-
Eaha te auraa ia vai amui ore noa?Ia ora oe e a muri noa ˈtu! (Aparauraa Bibilia)
-
-
HAAPIIRAA 45
Eaha te auraa ia vai amui ore noa?
Ua haapii Iesu i ta ˈna mau pǐpǐ e ere ratou “no teie nei ao.” (Ioane 15:19) E ô mai ïa te vai-amui-ore-raa, te auraa eiaha e faaô i roto i te mau ohipa poritita e te mau tamaˈi. E ere i te mea ohie ia vai amui ore noa. E faaooo paha te taata ia tatou no te mea e vai amui ore noa tatou. E nafea tatou e vai amui ore noa ˈi e e tapea ˈi i to tatou taiva ore i te Atua ra o Iehova?
1. Eaha te manaˈo o te mau Kerisetiano mau no nia i te faatereraa a te taata?
E faatura te mau Kerisetiano i te mana faatere. E pee tatou i ta Iesu i parau ia “faahoˈi i ta Kaisara ia Kaisara ra,” oia hoi e auraro tatou i te mau ture o te fenua, mai te aufauraa i ta tatou mau tute. (Mareko 12:17) Te haapii ra te Bibilia, te faatere ra te faatereraa a te taata no te mea noa te faatia ra Iehova ia ratou ia faatere. (Roma 13:1) Ua papu ïa ia tatou e otia to te mana o te feia faatere. E ua ite tatou na to tatou Atua e ta ˈna Faatereraa arii i te raˈi e faatitiaifaro i te mau fifi atoa.
2. E nafea tatou e tapea ˈi i to tatou tiaraa amui ore?
Mai ia Iesu, eita tatou e faaô i roto i te mau ohipa poritita. I to te taata iteraa i te hoê o ta Iesu mau semeio ua tamata ratou i te faariro ia ˈna ei arii no te fenua, aita râ oia i vaiiho i te reira ia tupu. (Ioane 6:15) No te aha? No te mea mai ta Iesu i parau: “E ere ta ˈu Faatereraa arii no teie nei ao.” (Ioane 18:36) Ei pǐpǐ no Iesu, e faaite tatou i to tatou tiaraa amui ore i roto e rave rau tuhaa. Ei hiˈoraa, eita tatou e haere i te tamaˈi. (A taio i te Mika 4:3.) E faatura tatou i te mau taipe nunaa rau, mai te mau reva, aita râ tatou e haamori ra i te reira. (Ioane 1, 5:21) E eita tatou e turu i te hoê pǔpǔ poritita aore ra te hoê tia poritita. I roto i teie mau tupuraa e te tahi atu, e faaite papu tatou i to tatou taiva ore i te Faatereraa arii a te Atua.
A FAAHOHONU ATU Â
A hiˈopoa i te mau tupuraa o te tamata i to tatou tiaraa amui ore, e a hiˈo e nafea tatou e nehenehe ai e rave i te mau faaotiraa o te faaoaoa ia Iehova.
3. E tiaraa amui ore to te mau Kerisetiano mau
Ua vaiiho mai Iesu e ta ˈna mau pǐpǐ i te hoê hiˈoraa no tatou. A taio i te Roma 13:1, 5-7 e te Petero 1, 2:13, 14. E a pata i te VIDEO, e a aparau i te mau uiraa i muri nei.
No te aha e titauhia ia tatou ia faatura i te mau faatereraa a te taata?
I roto i teihea mau tupuraa e faaite ai tatou e te auraro ra tatou ia ratou?
I te mau tau tamaˈi, ua parau te tahi mau nunaa e vai amui ore noa ratou, ua apiti râ ratou i roto i te tamaˈi. Eaha mau ïa te vai-amui-ore-raa? A taio i te Ioane 17:16. E a pata i te VIDEO e a aparau i te uiraa i muri nei.
Eaha te auraa ia vai amui ore noa?
E ia ani anaˈe te hoê mana faatere ia rave i te hoê ohipa o te ofati ra i te ture a te Atua? A taio i te Ohipa 5:28, 29. E a pata i te VIDEO e a aparau i te mau uiraa i muri nei.
Mai te peu e haafifiraa i rotopu i te ture a te taata e te ture a te Atua, ta vai ture ta tatou e auraro?
E nehenehe anei ta oe e feruri i te tahi mau tupuraa i reira te mau Kerisetiano e ore ai e auraro i te mau faatereraa a te taata?
4. A vai amui ore noa i te pae feruriraa e ohipa
A taio i te Ioane 1, 5:21. E a pata i te VIDEO e a aparau i te mau uiraa i muri nei.
I roto i te video, no te aha Ayenge i faaoti ai eiaha e apiti i te tahi pǔpǔ poritita aore ra e amui i te tahi mau oroa here aiˈa, mai te faahanahanaraa i te reva?
No oe, e faaotiraa maitai anei ta ˈna i rave?
Eaha te tahi mau tupuraa o te tamata i to tatou vai-amui-ore-raa? A pata i te VIDEO, e a aparau i te mau uiraa i muri nei.
E nafea tatou e tapea ˈi i to tatou tiaraa amui ore ia tupu anaˈe te mau tataˈuraa tuaro nunaa rau?
E nafea tatou e tapea ˈi i to tatou tiaraa amui ore noa ˈtu e haafifi te tahi mau faaotiraa a te mau poritita ia tatou?
E nafea te mau ravea haaparareraa parau aore ra te mau taata ta tatou e amui ra e haafifi ai i to tatou tiaraa amui ore?
I roto i teihea mau tupuraa e titauhia ˈi te Kerisetiano ia vai amui ore noa i te pae feruriraa e ohipa?
E ANI PAHA VETAHI: “No te aha oe e ore ai e faahanahana i te reva aore ra e himene i te himene aiˈa?”
Eaha ta oe e pahono?
HAAPOTORAA
E haa rahi te mau Kerisetiano no te vai amui ore noa i roto i te ohipa poritita i te pae feruriraa, parau e ohipa.
Haamanaˈoraa
Eaha te titauhia ia tatou ia rave no te mau faatereraa a te taata?
No te aha tatou e tapea ˈi i to tatou tiaraa amui ore i te pae poritita?
Eaha te mau tupuraa o te tamata i to tatou tiaraa amui ore?
HIˈOPOA
Eaha te mau haapaeraa e titauhia ia tatou ia rave no te tapea i to tatou tiaraa amui ore?
Eaha ta te mau utuafare e rave no te faaineine ia ratou ia tamatahia to ratou tiaraa amui ore?
No te aha e ere te patururaa i to ˈna fenua i te hoê hanahana taa ê ta te hoê taata e nehenehe e fanaˈo?
A feruri nafea tatou e faaite ai e ere tatou “no teie nei ao” ia rave tatou i te tahi mau faaotiraa no nia i ta tatou ohipa.
“Ta te taata nei hopoia ei nia ïa ia ˈna iho” (Te Pare Tiairaa 1 no Eperera 2006)
-
-
E nehenehe oe e faaruru i te hamani-ino-raaIa ora oe e a muri noa ˈtu! (Aparauraa Bibilia)
-
-
I teie nei aore ra i muri aˈe, e faaruru iho â te mau Kerisetiano i te patoiraa e oia atoa i te hamani-ino-raa. E haapeapea anei te reira ia tatou?
1. No te aha e faaruru ai tatou i te hamani-ino-raa?
Te haapapu ra te Bibilia: “Te feia atoa e hinaaro e haamori i te Atua anaˈe ma te hoê e te Mesia ra o Iesu, e hamani-ino-atoa-hia ïa.” (Timoteo 2, 3:12) Ua hamani-ino-hia o Iesu no te mea e ere o ˈna no teie nei ao. E ere atoa tatou no teie nei ao, eita ïa tatou e maere ia hamani-ino-hia tatou e te mau faatereraa a te taata e te mau faaroo.—Ioane 15:18, 19.
2. Nafea ia faaineine ia tatou i mua i te hamani-ino-raa?
E hinaaro tatou e haapuai i to tatou tiaturiraa ia Iehova i teie nei. A rave i te taime i te mau mahana atoa no te pure ia ˈna e no te taio i te hoê tuhaa o ta ˈna Parau. A tamau i te apiti i te mau putuputuraa a te amuiraa. E horoa mai te reira i te puai ta tatou e hinaaro no te faaruru i te hamani-ino-raa ma te itoito, noa ˈtu no roto mai te reira i te mau mero o te utuafare. Ua papai te aposetolo Paulo tei hamani-ino-hia e rave rahi taime: “O Iehova to ˈu tauturu. E ore au e mǎtaˈu.”—Hebera 13:6.
E nehenehe te poro-tamau-raa e tauturu ia tatou ia rahi atu â to tatou itoito. E haapii mai te pororaa ia tiaturi ia Iehova e ia ore ia mǎtaˈu i mua i te taata. (Maseli 29:25) Ia faatupu tatou i te itoito no te poro i teie nei, e faaineine te reira ia tatou ia tamau i te poro noa ˈtu e opani te mau faatereraa i ta tatou ohipa.—Tesalonia 1, 2:2.
3. E nafea tatou e faufaahia ˈi ia faaruru i te hamani-ino-raa?
Mea papu, eita tatou e oaoa ia hamani-ino-hia mai, ia manuïa râ tatou i mua i te hamani-ino-raa e puai mai to tatou faaroo. E piri atu â tatou ia Iehova no te mea ua faaohipa tatou i ta ˈna tauturu a manaˈo ai tatou aita e ravea faahou. (A taio i te Iakobo 1:2-4.) E oto Iehova ia ite o ˈna e te mauiui ra tatou, e oaoa râ o ˈna ia ite e te faaoromai ra tatou. Te parau ra te Bibilia: “Ia faaoromai noa outou i te mauiui, no te mea te rave ra outou i te maitai, e mauruuru mai ïa te Atua.” (Petero 1, 2:20) Te haamaitairaa ta Iehova i horoa i te feia atoa tei faaoromai tamau ma te taiva ore, o te ora mure ore i roto i te hoê ao ua monohia te patoiraa i te haamoriraa mau.—Mataio 24:13.
A FAAHOHONU ATU Â
A haamanaˈo no te aha e nehenehe e e haamaitairaa ia tapea i te taiva ore ia Iehova noa ˈtu te hamani-ino-raa.
4. E nehenehe oe e faaruru i te patoiraa a te utuafare
Ua ite maitai Iesu eita to tatou utuafare e farii i ta tatou faaotiraa e tavini ia Iehova. A taio i te Mataio 10:34-36, e a aparau i teie uiraa:
Eaha te tupu ia faaoti te hoê mero o te utuafare e tavini ia Iehova?
No te ite i te hoê hiˈoraa, a pata i te VIDEO, e a aparau i te uiraa i muri nei.
Eaha ta oe e rave ia tapea te utuafare aore ra te hoê hoa ia oe ia tavini ia Iehova?
A taio i te Salamo 27:10 e te Mareko 10:29, 30. Ia oti te mau irava i te taiohia, a aparau i teie uiraa:
E nafea teie parau fafau e tauturu ai ia oe ia faaruru i te patoiraa a te utuafare aore ra a te mau hoa?
5. A tamau i te tavini ia Iehova noa ˈtu te hamani-ino-raa
Titauhia te itoito no te tavini ia Iehova ia tamata vetahi i te tapea ia tatou ia na reira. A pata i te VIDEO, e a aparau i te uiraa i muri nei.
Eaha te mau hiˈoraa i roto i teie video tei haapuai ia oe?
A taio i te Ohipa 5:27-29 e te Hebera 10:24, 25. Ia oti te mau irava i te taiohia, a aparau i teie uiraa:
No te aha mea faufaa ia tamau i te tavini ia Iehova noa ˈtu ua tapeahia ta tatou ohipa pororaa aore ra te mau putuputuraa?
6. E tauturu mai Iehova ia tatou ia faaoromai
Te tamau nei te mau Ite no Iehova, te feia paari e te feia apî na te ao nei i te tavini ia Iehova ma te taiva ore noa ˈtu e hamani-ino-hia ratou. No te ite eaha tei tauturu ia ratou, a pata i te VIDEO. E a aparau i te uiraa i muri nei.
I roto i te video, eaha tei tauturu i teie mau Ite ia faaruru?
A taio i te Roma 8:35, 37-39 e te Philipi 4:13. Ia oti te mau irava i te taiohia, a aparau i teie uiraa:
Nafea teie mau irava e haapapu ai e nehenehe oe e faaruru i te mau tamataraa atoa?
A taio i te Mataio 5:10-12, e a aparau i teie uiraa:
No te aha oe e oaoa ˈi noa ˈtu te hamani-ino-raa?
E mirioni tavini a Iehova tei manuïa i mua i te patoiraa. E nehenehe atoa oe e na reira!
TE MANAˈO O VETAHI: “Eita ta ˈu e nehenehe e faaoromai i te hamani-ino-raa.”
Eaha te mau irava e nehenehe e tauturu ia ratou ia tiaturi?
HAAPOTORAA
Mea faufaa na Iehova ta tatou mau tutavaraa no te tavini ia ˈna noa ˈtu te hamani-ino-raa. Maoti ta ˈna tauturu e nehenehe tatou e manuïa!
Haamanaˈoraa
No te aha te mau Kerisetiano e faaruru ai i te hamani-ino-raa?
Eaha ta oe e rave i teie nei ia ineine oe ia tae mai te hamani-ino-raa?
Eaha te tauturu ia oe ia tiaturi e nehenehe oe e tavini ia Iehova noa ˈtu te mau tamataraa?
HIˈOPOA
A hiˈo i te taeae apî i te faataaraa nafea Iehova i te tautururaa ia ˈna, a mau ai oia i te fare auri no to ˈna tiaraa amui ore.
A hiˈo eaha tei tauturu i na hoa faaipoipo ia tavini ia Iehova ma te taiva ore e rave rahi matahiti noa ˈtu te patoiraa.
A haapii nafea ia faaruru i te hamani-ino-raa ma te itoito.
“A faaineine i teie nei â no te hamani-ino-raa!” (Te Pare Tiairaa Tiurai 2019)
Eaha to tatou manaˈo i mua i te patoiraa a te utuafare e eaha ta tatou e rave ia vai noa te hau e ia tapea te taiva ore ia Iehova?
“Eita te parau mau e hopoi ‘i te hau, i te ˈoˈe râ’” (Te Pare Tiairaa Atopa 2017)
-