2. Eaha te mau haamaitairaa ta Iehova e pûpû na to ˈna mau Ite bapetizohia?

Ia bapetizohia oe, e riro mai oe ei mero o te utuafare oaoa o Iehova. E ite oe to ˈna here no oe na roto e rave rau tupuraa, e e faafatata ˈtu â oe ia ˈna hau atu i teie mahana. (A taio i te Malaki 3:16-18.) Taa ê atu i te faariroraa ia Iehova mai to oe Metua, e fanaˈo oe i te hoê utuafare fetii taeae pae varua na te ao nei o te here ra ia Iehova e ia oe. (A taio i te Mareko 10:29, 30.) Parau mau, e titauhia ia oe ia rave i te tahi mau faaotiraa hou oe a bapetizohia ˈi. E titauhia ia oe ia haapii no nia ia Iehova, ia here ia ˈna e ia faatupu i te faaroo i roto i ta ˈna Tamaiti. I te pae hopea e titauhia ia oe ia pûpû i to oe ora no Iehova. Mai te peu e rave oe i teie mau faaotiraa e ia bapetizohia oe, e fanaˈo oe i te hoê oraraa oaoa e a muri noa ˈtu. Te na ô ra te Parau a te Atua: “Te bapetizoraa o te faaora atoa ia [oe].”—Petero 1, 3:21.

Ua ite maitai Iesu eita to tatou utuafare e farii i ta tatou faaotiraa e tavini ia Iehova. A taio i te Mataio 10:34-36, e a aparau i teie uiraa:

• Eaha te tupu ia faaoti te hoê mero o te utuafare e tavini ia Iehova?

VIDEO: Ua farii Iehova ia mâua i roto i to ˈna utuafare (5:13)

• Eaha ta oe e rave ia tapea te utuafare aore ra te hoê hoa ia oe ia tavini ia Iehova?

A taio i te Salamo 27:10 e te Mareko 10:29, 30. Ia oti te mau irava i te taiohia, a aparau i teie uiraa:

• E nafea teie parau fafau e tauturu ai ia oe ia faaruru i te patoiraa a te utuafare aore ra a te mau hoa?