I TO Iesu haere-tia-raa ˈtu i te pae fenua no Kaisarea Philipi ra, ua faafaaea ihora oia i te hoê taime e ua haapii atura i te nahoa taata e i ta ˈna mau aposetolo atoa. Ua faaite atura oia ia ratou i te hoê parau maere: “Oia mau teie ta ˈu e parau atu ia outou nei, O te tahi pae i teie nei feia e tia mai nei, e ore ïa e ite i te pohe, e ite ai ratou i te Tamaiti a te taata i te taeraa mai i to ˈna ra basileia.”

‘Eaha ra te auraa o teie mau parau a Iesu?’ o ta te mau pǐpǐ ïa i uiui noa. E hebedoma aˈera, ua aratai atura Iesu ia Petero, ia Iakobo e ia Ioane i nia i te hoê mouˈa teitei. Ua po paha, no te mea te hinaaro ra te mau pǐpǐ e taoto. Te pure ra Iesu, e huru ê atura oia i mua ia ratou. Anaana roa ˈtura to ˈna mata mai te mahana ra, e teatea ˈtura to ˈna ahu mai te maramarama ra.

Auê ïa orama o tei faaitoito hua ia Iesu e i ta ˈna mau pǐpǐ atoa! Ua riro taua orama ra mai te hoê hiˈoraa no a muri aˈe no nia i te hanahana o te Mesia i roto i to ˈna ra Basileia. Oia nei, ua ite aˈera te mau pǐpǐ i “te Tamaiti a te taata i te taeraa mai i to ˈna ra basileia,” o ta Iesu mau ïa i tǎpǔ atu ia ratou hoê hebedoma na mua ˈˈe. I muri aˈe i te poheraa o Iesu, ua papai ihora o Petero e ua ‘ite hua râ to ratou mata i te hanahana o te Mesia, oia e o ratou atoa i nia i te mouˈa moˈa ra’.