2. Eaha tei tupu na te ao nei e te huru o te mau taata mai 1914 mai?

Ua ani te mau pǐpǐ a Iesu ia ˈna: “Eaha te tapao o te tau o to oe hoˈiraa mai e to te anotau hopea o te ao nei?” (Mataio 24:3) I roto i ta Iesu pahonoraa, ua tohu oia e rave rahi ohipa o te tupu ia faatere oia ei Arii o te Faatereraa arii a te Atua i te raˈi. Teie te tahi o teie mau tupuraa: te tamaˈi, te oˈe e te aueueraa fenua. (A taio i te Mataio 24:7.) Ua tohu atoa te Bibilia no te huru o te mau taata i “te mau mahana hopea,” mea “fifi ia faaruru.” (Timoteo 2, 3:1-5) Ua ite-papu-hia teie mau tupuraa e te huru o te mau taata mai 1914 mai.

3. No te aha ua ino roa te ao a haamata ˈi te Faatereraa arii a te Atua i te faatere?

I muri iti noa ˈˈe i to Iesu riroraa mai ei Arii o te Faatereraa arii a te Atua, ua aro oia ia Satani e te mau demoni i te raˈi, e ua pau Satani i teie aroraa. Te parau ra te Bibilia no Satani, “ua hurihia mai . . . i raro i te fenua, e ua hurihia mai ta ˈna mau melahi i raro na muri ia ˈna.” (Apokalupo 12:9, 10, 12) E riri rahi to Satani no te mea ua ite oia e haamouhia oia. No reira oia e faatupu ai i te oto e te mauiui ati aˈe te ao. E ere i te mea maere ia itehia te mau tupuraa ino mau na te ao nei. E faatitiaifaro râ te Faatereraa arii a te Atua i te taatoaraa o teie mau tupuraa ino mau.