manaˈo hohonu o te taata. No reira hoi i papaihia ˈi e: “E tamaiti noa iho hoi oia, i ite oia i te auraro i to ˈna ra mau pohe” ei taata i nia i te fenua nei (Hebera 5:8). Ua faaite mau â oia e e nehenehe e pûpûhia ˈtu ia ˈna ra ‘te mana atoa i te raˈi e te ao atoa nei’ e e amo i te tiaraa ra “Atua puai”. — Mataio 28:18; hiˈo Philipi 2:5-11.

“Aˈo [faahiahia] ra” e “Metua no te ui a muri atu”

6. Nafea Iesu Mesia i te faatupuraa i to ˈna tiaraa “Aˈo [faahiahia mau]”, e eaha te mau haamaitairaa ta te “feia rahi roa” i huti mai i ta ˈna aˈo faahiahia mau?

⁶ No taua mau tumu paari mau atoa ra, e nehenehe ai te tamaiti Hui arii i nia i te raˈi, a te Atua; e faatupu i pihai iho i te mau taata te tiaraa “Aˈo [faahiahia]”. (Isaia 9:6.) E mau aˈoraa paari, tia e te aueue ore mau ta ˈna. Ma to ˈna tiaraa Arai i rotopu i te Atua ra o Iehova e te feia i ô atu i roto i te faufaa apî, ua faaite mau â oia e e Aˈo faahiahia mau oia i roto i na senekele hoê ahuru e ma iva i mairi aˈenei. E mai te matahiti 1935 mai, ua ô maira te “feia rahi roa” o ta ˈna mau “mamoe ê atu” i roto i ta ˈna aˈoraa faahiahia e te fanaˈo atoa ra hoi i te haapiiraa faahiahia roa ˈˈe e te aratairaa faahiahia roa ˈˈe aita ˈtu ai (Apokalupo 7:9-17; Ioane 10:16). I teie tau o te “[hopea o te amuiraa o te mau mea nei]”, ua faatupu Iesu i te hoê mauhaa ta ˈna e faaohipa no te amo i to ˈna tiaraa Aˈo; o te pupu i tǎpǔhia mai o te “tavini haapao maitai e te paari”, ta ˈna i haamau ei tiaau i te mau taoˈa atoa aore ra mau faufaa hui arii na ˈna ra, i nia i te fenua nei (Mataio 24:3, 45-47; Luka 12:42-44). Te horoahia ra hoi i te “feia rahi roa” i te mau aˈoraa faahiahia i te pae varua e te nehenehe atoa hoi e tiaturi, inaha, ua niuhia te reira i nia i te Parau faaitehia a te Atua.

7. No te aha e ere te Diabolo ra o Satani i te hoê atua puai no te nunaa o Iehova?

⁷ I te mea hoi e te faaau nei tatou ia tatou i taua mau aˈoraa ra, e ete atura ïa te Diabolo ra o Satani, te “atua o teie nei ao”, i te hoê atua puai no tatou, tatou te nunaa o Iehova (Korinetia 2, 4:4). Oia mau, ua auraro tatou i te faaueraa e haere ê mai i rapae ia Babulonia Rahi, te taatoaraa o te mau haapaoraa hape o teie nei ao, e eita tatou e amui faahou atu i ta ˈna mau hara hairiiri mau. Ua tia papu tatou i te pae o te Taata ta Iehova i tuu atu i nia i te tapono, ta ˈna faatereraa.

8. a) No te aha te tiaraa ra “Metua no te ui a muri atu” e riro ai ei tiaraa faufaa mau no te “feia rahi roa”? b) Eaha te ohipa e tupu i nia i te feia e farii ia Satani ei metua varua no ratou?

⁸ E faatupu te tiaraa “Metua no te ui a muri atu” i te here rahi. E faufaa taa ê hoi to te reira no te “feia rahi roa” o te mau “mamoe ê atu”. Inaha, aita te riroraa te Diabolo ra o Satani ei metua no ratou, i huti i te manaˈo o taua mau “mamoe ra”. E riri roa ratou ia manaˈo ratou i te mau upoo faatere haapaoraa ati iuda tei patoi ia Iesu e o ta ˈna i parau atu e: “O te Diabolo to outou na metua, i faatia ˈi â outou i te hinaaro o to outou metua ra: e taparahi taata oia mai te matamua mai â: aore oia i haapao i te parau mau, no te mea aore e parau mau i roto ia ˈna. Ia parau oia i te parau haavare ra, ua parau ïa i te parau au ia ˈna ihora, e haavare oia, e e metua hoi no te haavare.” (Ioane 8:44). Ua faataa ê mai te “feia rahi roa” ia ratou i te mau tamarii varua a te Diabolo ra o Satani, o te ore hoi te mana metua i nia i te huitaata ino nei, e vai e a muri noa ˈtu. E pohe te feia e farii ia ˈna ei metua varua, mai ia ˈna atoa ra. Te haamouraa rahi, faataipehia i te “auahi pohe ore” i roto i te Mataio 25:41, tera te tiai maira i te Diabolo e te mau taata atoa o te ore e faaatea ê mai ia ratou i ta ˈna faatereraa. — Mataio 25:41-46.

9. Te tamata ra te “feia rahi roa” i te mana metua o te “Metua no te ui a muri atu” i roto i tei hea auraa?

⁹ Teie râ, te fanaˈo nei te “feia rahi roa” i teie nei â i te mana metua o te “Metua no te ui a muri atu”a? Nafea ïa te reira? Na roto ïa i te auraroraa ˈtu i to ˈna reo, na roto i te riroraa mai ei “mamoe ê atu” na ˈna e na roto i te apitiraa ˈtu i te toea o te Iseraela pae varua. Te faaite ra taua mau auraa fetii mahanahana mau ra i te hau. Ma te papai i raro aˈe i te faauruaraa a te Atua, ua faataa maira te aposetolo Paulo no nia ia Iehova, i roto i te Roma 16:20, mai te “Atua hau” ra. E ere anei ïa i te mea tano ia parauhia ta ˈna Tamaiti te “Arii no te hau”? Na roto i te haamauraa i te hau i roto i te ao taatoa nei, e tapea mau â te “Arii no te hau” i to ˈna haapao maitai ia au i ta teie tiaraa e titau maira.

Te faatereraa arii a te “Arii no te hau”

10, 11. Eaha ta Isaia i parau i muri aˈe i to ˈna tohuraa no nia i te fanauraa hanahana roa ˈˈe o te mau tau atoa, e eaha te auraa o taua mau parau na ˈna ra?

¹⁰ I muri aˈe i to ˈna tohuraa mai no nia te fanauraa hanahana roa ˈˈe o te mau tau atoa, oia hoi to te Tamaiti a te Atua o te horoahia ˈtu te tiaraa ra “Arii no te hau”, teie â ta te peropheta o Isaia e parau ra i raro aˈe i te faauruaraa a te varua o Iehova: “E te tupuraa o to ˈna mana i te rahi e to ˈna hau, aore ïa e hopea; (...) na te itoito o Iehova sabaota teie e rave.” — Isaia 9:7.

¹¹ Ma te parau ra “na te rahi o to ˈna mana”, te haapapu maira te parau tohu, e te tuhaa fenua o te “Arii no te hau” o te fenua taatoa nei ïa. Aita hoê aˈe otia e taotia i to ˈna tuhaa fenua i nia i te palaneta taatoa nei. Hau atu, i roto i te Paradaiso i nia i te fenua nei i mua ia tatou nei, aita e hopearaa to te hau. Aita e huenaneraa faahou i te mau vahi atoa. E itehia te hau i nia i te palaneta taatoa e e rahi roa hoi te hau (Salamo 72:7). Taua hau ra, e ere noa ïa te oreraa te mau ohipa iino e te tamaˈi. E ite-atoa-hia râ te parau-tia e te parau au. Oia mau, aita anei o Isaia i parau e e turuhia te faatereraa hui arii “na te parau au e te parau-tia i teie nei e a muri noa ˈtu”? E haamaitai-rahi-hia te huitaata nei, e na te itoito aita e hopearaa o te Atua ra o Iehova, e faatupu i te reira i to tatou nei tau.

12. O vai te mau tia a te faatereraa e vai ra i nia i te tapono o te “Arii no te hau”, i nia i te fenua nei?

¹² Te vai nei hoi to taua faatereraa ra, e mau ra i nia i te tapono o te “Arii no te hau”, to ˈna mau tia i nia i te fenua taatoa nei. Te rahi noa ˈtura te mana o te faatereraa hui arii i nia i te raˈi o taua Tamaiti hui arii ra, i te itehia. Ua haaputuputu-paatoa-hia te toea o te mau pǐpǐ a te Mesia faatavaihia i te varua, na roto mai i te mau nunaa. Te haere mai nei hoi te “feia rahi roa”, no roto mai hau atu i te 200 fenua. E 3 229 022 rahiraa mau Ite no Iehova i teie nei, e aitâ te ohipa oaoa no te haaputuputuraa i oti atura. Te faateitei nei taua “feia rahi roa” ra i te faatereraa e mauhia ra e te “Arii no te hau”. E te auraro nei to ˈna mau melo ma te mauruuru i taua faatereraa nei e te farii nei hoi ratou ia riro ratou ei mau taata tonohia i pihai iho i te mau taata o te fenua taatoa nei, ma te tahoê atu i te mau “ono i te Mesia”, oia hoi te toea faatavaihia ra. — Korinetia 2, 5:20.

E faahuˈahuˈa-roa-hia te totovaraa o teie nei tau

13. a) Te faaitoito ra te feia tonohia o te Basileia i te aha i rotopu ia ratou iho? b) Mea nafea ta te Atua huru hiˈoraa mai i te mau Hau amui?

¹³ Te haapao atoa nei taua feia i tonohia ra e ia vai hau noa ratou te tahi e te tahi. Te ‘ara maite nei ratou ia vai â te autahoê a te varua i te ati ra i te hau’. (Ephesia 4:3.) Te faaitoito nei ratou noa ˈtu te mau arepurepuraa e faaaueue nei i te fenua taatoa nei. Inaha i te parau mau, te haaputuputu nei te mau nunaa melo aore ra eita no te Hau amui no te aro i te faatereraa a te “Arii no te hau” ra. E, o te manaˈo o te Atua ïa, ua riro te mau Hau amui ei pû totova rahi i roto i te ao taatoa nei. Oia mau, te faahua parau nei taua faanahonahoraa e te faatupu nei oia i te ohipa ta te Atua i horoa ˈtu na te “Arii no te hau” e rave. Te titau nei oia i te mau nunaa o te ao taatoa nei ia tauturu ia ˈna i te haamauraa i te hau i roto i te ao taatoa nei maoti te mau tutavaraa a te taata nei. Ua poro-atoa-hia oia i te matahiti 1986 ei “Matahiti hau i roto i te ao taatoa nei”. Te faaite papu maira ïa oia ia na reira oia e te patoi mau ra oia i te “Arii no te hau” e i te faufaa ta Iehova i fafau mai ia ˈna no te hoê basileia mure ore.

14. Nafea to te peropheta Isaia i te faaararaa i te feia atoa e patoi ra ia Iehova e ta ˈna faufaa i fafau no te Basileia?

¹⁴ No taua tumu atoa ra o Isaia i faaara ˈtu ai i te arii ra o Ahaza e to ˈna mau taata; inaha, te imi ra ratou i te hau e te ino ore na roto i te tahoêraa ˈtu i te Puai rahi no Asura. E itehia te faaararaa a te peropheta i roto i te Isaia 8:9, 10. Mai teie te huru to ˈna parauraa ˈtu i te feia atoa e patoi na ia Iehova e ta ˈna faufaa i faaau no te Basileia: “A amui, e te mau taata e, mǎtaˈu ai; e faaroo mai e to te mau fenua roa atoa ra: tatua ia outou iho, a horuhoru ai; tatua ia outou iho, a horuhoru ai. E feruri maite outou, e e riro ei mea faufaa ore; a parau na i te parau, e e ore ïa e mau; e riro hoi te Atua ia matou nei.”

15. Ia hiˈohia te ohipa i tupu i te mau mahana o te arii ra o Ahaza, eaha ïa te tupu i nia i te totovaraa e ravehia ra no te patoi i te faufaa i fafauhia no te Basileia?

¹⁵ Ia totova na te mau nunaa e auraro nei i te tamaiti hui arii o teie nei ao, te Diabolo ra o Satani, i te faufaa i fafauhia no nia i te Basileia e tae noa ˈtu i ta ˈna Arii mono e to ˈna Tamaiti hui arii Raatira ra, mai te peu e hinaaro ratou! E faahuˈahuˈa-roa-hia ta ratou totovaraa, mai tei ravehia i te mau mahana o te arii o Ahaza ra. Aita te mau arii Rezina no Suria e no Peka i Iseraela i mǎtaˈu noa ˈˈe ia Iehova sabaota ra, ua patoi râ ratou i ta ˈna faufaa i fafau no te Basileia. Aita aˈera hoi ta ratou totovaraa i manuïa. Aita atoa te arii no Iuda ra o Ahaza i mǎtaˈu ia Iehova, ua amui atura râ oia i te Puai no Asura e faatere na i te ao taatoa nei. Aita hoê ohipa maitai i noaa mai ia ˈna. Maori hoi i te faatupu i te hau e te ino ore, ua riro taua autahoêraa ra ei tumu no te ati e te faatîtîraa. Ohipa ino roa ˈtu â, ua erehia ˈˈera ia ˈna te haamaitairaa a Iehova.

16. Nafea to Iehova ofatiraa i te totovaraa a to Asura, i te faufaa i fafauhia no te Basileia, e eaha ta te reira e faaite maira no to tatou nei tau?

¹⁶ I muri aˈe i te poheraa o Ahaza e i raro aˈe i te faatereraa a ta ˈna tamaiti, te arii ra o Hezekia, ua ofati aˈera Iehova sabaota i te totovaraa a to Asura no te faufaa i faaauhia no te Basileia. Ua tia aˈera ïa i te arii no Asura ia faarue mai i te fenua ra o Iuda i muri aˈe to te melahi a Iehova haamouraa 185 000 o ta ˈna mau faehau. Aita roa ˈtu te enemi i nehenehe e faaohipa noa ˈˈe i te hoê teˈa no te aro atu i te oire no Ierusalema (Isaia 37:33-36). E tupu atoa te hoê pauraa mai te reira te huru i nia i te totovaraa rahi e ravehia nei i to tatou nei tau no te patoi i te faufaa i fafauhia no te Basileia o Iehova e no te patoi i te “Arii no te hau”, no te mea tei ta ˈna Tamaiti hui arii ra te Atua, oia hoi tei ia Emanuela, e tei pihai iho atoa hoi oia i te feia atoa e farii popou nei ia ˈna.

Ia tia na tatou ma te itoito i te pae o te faatereraa rahi a Iehova

17. a) Eaha te ohipa ta te mau tia politita o te ao nei e fatata roa i te rave i nia ia Babulonia Rahi? E hinaaro ïa te nunaa o Iehova i te aha, e o te horoa-mau-hia mai hoi? b) Eaha ta te mau tia mana tiaturi ore i te Atua e rave ia oti o Babulonia Rahi i te haamouhia? E eaha ïa ta Iehova e rave i muri aˈe i te reira?

¹⁷ Fatata roa te mau tia politita i te fariu tia, eiaha noa i nia i te amuiraa faaroo kerisetiano, i nia atoa râ i te taatoaraa o Babulonia Rahi, te taatoaraa o te mau haapaoraa hape, no te haamou roa ia ˈna. I roto i teie nei tau hopea, mea hinaaro mau â na te nunaa o Iehova ia paruruhia oia e te Atua. Faaitoitohia na ta ratou upootiaraa rahi i nia ia Babulonia Rahi, e fariu tia ˈtu te mau faatere tiaturi ore i te Atua i nia i te feia i maiti i te faatereraa a te Atua e a te Mesia. I reira ïa, na roto i ta ˈna “Arii no te hau”, Iehova e aro mai ai i roto i “te tamaˈi o taua mahana rahi o te Atua Puai hope ra”. (Apokalupo 16:14.) E riro mau â o Iesu Mesia ei Faehau puai roa ˈˈe te riro hoi te faatereraa i te ore roa ˈtu e haaparuparu. E haapapu oia i reira e e “Atua puai” mau â oia i raro aˈe i te mana a te Atua puai hope ra o Iehova o te riro hoi te upootiaraa i te hanahana mau. Na te re i Aramagedo e puohu i te toroa o taua “Atua puai” ra, e e faaroo-noa-hia te pinainai o taua re ra e tae roa ˈtu i te hopea fenua ra. E farii te taatoaraa ia ˈna mai te hoê ohipa tei ore aˈenei i tupu e o te ore roa ˈtu e tupu faahou.

18. I mua i te totovaraa e ravehia ra i teie mahana no te patoi i te faufaa i fafauhia no te Basileia, ua ineine maitai te mau Ite no Iehova i te aha, e eaha ïa te ohipa e tupu mai?

¹⁸ No reira, e te mau Ite no Iehova e, ia rahi noâ to tatou roo i roto i te ao atoa nei! Ia tuu paatoa na tatou i to tatou tiaturiraa i nia i te Atua e ta ˈna Arii e faatere ra, te “Arii no te hau”. Ia ore na tatou e mǎtaˈu i mua i te totovaraa rahi roa ˈˈe a to te ao nei. Ia faaite na tatou i te mau vahi atoa i te parau o te Basileia e ta ˈna re e fatata roa mai nei, i nia i te feia totova i Aramagedo; e riro mau ïa tatou ei tapao e ei semeio no te hanahana o Iehova. Ia haafariu te Diabolo i te feia faatere o teie nei ao i nia ia tatou, ia haamanaˈo na tatou e na te mau taata haapao maitai te re, oia hoi na te feia i tia i te pae o te Basileia o Emanuela, te “Arii no te hau”, inaha, “tei ǒ tatou nei te Atua”. (Mataio 1:23; hiˈo Isaia 8:10.) Ia parau na te mau melahi atoa i roto i te raˈi e te mau taata viivii ore atoa i nia i te fenua nei e “Amene” no te faatitiaifaroraa i te mana hope o Iehova i nia i te mau mea atoa ta ˈna i poiete, to te raˈi e to te fenua nei, e ia vai noa te hau e a muri noa ˈtu e tia ˈi!

[Nota i raro i te api]

Ei haapoto-noa-raa

◻ No te aha Iesu Mesia e nehenehe ai e parauhia ˈi te “Atua puai”?

◻ Nafea to Iesu faatupuraa i to ˈna tiaraa “Aˈo [faahiahia mau]”?

◻ E tia ia tatou ia imi i te mana metua o vai? E tia ia tatou ia faarue i to vai?

◻ Eaha mau na te mau Hau amui?

◻ Eaha te tupu i nia i te totovaraa e ravehia nei i teie nei mahana no te patoi i te faufaa i fafauhia no te Basileia e te Tamaiti e faatere mai, te “Arii no te hau”?

[Hohoˈa i te api 16, 17]

E tahoê-mau-hia te ao atoa nei i roto i te haamoriraa hau a te Poiete o te ao taatoa nei.