7. E nafea ia faaohipa i te aˈoraa ‘ia vai â te au tahoê a te varua’?

⁷ I te aro o Iehova, ua tiahia te feia faatavaihia ei tamaiti na ˈna e te mau mamoe ê atu ei hoa no ˈna maoti te tusia taraehara o te Mesia. Noa ˈtu râ, e tupu iho â te peapea i rotopu ia tatou a ora noa ˈi tatou i roto i teie nei ao. (Roma 5:9; Iak. 2:23) No reira te Bibilia e parau mai ai ia faaoromai te tahi i te tahi. Ia aha râ tatou e tahoê ai tatou e te mau taeae e tuahine? Ia ‘haehaa ïa te aau e ia mǎrû.’ Ua parau atoa Paulo ia ara maite ‘ia vai â te au tahoê a te varua i te atiraa no te hau.’ (A taio i te Ephesia 4:1-3.) E faaohipa tatou i teie aˈoraa ma te pee i te aratairaa a te varua o te Atua, o te tauturu mai ia faahotu i te mau huru maitatai. Maoti te hotu a te varua e afaro ai te peapea, a hoê atu ai tatou. Area ta te tino e rave, e faaamahamaha ïa ia tatou.

9. Eaha te mau uiraa e ui no te ite e te tutava ra anei tatou i te parahi hau noa ma te tahoê?

⁹ Mea maitai ia uiui tatou taitahi: ‘Te tutava ra anei au i te parahi hau noa ma te tahoê e to ˈu mau taeae e tuahine? Eaha ta ˈu e rave ia peapea vau e te tahi atu? E faatia haere anei au i te hoa ia turu mai ratou ia ˈu? E tiai anei au e na te matahiapo e farerei i tera taata, a ore atu ai au e paraparau ia ˈna no te faahau? E ape anei au i te tahi atu taata e fifi atoa to mâua no te ore e faaafaro i te reira?’ Ia na reira tatou, aita ïa tatou e turu ra i ta Iehova opuaraa e tahoê i to te raˈi e to te fenua atoa i te Mesia.

10, 11. (a) Eaha te faufaaraa ia parahi hau e te mau taeae? (b) Ia aha tatou e parahi hau ai tatou e e haamaitai mai ai Iehova?

¹⁰ Ua parau Iesu: “E teie nei ia hopoi oe i ta oe taoˈa horoa noa i te fata ra, e ua manaˈo ihora oe i reira, e e hara ta to taeae ia oe na; e vaiiho atu i to taoˈa i mua i te fata ra, e mata na i te haere e faite i to taeae, a haere a hopoi ai i ta oe taoˈa. Ia peepee oe i te faaau i te parau.” (Mat. 5:23-25) Ua papai Iakobo e “e ueuehia te parau-tia ma te hau e te feia e faatupu i te parau hau.” (Iak. 3:17, 18) No reira, ma te parahi hau e vetahi ê e rave noa ˈi tatou i te mea tia.

¹¹ Ei hiˈoraa, i te tahi mau vahi i tupu ai te tamaˈi, e 35 % o te fenua eita e faaapuhia no te mau ofai paaina i roto i te repo. Ia paaina te tahi ofai, e faaruehia te faaapu, a ere atu ai te mau oire rii i ta ratou imiraa e te mau oire i te maa. Oia atoa, e fifi tatou i te faahotu noa i te mau huru maitatai Kerisetiano no to tatou huru e au i te ofai paaina, a peapea ˈtu ai tatou e te mau taeae. Mai te peu e tera iho â, e taui anaˈe ïa. Ia faaore noa ˈtu tatou i ta vetahi ê hara ma te hamani maitai atu, e parahi hau ïa tatou paatoa e e haamaitai mai Iehova.