No te aha e parauhia ˈi e “hoo no te taata e rave rahi” te tusia taraehara o Iesu?

Te pahonoraa a te Bibilia

E ravea te tusia taraehara o Iesu no ô mai ia Iehova ra, no te faatiamâ aore ra faaora i te huitaata i te hara e te pohe. Ua faaau te Bibilia i te toto o Iesu ei “hoo”. (Ephesia 1:7; Petero 1, 1:18, 19) Ua parau Iesu, ua haere mai o ˈna “no te horoa i to ˈna ora ei hoo no te taata e rave rahi.”—Mataio 20:28.

No te aha mea titauhia te “hoo no te taata e rave rahi?”

Ua poietehia o Adamu, te taata matamua, ei taata tia roa, aita ta ˈna e hara. Ua nehenehe o ˈna e ora e a muri noa ˈtu, ua ere râ oia i to ˈna faaroo-ore-raa i te Atua. (Genese 3:17-19) A tamariihia ˈi o ˈna, ua raea-atoa-hia ˈtura ratou i te hara. (Roma 5:12) No reira, ua parau te Bibilia e, ua “hoo” Adamu ia ˈna iho e ta ˈna tamarii ei “tîtî” na te hara e te pohe. (Roma 7:14) Ei taata tia ore, aita hoê noa ˈˈe o ratou e nehenehe e hoo faahou mai i te mea ta Adamu i ere.—Salamo 49:7, 8.

Ua aroha te Atua i te huaai a Adamu no teie tupuraa mauiui mau. (Ioane 3:16) Tera râ, eita Iehova e faaore i te hara aita anaˈe e tumu papu. (Salamo 89:14; Roma 3:23-26) No to ˈna here i te huitaata, ua horoa te Atua i te ravea papu no te faaore roa i ta ratou hara, o te hoo ïa. (Roma 5:6-8)

Eaha mau na te parau o te “hoo”?

I roto i te Bibilia, e toru auraa faufaa o te taˈo “hoo”:

1. E aufauraa.—Numera 3:46, 47.

2. Te faatiamâraa.—Exodo 21:30.

3. Aufau i te mau haamâuˈaraa no te tataî i te tahi mea o tei tuinohia.a

E hio anaˈe mea nafea teie mau taˈo e tano ai i nia i te tusia taraehara o Iesu Mesia.

1. Te aufauraa. Te parau ra te Bibilia e, ua “hoohia mai” te mau Kerisetiano “i te hoê hoo.” (Korinetia 1, 6:20; 7:23) Maoti te toto o Iesu, ua hoo mai o ˈna i te taata “no te Atua no te mau opu e reo e nunaa atoa.”—Apokalupo 5:8, 9.

2. Te faatiamâraa. Maoti te tusia taraehara o Iesu i “tiamâ ˈi tatou” i te hara.—Korinetia 1, 1:30; Kolosa 1:14; Hebera 9:15.

3. Te aufauraa i te mau haamâuˈaraa no te tataî i te tahi mea o tei tuinohia. Ua tuea maitai te tusia taraehara o Iesu i ta Adamu i ere, oia hoi ei taata tia roa. (Korinetia 1, 15:21, 22, 45, 46) Te parau ra te Bibilia: “E mea na roto hoi i te faaroo ore o te taata hoê ra i faarirohia ˈi e rave rahi ei feia hara, oia atoa mea na roto i te faaroo o te taata hoê ra e faarirohia ˈi e rave rahi ei taata parau-tia.” (Roma 5:19). Te faataa ra teie irava mea nafea te pohe o te hoê noa taata e nehenehe e aufau no e rave rahi taata hara. Te auraa ïa e “hoo aifaito” te tusia taraehara o Iesu no te taata e hinaaro e fanaˈo atu.—Timoteo 1, 2:5, 6.