Tupuraa ta Isaia parau tohu

I te taaraa ia Iesu e te opua ra te mau Pharisea e te pǔpǔ a Heroda e haapohe ia ˈna, hoˈi atura oia e ta ˈna mau pǐpǐ i te miti o Galilea. Ruru maira te hoê nahoa rahi no te mau vahi atoa, no Galilea, no Turia e Sidona i te hiti o te miti rahi, no te pae hitia o te râ o te anavai Ioridana, no Ierusalema e no Idumea i te pae apatoa ˈtu. Faaora ihora Iesu e rave rahi maˈi. Piri roa maira te feia e maˈi ino to ratou no te tapea ia ˈna. Aita ratou i tiai e na Iesu e tapea ia ratou.—Mareko 3:9, 10.

No te rahi o te nahoa, parau atura Iesu i ta ˈna mau pǐpǐ ia faaineine i te hoê poti ia faaatea ˈtu oia i tai ia piri roa mai te nahoa ia ˈna. E nehenehe atoa ta ˈna e haapii ia ratou mai nia mai i te poti, aore ra e haere i te tahi atu vahi na tatahi no te tauturu i te taata e rave rahi.

Ua tapao te pǐpǐ ra o Mataio e ua “tupu hoi ta te peropheta Isaia i parau” na roto i ta Iesu taviniraa. (Mataio 12:17) Teihea hoi parau tohu ta Iesu e faatupu ra?

“Teie ta ˈu tavini ta ˈu i maiti, mea here na ˈu ia ˈna e ua mauruuru roa vau ia ˈna! E tuu vau i to ˈu varua i nia ia ˈna, e na ˈna e faataa i te feia o te mau nunaa ěê eaha te parau-tia. E ore oia e tatamaˈi, e ore e tutuô, e ore atoa te taata e faaroo i to ˈna reo na te mau purumu rahi. E ore oia e taataahi i te aeho paruparu, e ore atoa e tupohe i te uiti e ama rii noa ra e ia faatupu roa oia i te parau-tia. Oia mau, na roto i to ˈna iˈoa e tiai ai te mau nunaa i te mea maitai.”—Mataio 12:18-21; Isaia 42:1-4.

O Iesu iho â te tavini herehia e te fariihia e te Atua. Ua faaite maitai oia eaha te parau-tia mau, tei haafaufaa-ore-hia i te mau tutuu faaroo haavare. Na roto i ta ratou iho faaohiparaa tano ore i te ture a te Atua ia Mose, eita te mau Pharisea e tauturu aˈe i te hoê taata maˈi i te Sabati! Ma te faaite maitai i te parau-tia a te Atua, e tei nia atoa ia ˈna te varua o te Atua, ua faatiamâ Iesu i te taata i te mau tutuu tano ore teimaha. Te tumu ïa te mau aratai haapaoraa i hinaaro ai e haapohe ia ˈna. Tera te ino mau!

Eaha te auraa “e ore oia e tatamaˈi, e ore e tutuô, e ore atoa te taata e faaroo i to ˈna reo na te mau purumu rahi”? Ia ˈna i faaora i te maˈi o te taata e i tiavaru i te mau demoni, ua faaue atu Iesu “eiaha e faaite o vai oia.” (Mareko 3:12) Aita oia i hinaaro ia faaroo te taata i ta ˈna i rave na roto i te tutuôraa na te mau purumu rahi, aore ra i te mau parau tavirihia o tei haapurarahia.

Ua hopoi atoa Iesu i ta ˈna poroi tamahanahana i te feia e au i te aeho paruparu, fefe e tei taataahihia. E au atoa ratou i te uiti e ama rii noa ra a pohe atu ai. Eita Iesu e taataahi i te aeho paruparu e e tupohe i te uiti e haere pohe ra. Na roto râ i te mǎrû e te here, e nehenehe ta ˈna e faatia mai i tei paruparu. Papu maitai, o Iesu ta te mau nunaa e nehenehe e tiaturi!