Te mahana “mai te umu ra i te amaraa”
“Inaha hoi, te fatata maira te mahana mai te umu ra i te amaraa.”—MALAKI 4:1.
1. Eaha te mau uiraa e tupu mai ia au i te Malaki 4:1?
I TE roaraa o teie mau mahana hopea, e oaoa ïa te feia e ua maiti o Iehova i to ratou iˈoa no te papai atu i roto i ta ˈna buka manaˈoraa. Teie râ, eaha te roohia i te feia o tei patoi i teie haamaitairaa taa ê? Noa ˈtu e feia faatere aore ra e nunaa noa, nafeahia ïa ratou mai te peu e e faaino ratou i te feia poro o te Basileia o te Atua e ta ratou poroi? Te paraparau ra o Malaki no nia i te mahana titauraa i te utua. I te pene 4, irava 1, te taiohia ra e: “Inaha hoi, te fatata maira te mahana mai te umu ra i te amaraa; e te feia atoa i teoteo ra, e te feia atoa i rave i te parau ino ra, e riro ïa ei aihere ra; e ama ratou ia tae i taua mahana ra, te na reira maira Iehova sabaota ra; e ore e faatoehia te tumu e te amaa atoa ra.”
2. Eaha te faahohoˈaraa o te haavaraa a Iehova ta Ezekiela i horoa?
2 Te faaau atoa ra te tahi atu mau peropheta i te haavaraa a Iehova i nia i te mau nunaa i te veavea rahi o te hoê umu. Tano maitai te Ezekiela 22:19-22 no nia i te haavaraa a te Atua i nia i te mau pǔpǔ faaroo amahamaha a te amuiraa faaroo kerisetiano apotata! Te taiohia ra e: “Te na ô maira te Fatu ra o Iehova; No te mea ua riro atoa outou ei ota, e haaputuhia outou e au . . . Mai te taata e haaputu i te ario, e te veo, e te auri, e te tapau, e te bidila, i rotopu i te umu, a puhipuhi ai i te auahi i nia iho, ia tarapape ra; e na reira vau i te haaputu ia outou i tau riri nei, e ta ˈu nei tahooraa, e outou. Oia ïa, e haaputu vau ia outou, puhipuhi au i nia ia outou i te auahi ra i tau riri nei, e tarapape hoi outou i ropu. Mai te ario e tarapape i ropu i te umu ra, e tarapape atoa outou i ropu; e ite hoi outou e, na ˈu, na Iehova i ninii atu i tau riri i nia ia outou na.”
3, 4. (a) Eaha te poroi haavare ta te mau upoo faatere haapaoraa i parau? (b) Eaha te aamu haamâ mau no nia i te haapaoraa?
3 Auê ïa faahohoˈaraa puai mau! E tia i te mau upoo faatere haapaoraa o tei imi no te ape i te faaohiparaa i te iˈoa o Iehova, i te faaino-atoa-raa taua iˈoa moˈa ra, ia faaruru atu i te mahana titauraa i te utua. Ma te teoteo, te poroi nei ratou e e haamau ratou e to ratou mau hoa politita i te Basileia o te Atua i nia i te fenua nei, aore ra e faariro noa mai i te fenua ei vahi tano no te Basileia ia haere mai.
4 Ua apiti atu te amuiraa faaroo kerisetiano apotata e te mau faatere politita i roto i te mau tamaˈi riaria mau. Te faahaamanaˈo ra te aamu i te mau tau o te mau Aroraa Moˈa i te Anotau no Ropu ra, te mau tauiraa faaroo faahepohia e te Tiribuna haava hairesi paniora, te Toru ahuru matahiti tamaˈi-noa-raa o tei haamou ia Europa i te senekele 17 ra, e te Tamaˈi tivila paniora o te mau matahiti 1930 ra, ua arohia no te faatiamâ i te tiaraa o te haapaoraa katolika i te fenua Paniora. Ua tupu mai te faataheraa toto rahi roa ˈˈe i na tamaˈi rahi ra e piti o to tatou nei senekele, i to te mau katolika e te mau porotetani apitiraa ˈtu i roto i te taparahiraa ma te faataa ore i to ratou iho mau taata haamori aore ra o te tahi atu haapaoraa. Aita i maoro roa aˈenei, ua tupu te mau aroraa i rotopu i te mau katolika e te mau porotetani i Irelane, i rotopu i te mau pǔpǔ faaroo i te fenua Inidia, e i rotopu i te mau pǔpǔ faaroo i Yugoslavia tahito. Ua î atoa te mau api o te aamu o te mau haapaoraa i te toto na roto i te taparahiraahia te mau tausani Ite no Iehova haapao maitai.—Apokalupo 6:9, 10.
5. Eaha te haavaraa e tiai ra i te haapaoraa hape?
5 E nehenehe mau â tatou e oaoa i te fatataraa mai te haavaraa parau-tia a Iehova i nia ia Babulonia Rahi, te hau emepera o te haapaoraa hape na te ao nei, o ˈna e to ˈna mau taata turu. Te faataahia ra teie haamouraa i roto i te Apokalupo 18:21, 24: “Ua rave ihora te hoê melahi puai i te tahi ofai rahi mai te ofai mule te huru, e ua taora taue atura i raro i te tai, na ô aˈera, Mai te reira atoa te oire rahi ra o Babulonia i te huri-uˈana-hia i raro, e e ore roa e itea-faahou-hia ˈtu. E tei roto ia ˈna te toto o te mau peropheta e to te feia moˈa i te iteraahia, e to te feia atoa i taparahihia i teie nei ao.”
6. (a) O vai te mau amaa, e no te aha? (b) Eaha te tiaturiraa no te feia e mǎtaˈu ra ia Iehova?
6 I te area taime, “e riro ïa” te mau enemi atoa o te parau-tia, e to ratou feia apee, “ei aihere ra.” E ama te mahana o Iehova i rotopu ia ratou mai te umu ra. “E ore e faatoehia te tumu e te amaa atoa ra.” I taua mahana titauraa i te utua ra, e faatitiaifarohia te mau tamarii apî, aore ra te mau amaa, ia au i ta Iehova i faataa no to ratou mau tumu, to ratou mau metua, tei raro aˈe teie mau tamarii i ta ratou tiairaa. Eita roa te mau huaai o te mau metua iino e vai mai no te tamau i to ratou mau haerea iino. Te feia râ i faaohipa i te faaroo i roto i te mau parau tǎpǔ o te Basileia o te Atua e ore roa ïa e aueue. Te aˈo ra te Hebera 12:28, 29 e: “E tapea maite tatou i taua maitai ra, ia haamori tatou i te Atua ma te itehia mai, ma te haehaa, e te paieti. E auahi aamu hoi to tatou Atua.”
E Atua ino anei o Iehova?
7. Nafea te aroha o Iehova e ô ai i roto i ta ˈna haavaraa?
7 Te faaite ra anei te reira e e Atua ino, tahoo o Iehova? Aita roa ˈtu! I roto i te Ioane 1, 4:8, te haapapu ra te aposetolo i te hoê parau mau faufaa roa: “E aroha hoi te Atua.” I muri iho, i te irava 16 te haamatara ra oia i te parau, ma te na ô e: “E aroha te Atua; e o tei parahi i roto i te aroha ra te parahi ra ïa i roto i te Atua, e te parahi ra te Atua i roto ia ˈna ra.” No to ˈna aroha i te huitaata i opua ˈi Iehova i te tamâ i te ino atoa i nia i te fenua nei. Te parau ra to tatou Atua here, aroha e: “Te ora nei au ra, aore roa o ˈu e mauruururaa i te pohe o te taata ino ra; ia fariu mairâ te taata i ta ˈna parau ino ia ora: e fariu mai outou, e fariu mai outou, i ta outou mau parau ino ra; eaha hoi outou i hinaaro ai i te pohe?”—Ezekiela 33:11.
8. Mea nafea to Ioane haamatararaa i te aroha, e te faataaraahia oia iho mai te hoê tamarii a te patiri ra?
8 Mea faahiti pinepine aˈe o Ioane i te here a·gaʹpe, niuhia i nia i te mau faaueraa tumu, i na e toru taata papai i te mau Evanelia, i roto noa i te Mareko 3:17, te faataahia ra o Ioane iho mai te hoê “tamarii a te patiri ra.” E mea faauruahia mai teie tamarii a te patiri ra e Iehova no te papai i te mau poroi riaria o te buka hopea o te Bibilia, Apokalupo, o te faahohoˈa ia Iehova ei Atua o te faatupu i te parau-tia. Ua î hoi teie buka i te mau parau haavaraa, mai tei “te neneiraa rahi uaina ra o te riri o te Atua ra,” “na aˈua îî i te riri o te Atua,” e “te hoturaa rahi o te riri o te Atua Puai hope ra.”—Apokalupo 14:19; 16:1; 19:15.
9. Eaha te mau parau ta Iesu i faahiti no nia i te mau haavaraa a Iehova, e mea nafea ta ˈna mau parau tohu i te tupuraa?
9 Ua parau haere to tatou Fatu ra o Iesu Mesia, o “te huru mau oia o te Atua hiˈo-ore-hia ra,” i te mau haavaraa a Iehova a parahi noa mai ai oia i nia i te fenua. (Kolosa 1:15) Ei hiˈoraa, te vai ra e na hitu mau auê [ati] a te Mataio pene 23 o ta ˈna i parau atu i te mau tia haapaoraa haavare ra o to ˈna tau. Ua faaoti oia i ta ˈna haavaraa no te faautua na roto i teie mau parau: “A tae hoi oe, e Ierusalema e, e Ierusalema! o tei taparahi i te mau peropheta, e te pehi i te ofai i te feia i tonohia ˈtu ia oe na e, e rave rahi to ˈu haaputuraa i to tamarii, mai te moa e haaputu i to ˈna fanauˈa i raro aˈe i to ˈna pererau ra; aita râ i tia ia outou. Ei teie nei, to outou utuafare e tuuhia ˈi i te ano.” E toru ahuru ma hitu matahiti i muri iho, ua ravehia te haavaraa e te nuu tamaˈi Roma faaterehia e te Tenerara Titus. E mahana mǎtaˈu-mau-hia oia, faaiteraa o te faataa i te reira mai te mahana mǎtaˈu-roa ˈˈe-hia i roto i te oraraa taatoa o te taata nei—te mahana o Iehova, e fatata roa mai ra.
Te hiti ra “te Mahana”
10. Nafea “te Mahana parau-tia” ia faaoaoa i te nunaa o te Atua?
10 Ua faaite o Iehova iho e e ora mai te tahi mau taata i taua mahana ra. Ua faahiti oia no ratou i roto i te Malaki 4:2, ma te parau e: “O outou râ tei mǎtaˈu mai i to ˈu nei iˈoa, e hiti mai ïa te Mahana parau-tia ia outou ma te ora i raro aˈe i to ˈna pererau.” Taua mahana parau-tia ra aita ˈtu ïa maoti o Iesu Mesia iho. O ˈna “te maramarama o teie nei ao” i te pae varua. (Ioane 8:12) Nafea oia ia hiti mai? E fa mai oia ma te ora i raro aˈe i to ˈna pererau—na mua, te ora i te pae varua, o ta tatou e nehenehe e ite atoa i teie nei mahana, e i muri iho, i roto i te ao apî e haere mai ra, te faaoraraa i te mau maˈi o te mau taata no roto mai i te mau nunaa atoa. (Mataio 4:23; Apokalupo 22:1, 2) Ia au i te auraa taipe, mai ta Malaki i parau, “e haere hoi” te feia ora “i rapae, e e tupu outou mai te kafa faaamu o te fare ra” i ora noa mai ra. Auê ïa oaoaraa atoa e farereihia ia ite anaˈe i te tiaraa mai te feia pohe no te ora e tae roa ˈtu ai i te tia-roa-raa!
11, 12. (a) Eaha te faahopearaa i faataahia no te feia ino? (b) Nafea te nunaa a te Atua ia “tataahi i te feia ino”?
11 Teie râ, eaha ˈtura no te feia ino? Te taiohia ra i roto i te Malaki 4:3 e: “E na outou [e] taataahi i te taata ino ra; e riro ratou mai te repo i raro aˈe i to outou avae ia tae i te mahana na ˈu e faataa ra, te parau maira Iehova sabaota ra.” Ma te paruru i te feia e here ra ia ˈna, e tamâ to tatou Atua Aito i te fenua i taua mau enemi haavî ra, e haamou roa oia ia ratou. E tapeahia o Satani e ta ˈna mau demoni.—Salamo 145:20; Apokalupo 20:1-3.
12 Aita e tuhaa ta te nunaa o te Atua i roto i te haamouraa o te feia ino. Nafea ïa ratou ia “tataahi i te feia ino”? E rave ratou i te reira, ei faaauraa parau, na roto i te apitiraa ˈtu i roto i te hoê oroa no te upootiaraa rahi. Te faataa ra te Exodo 15:1-21 teie huru oroa. Ua tupu te reira i muri aˈe i te haamouraahia o Pharao e ta ˈna mau tavini i roto i te Miti Uteute. I roto i te tupuraa o te Isaia 25:3-9, ua apeehia te tâpû-ê-raahia “o tei mǎtaˈuhia ra” e te hoê oroa amuraa maa maitatai ra ia au i te parau tǎpǔ a te Atua: “E na ˈna e haamou roa i te pohe e a muri noa ˈtu; e na te Fatu ra, na Iehova, e horoi i te roimata i te mau mata atoa ra, e faaore hoi i te faaino i to ˈna taata i nia i te fenua atoa nei: o Iehova hoi teie e parau nei. Ia tae i taua mahana ra e parau ai ratou, Inaha, teie to tatou Atua; . . . o Iehova teie; ta tatou i tiai na; e oaoa tatou ma te ouˈauˈa i te ora na ˈna.” Aita roa e tahooraa aore ra e oaoaraa ino, e itehia i roto i taua oaoaraa ra, te arueraa râ i te iteraa i te iˈoa o Iehova ia raa e te mâraa o te fenua ei faaearaa no te hoê huitaata tahoê.
Te hoê porotarama haapiiraa rahi
13. Eaha te haapiiraa e ravehia i roto i te “fenua apî”?
13 I roto i te Malaki 4:4, ua faahepohia i te mau ati Iuda ia ‘haamanaˈo i te ture a Mose.’ No reira no tatou i teie mahana e tia ia tatou ia pee i “te ture a te Mesia ra,” mai tei faahitihia i roto i te Galatia 6:2. Eita e ore e faataahia no te feia e ora mai i Aramagedo te tahi mau faaueraa hau atu niuhia i nia i te reira, e e papaihia paha te reira i roto i “taua na buka ra” a te Apokalupo 20:12 o tei tatarahia i te taime o te faatia-faahou-raa. Auê ïa mahana rahi tera a haapii-noa-hia ˈi te feia i tia mai mai te pohe ia rave i te huru oraraa o te “fenua apî”!—Apokalupo 21:1.
14, 15. (a) Mea nafea te Elia o teie mahana i te faataaraahia? (b) Eaha te hopoia ta te pǔpǔ a Elia e faatupu ra?
14 E faarahiraa tera no te ohipa haapiiraa a Iehova, mai tei faaitehia i roto i te Malaki 4:5: “Inaha, e tono na vau i te peropheta ra ia Elia ia outou na, a tae atu ai i taua mahana rahi mǎtaˈu o Iehova ra.” O vai ïa taua Elia ra i teie mahana? Mai tei faaitehia i roto i te Mataio 16:27, 28, i te faahitiraa i to ˈna iho “taeraa mai i to ˈna ra basileia,” ua parau o Iesu e: “E tae mai hoi te Tamaiti a te taata ma tana ra mau melahi atoa, e te hanahana o to ˈna ra Metua, ei reira oia e faautua mai ai i te taata atoa ia au i ta ˈna ra ohipa.” E ono mahana i muri iho, i nia i te mouˈa e o Petero, Iakobo, e o Ioane, “huru ê atura oia i mua ia ratou, anaana ˈtura tana mata mai te mahana ra, e teatea ˈtura to ˈna ahu mai te maramarama ra.” O ˈna anaˈe anei teie e itehia ra i roto i taua orama ra? Eita, “e inaha, ua fa maira Mose raua o Elia i reira ia ratou ra i te paraparauraa mai ia ˈna.”—Mataio 17:2, 3.
15 Eaha ra ïa te auraa o te reira? Te faataahia ra o Iesu mai te Mose Rahi i te taime o to ˈna taeraa mai no te haava. (Deuteronomi 18:18, 19; Ohipa 3:19-23) E apitihia o ˈna e te Elia o teie mahana no te rave i te hoê ohipa faufaa, i te poro-haere-raa i teie parau apî maitai o te Basileia i nia i te fenua atoa nei hou a tairi mai ai te mahana rahi mǎtaˈuhia o Iehova. Ma te faataa i teie ohipa a “Elia,” te faataa ra te Malaki 4:6 e: “Ia faafariu oia i te aau o te mau metua e te tamarii, e te aau o te tamarii e to ratou mau metua, o te haere mai hoi au, e o te tairi i te fenua nei i te ino.” No reira teie “Elia” o te pǔpǔ ïa o te tavini haapao maitai e te paari o te mau kerisetiano faatavaihia i nia i te fenua nei, o ta te Fatu, o Iesu, i tufa ˈtu i Ta ˈna mau faufaa. Oia atoa te horoaraa i te utuafare faaroo te “maa” varua hinaarohia “i te hora mau ra.”—Mataio 24:45, 46.
16. Eaha te mau faahopearaa oaoa i faatupuhia na roto i te ohipa o te pǔpǔ a Elia?
16 I teie mahana na te ao atoa nei, e nehenehe tatou e ite i te mau faahopearaa maitatai o teie porotarama faaamuraa. Te faaamu ra te Pare Tiairaa, e te mau 16 100 000 vea neneihia no te mau numera tataitahi i roto e 120 reo, 97 o teie mau reo o te nenei-tamau-hia, i te fenua i ‘teie parau apî maitai o te basileia.’ (Mataio 24:14) Te faaohipahia nei te tahi atu mau buka i roto e rave rahi reo i roto e rave rau tuhaa o te ohipa pororaa e haapiiraa a te mau Ite no Iehova. Te tamau noa nei te pǔpǔ o Elia, te tavini haapao maitai e te paari, i te horoa rahi i te feia atoa ‘tei ite i to ratou mau hinaaro i te pae varua.’ (Mataio 5:3) Hau atu, te feia e farii ra i te tiaturiraa a teie Basileia e o te ohipa ia au i te reira e arataihia ïa ratou i roto i te hoê tahoêraa nehenehe na te ao atoa nei. Te faatupuhia ra te reira e te “feia rahi roa, e ore roa e pau ia taio, no te mau fenua atoa, e te mau opu atoa, e te mau nunaa atoa, e te mau reo atoa.” (Apokalupo 7:9) Ia oti teie ohipa mai ta Iehova i titau, i reira e tae mai ai te hopea i roto i ta ˈna mahana rahi mǎtaˈuhia.
17. Afea te mahana mǎtaˈuhia o Iehova e fa mai ai?
17 Afea râ taua mahana mǎtaˈuhia ra e topa mai ai i nia ia tatou? Te pahono ra te aposetolo Paulo e: “Te haere maira taua mahana o [Iehova] ra, mai te haerea mai o te eiâ i te po ra. E parau hoi te taata e [na roto paha i te hoê noa huru], E hau, e aita e ino, ei reira ra ratou e roohia-noa-hia mai ai e te pohe oioi, mai te vahine hapu ia roohia i te mauiui ra, e e ore roa ratou e ora.”—Tesalonia 1, 5:2, 3.
18, 19. (a) Nafea te parau “e hau, e aita e ino” ia faahitihia? (b) Afea te nunaa o Iehova e ite ai i te ora?
18 O vai ma “ratou” i faahitihia i roto i teie parau tohu? O te mau faatere politita ïa o te faahua parau nei e e nehenehe ratou e patu i te hoê faanahonahoraa apî e te tahoê taa ê roa ˈtu i te mau tuhaa amahamaha o teie nei ao haavî. Aita ta ratou mau faanahonahoraa rarahi, te Totaiete o te mau Nunaa e te mau Nunaa Amui, i manuïa no te faatupu i te reira. Mai ta te peropheta o Iehova i tohu, te parau atoa nei ratou i teie nei e “Ei hau, ei hau; e aita roa ˈtu hoi e hau.”—Ieremia 6:14; 8:11; 14:13-16.
19 I taua area taime ra, e tia i te nunaa o Iehova ia faaruru i te mau haavîraa e te mau hamani-ino-raa a teie nei ao atua ore. Fatata râ ratou i te ite, mai tei faaitehia i roto i te Tesalonia 2, 1:7, 8, i te ora “ia fa mai te Fatu ra o Iesu mai te raˈi mai, ma tana mau melahi mana atoa ra, ma te auahi ura ra, i te tuuraa mai i te pohe i te feia aore i ite i te Atua, e tei ore i faaroo i te evanelia o to tatou Fatu o Iesu Mesia ra.”
20. (a) Eaha ta Zephania e Habakuka i tohu no nia i te mahana “mai te umu ra i te amaraa”? (b) Eaha te aˈoraa e te faaitoitoraa ta teie mau parau tohu e horoa ra?
20 Afea mau na te reira e tupu ai? Ua tiai maoro e rave rahi o tatou. I roto i taua area taime ra, e rave rahi taata haehaa o te ora mai no te pahono i te pii a Zephania 2:2, 3: “E imi ia Iehova . . . e imi i te parau-tia, e imi i te haehaa: peneiaˈe outou o te faatapunihia ia tae i te mahana e riri ai Iehova ra.” I muri iho, teie te faaueraa a Zephania 3:8: “E tiai mai na râ ia ˈu, te na reira maira Iehova, e ia tae i te mahana e tia ˈi au i nia e rave i ta ˈu i noaa ra; teie hoi ta ˈu parau, e haaputu i te mau fenua, e amui mai i te mau basileia, ia ninii atu vau i ta ˈu nei tahoo i nia ia ratou, i te uˈana atoa o to ˈu nei riri: e pau roa hoi te mau fenua i te auahi ra i to ˈu nei hae.” Te piri ra te hopea! Ua ite Iehova i te mahana e te hora e eita o ˈna e taui i ta ˈna kalena. Ia faaruru anaˈe tatou ma te faaoromai. “No te taime i haapaohia ra taua orama nei, ia tae râ i te hopea ra e faaite papu mai ai e ore e haavare: e ia maoro iti noâ, e tiai atu â; e tae mau mai ïa, e ore e haamaoro hua.” (Habakuka 2:3) Te piri noa mai ra te mahana rahi mǎtaˈuhia o Iehova. Ia haamanaˈo e, e ore taua mahana ra e haamaoro hua!
Ei faahaamanaˈoraa:
◻ Nafeahia te feia faatere e te nunaa i te mahana mǎtaˈuhia o Iehova?
◻ Eaha te huru o te Atua ra o Iehova?
◻ Eaha te huru haapiiraa o te faataahia ra no te nunaa a te Atua?
◻ Mea nafea te mau peropheta a te Atua i te aˈoraa ia tatou no nia i te piri-roa-raa mai o te hopea?
[Hohoˈa i te api 21]
I te roaraa o te Tiribuna haava hairesi paniora ua faahepohia e rave rahi ia taui i ta ratou haapaoraa no te rave i te haapaoraa katolika
[Faaiteraa i te tumu]
The Complete Encyclopedia of Illustration/J. G. Heck