“Aita roa e taata i paraparau aˈenei mai tera”

1, 2. (1) No te aha te mau tiai i tonohia e haru ia Iesu i hoˈi ai o ratou anaˈe? (2) No te aha e orometua haapii faahiahia ˈi o Iesu?

UA RIRI roa te mau Pharisea. Tei roto Iesu i te hiero, te haapii ra i te taata no nia i to ˈna Metua. Te mârô ra te feia e faaroo ra, mea rahi te tiaturi ia Iesu, area te tahi atu râ, e hinaaro ïa e haru ia ˈna. No te vî ore o to ratou riri, e tono te mau aratai haapaoraa i te mau tiai e haru ia Iesu. E hoˈi atu râ te mau tiai o ratou anaˈe. E ui te mau tahuˈa tiaau e te mau Pharisea: “No te aha outou i ore ai i aratai mai ia ˈna?” E pahono te mau tiai e: “Aita roa e taata i paraparau aˈenei mai tera.” No to ratou maere rahi i ta Iesu haapiiraa, aita i tia ia ratou ia haru ia ˈna.a—Ioane 7:45, 46.