Tahoêhia e te tatua tia roa o te here

“I te au-tahi-maite-raa [i roto i te here].”—KOLOSA 2:2.

1, 2. Eaha te mana amaha e itehia ra i teie nei mahana iho â râ?

A FAAROO na! Te hoê reo puai o te haruru ra na te raˈi atoa i te na ôraa e: “E ati râ hoi to te fenua e to te tai, tei raro atu na hoi te diabolo ia outou na; e riri rahi hoi to ˈna, no te mea ua ite oia e maa taime poto to ˈna e toe nei.” (Apokalupo 12:12) A mairi noa ˈi te mau matahiti, ua rahi atu â te riaria o teie poroi no te mau taata e faaea ra i nia i te fenua nei.

² Ua matau-maoro-hia te enemi rahi o Iehova mai te hoê patoi (Satani) e te hoê pari haavare (Diabolo). Te rave nei râ taua taata haavare ra i teie nei i te tahi atu tuhaa riaria—ua riro oia ei atua riri uˈana! No te aha? No te mea ua tiavaruhia oia mai te raˈi mai e Mihaela e ta ˈna mau melahi i te tamaˈi i haamata i te raˈi i te matahiti 1914. (Apokalupo 12:7-9) Ua ite te Diabolo e e taime poto to ˈna no te haapapu i ta ˈna tautooraa e e nehenehe oia e faafariu ê i te mau taata atoa i te haamoriraa a te Atua. (Ioba 1:11; 2:4, 5) Ma te ore e ravea no te horo, e au o ˈna e ta ˈna mau demoni i te hoê nuu manu meli taehae o te huri nei i to ratou riri i nia i te mau nahoa taata arepurepu.—Isaia 57:20.

3. Eaha te faahopearaa ino o te vairaa mai o Satani i to tatou nei tau?

³ Te faataa ra teie mau tupuraa, itea-ore-hia i te mata taata nei, e no te aha te vai ra i teie nei te hoê toparaa morare rahi i ropu i te huitaata nei. Te faataa atoa ra te reira i te mau tutavaraa maamaa a te mau taata no te tataˈi i te amaharaa o te mau nunaa o te ore e nehenehe e ora amui. Te aro uˈana nei te mau opu e te mau nunaa taata i te tahi e te tahi, ma te faahopearaa e e mau mirioni taata aita to ratou e fare e tei horo. Eita ïa e maerehia e te maraa noa ˈtura te vahavaharaa i te ture i nia i te hoê faito aore â i itehia! Mai ta Iesu i tohu na, ‘te toetoe ra te here o te rahiraa o te huitaata nei.’ I te mau vahi atoa te ite ra outou e, ua riro te au-ore-raa e te ereraahia i te here ei mau tapao o te huitaata arepurepu i teie nei mahana.—Mataio 24:12.

4. No te aha tei roto te nunaa a te Atua i te atâta taa ê?

⁴ No nia i te huru tupuraa o teie nei ao, mea hohonu aˈe te auraa o te pure a Iesu no ta ˈna mau pǐpǐ: “Aore au i pure ia oe e ia hopoi ê atu oe ia ratou i teie nei ao, ia tiai mai râ oe ia matou eiaha ei ino. E ere ratou i to teie nei ao, mai ia ˈu nei hoi e ere i to teie nei ao.” (Ioane 17:15, 16) I teie nei mahana, te huri ra ‘te taata ino’ i to ˈna riri i nia i te feia “o tei haapao i te parau a te Atua ra, o tei mau maite i te parau a Iesu Mesia i faaite maira.” (Apokalupo 12:17) Ahiri e aita Iehova i horoa i te aupururaa ara maite e te here, e haamouhia na to ˈna mau Ite haapao maitai. Tei to tatou faaohipa-maite-raa i te mau faanahoraa atoa ta te Atua e haamau ra no te paruru e no te faaora ia tatou i te pae varua to tatou nei ora. Te auraa ra e ia haa tatou ia au i te ohipa o To ˈna puai na roto i te arai o te Mesia, mai ta te aposetolo i aˈo i roto i te Kolosa 1:29.

5, 6. Eaha na te huru o te aposetolo Paulo i nia i te mau kerisetiano no Kolosa, e no te aha te irava no te matahiti 1995 e tano maitai ai?

⁵ Noa ˈtu e aita Paulo i ite mata aˈenei ia ratou, ua here oia i to ˈna mau taeae no Kolosa. Ua parau oia ia ratou e: “Te hinaaro nei hoi au ia ite outou e ati rahi to ˈu ia outou.” (Kolosa 2:1) I te mea e e ere te mau pǐpǐ a Iesu i to teie nei ao, e tutava ‘te taata ino’ i te ofati i te autahoêraa o te mau taeae na roto i te ueueraa i rotopu ia ratou te huru feruriraa o te ao nei. Ua faataa te mau parau apî ta Epaphera i afai mai no Kolosa mai e ua haamata te reira i te parare.

⁶ Ua nehenehe te hoê o te mau pu anaanatae a Paulo i to ˈna mau taeae kerisetiano e haapotohia ma teie mau parau: “I te au-tahi-maite-raa [i roto i te here].” E auraa taa ê to teie mau parau i teie nei mahana, i roto i te hoê ao tei î i te amahamaharaa e te here ore. Mai te peu e e pee maite tatou i te aˈoraa a Paulo, e fanaˈo tatou i te aupururaa a Iehova. E faufaa-atoa-hia tatou i te puai o to ˈna varua moˈa i roto i to tatou oraraa, ma te tauturu ia tatou ia patoi i te mau faateimaharaa o teie nei ao. Auê ïa aˈoraa paari mau e! No reira, o te Kolosa 2:2 ïa te irava no te matahiti 1995.

7. Eaha te au-maitai-raa te tia ia itehia i rotopu i te mau kerisetiano mau?

⁷ I roto i te hoê rata matamua i to Korinetia, ua faaohipa te aposetolo i te tino taata nei ei faahohoˈaraa. Ua papai oia e “ia ore roa te au ore i te tino nei” i roto i te amuiraa o te mau kerisetiano faatavaihia, “ia faito atoa râ to te mau melo haapao ia ratou iho.” (Korinetia 1, 12:12, 24, 25) Auê ïa faahohoˈaraa faahiahia mau! E taairaa to to tatou mau melo i te tahi e te tahi, ua tuati te melo taitahi i te toea o to tatou tino. Hoê â atoa huru no to tatou taatiraa autaeae na te ao atoa nei, amuihia mai te feia i faatavaihia e tau mirioni o te tiaturi ra i te ora i roto i te hoê paradaiso i nia i te fenua. Eita e tia ia faataa ê tatou ia tatou iho i te tino o te mau hoa kerisetiano no te ora o tatou anaˈe iho! Na roto i te arai o Iesu Mesia, te ninii-rahi-hia ra te varua o te Atua i nia ia tatou ia taati tatou e to tatou mau taeae.

Te tuati ra te au-maitai-raa i te ite

8, 9. (a) Eaha te mea faufaa no to tatou au-maitai-raa i roto i te amuiraa? (b) Mea nafea i te noaaraa ia outou te ite no nia i te Mesia?

⁸ Te hoê o te mau manaˈo faufaa a Paulo oia hoi te tuati ra te au-maitai-raa kerisetiano i te ite, no nia iho â râ i te Mesia. Ua papai Paulo e e tia i te mau kerisetiano ‘ia au-tahi-maite i roto i te here, e ia noaa te ite rahi papu roa ra, ia farii maite i te parau aro a te Atua Metua e ta te Mesia ra hoi.’ (Kolosa 2:2) Ua noaa ia tatou te ite—te mau tupuraa—mai te taime mai â a haamata ˈi tatou i te haapii i te Parau a te Atua. A noaa ˈi ia tatou te ite no nia i te taairaa o teie mau tupuraa e rave rahi i roto i te opuaraa a te Atua, ua taa ˈtura ia tatou i te tuhaa faufaa roa o Iesu. “O tei vaiiho-paatoa-hia te taoˈa ra o te paari e te ite i roto ia ˈna ra.”—Kolosa 2:3.

⁹ Te reira anei to outou manaˈo no nia ia Iesu e ta ˈna tuhaa i roto i te opuaraa a te Atua? E oioi roa e rave rahi i roto i te amuiraa faaroo kerisetiano i te faahiti ia Iesu, ma te parau e ua farii ratou ia ˈna e ua faaorahia ratou. Ua ite mau râ anei ratou ia ˈna? Aita, i te mea e te tiaturi nei te rahiraa i te haapiiraa faaroo o te Toru Tahi niu-ore-hia i nia i te mau Papai. Aita noa outou e ite ra i te parau mau no nia i te reira, te vai atoa nei râ ia outou te hoê ite rahi no nia i te parau ta Iesu i faahiti e te ohipa ta ˈna i rave. Ua tauturuhia tau mirioni ia roaa te ite na roto i te hoê haapiiraa maramarama no nia i te buka Te taata rahi roa ˈˈe i ora aˈenei. Inaha te titau nei tatou i te faahohonu noâ i to tatou ite no nia ia Iesu e to ˈna mau huru.

10. Nafea e noaa ˈi ia tatou te ite i hunahia?

¹⁰ Te tupuraa e ua ‘huna-maitai-hia te taoˈa ra o te paari e te ite’ i roto ia Iesu, e ere ïa te auraa e eita e noaa ia tatou taua paari ra e taua ite ra. Maoti râ, e au oia i te hoê tahua heruraa mahora ra te huru. Eita tatou e paheru na te hoê vahi rahi ma te aniani e ihea roa e haamata ˈi i te heru. Ua ite ê na tatou—te haamata ra te ite mau e te mea ta te Bibilia e faaite ra no nia ia Iesu Mesia. A haafaahiahia ˈi rahi atu â tatou i te tuhaa a Iesu i roto i te faatupuraa o te opuaraa a Iehova, te noaahia ra ia tatou te mau taoˈa faufaa o te paari mau e o te ite papu. No reira te mea ta tatou e titau ra oia hoi te tamau-noa-raa i te heru ma te hohonu, ma te iriti i te rahiraa o te mau ofai taoˈa aore ra te mau mea faufaa rahi e vai ra i roto i te pu ta tatou i ǒ ê na.—Maseli 2:1-5.

11. Nafea tatou ia faarahi i to tatou ite e to tatou paari na roto i te feruri-hohonu-raa i nia ia Iesu? (A faahohoˈa e te horoiraa Iesu i te avae o te mau pǐpǐ, aore ra a faaohipa i te tahi atu mau hiˈoraa.)

¹¹ Ei hiˈoraa, ua ite tatou e ua horoi Iesu i te avae o to ˈna mau aposetolo. (Ioane 13:1-20) Ua feruri hohonu anei râ tatou i nia i te haapiiraa ta ˈna i horoa mai e te haerea ta ˈna i faatupu? Ia na reira tatou, e huti mai tatou i te hoê taoˈa faufaa o te paari ia nehenehe tatou—e, no te turai ia tatou—ia taui i to tatou huru faaauraa e te hoê taeae aore ra te hoê tuahine tei faairiâ maoro ia tatou. Aore ra ia horoahia mai te hoê hopoia ta tatou e ore e au maitai ra, e taui paha tatou i to tatou haerea i muri aˈe tatou i te taa-maite-raa i te auraa o te Ioane 13:14, 15. Mea na reira te ite e te paari e haaputapû ai ia tatou. Eaha te faahopearaa te nehenehe e itehia i nia ia vetahi ê a pee maite ai tatou i te hiˈoraa o te Mesia no nia i to ˈna ite rahi? Eita e ore e ‘e au-tahi-maite hau atu â’ te nǎnǎ ‘i roto i te here.’a

E nehenehe te fariu-ê-raa te manaˈo e faaino i te au-maitai-raa

12. No nia i teihea ite e tia ia tatou ia vai ara?

¹² Mai te peu e te faaohie ra te ite papu ia tatou ‘i te au-tahi-maite-raa i roto i te here,’ eaha te mau faahopearaa no te “parau mârôhia ra i haavarehia e e ite”? O te taa-ê-roa-raa ïa—te aimârôraa, te feiiraa, e te fariu-ê-raa i te faaroo. No reira e tia ia tatou ia ara i taua ite haavare ra, mai ta Paulo i faaara na ia Timoteo. (Timoteo 1, 6:20, 21) Ua papai atoa Paulo e: “O te haavare mai te hoê taata ˈtu ia outou i te parau taparu, i na reira ˈtu ai au. E ara o te riro noa ˈtu outou i te parau paari e te haavare faufaa ore a te hoê taata ˈtu, i te parau tutuu a te taata nei, mai te â rii a teie nei ao ra, aore i au i ta te Mesia ra.”—Kolosa 2:4, 8.

13, 14. (a) No te aha tei mua te mau taeae no Kolosa i te atâta no te pae o te ite? (b) No te aha te manaˈo ra vetahi i teie mahana e aita ratou e farerei ra i te hoê â atâtaraa?

¹³ Ua haaatihia te mau kerisetiano no Kolosa e te mana haavarevare o te mea i haavarehia e e ite. Ua haafaahiahia e rave rahi feia no Kolosa e te feia tapiri i te mau haapiiraa philosopho heleni. E vai atoa na te mau taata i farii i te haapaoraa ati Iuda o tei hinaaro ia pee noa te mau kerisetiano i te Ture a Mose, mai ta ˈna mau mahana oroa e te mau titauraa no te pae maa. (Kolosa 2:11, 16, 17) Aita Paulo i patoi ia ore e noaahia i to ˈna mau taeae te ite mau, e tia na râ ia ratou ia haapao maitai e ia ore te tahi e topa i roto i te marei, ma te faaohipa i te mau parau turu faahema no te haapapu ia ratou i te atuaturaa i te hoê huru manaˈo ohie no nia i te oraraa e te mau ohipa a te taata nei. E nehenehe outou e taa e mai te peu e te vaiiho ra vetahi i roto i te amuiraa i to ratou manaˈo e ta ratou mau faaotiraa ia arataihia e teie mau tiaturiraa niu-ore-hia i nia i te Bibilia e teie mau huru haerea no nia i te oraraa, e faaino te reira i te au-maitai-raa e te here i rotopu i te mau melo o te amuiraa.

¹⁴ ‘E,’ ta outou paha e manaˈo ra, ‘te ite nei au i te atâtaraa ta te feia no Kolosa i faaruru, eita râ vau e manahia e te mau tiaturiraa heleni, mai te tiaturiraa i te pohe-ore-raa o te nephe aore ra i te hoê atua toru tahi; aita ˈtoa vau e ite ra i te tahi atâtaraa ia faahemahia e te mau oroa etene o te haapaoraa hape ta ˈu i faarue na.’ E mea maitai. E mea maitai ia tiaturi papu i te teitei o te parau mau tumu faaitehia na roto i te arai o Iesu e o te nehenehe e itehia i roto i te mau Papai. Teie râ, tei mua anei tatou i te atâtaraa a te tahi atu mau haapiiraa philosopho aore ra vetahi mau manaˈo parare roa ˈˈe a te taata nei i teie mahana?

15, 16. Eaha te huru hiˈoraa no nia i te oraraa o te nehenehe e ohipa i nia i te feruriraa o te hoê kerisetiano?

¹⁵ Ua vai maoro teie huru haerea: “Teihea te haerea mai no ˈna i parauhia ra? te vai noa nei â hoi te mau mea atoa mai te taotoraa mai â o te feia metua ra, mai te hamaniraa mai â i te matamua ra.” (Petero 2, 3:4) E nehenehe teie manaˈo e faataahia i roto i te tahi atu mau parau, e hoê â râ manaˈo. Ei hiˈoraa, e feruri paha te hoê taata mai teie e, ‘I to ˈu haapiiraa i te taime matamua i te parau mau tau ahuru matahiti i teie nei, “e mea piri roa” te hopea. Aitâ râ i tae mai atura, e o vai te ite e afea e fa mai ai?’ Parau mau, aita hoê aˈe taata i ite e afea te hopea e tae mai ai. Teie râ, a tapao na i te manaˈo ta Iesu i aˈo mai: “E haapao maitai, e faaitoito, e e pure, aita hoi outou i ite i taua tau ra.”—Mareko 13:32, 33.

¹⁶ Auê i te atâta ia pee i te manaˈo e, ma te ite ore e afea te hopea e tae mai ai, e tia ia tatou ia aratai i te hoê oraraa fanaˈo e te “matauhia”! E nehenehe teie huru manaˈo e faataehia ma te haaferuriraa e, ‘E nehenehe ta ˈu e rave i te tahi mau taahiraa avae ia nehenehe vau (aore ra ta ˈu mau tamarii) e fanaˈo i te hoê ohipa faahiahia e te aufau-maitai-hia. Papu maitai, e haere vau i te mau putuputuraa kerisetiano e e apiti rii vau i roto i te ohipa pororaa, aita râ ta ˈu e tumu ia faaohipa rahi ia ˈu aore ra ia rave i te mau haapaeraa rarahi.’—Mataio 24:38-42.

17, 18. Eaha te manaˈo ta Iesu e ta te mau aposetolo i faaitoito ia tatou ia atuatu?

¹⁷ Eita râ e nehenehe e patoihia e ua aˈo Iesu e ta ˈna mau aposetolo e te ora nei tatou ma te hinaaro ru ia porohia te parau apî maitai, ma te horoa taatoa ia tatou iho e ma te haa i te raveraa i te tahi mau haapaeraa. Ua papai Paulo e: “Teie râ ta ˈu parau, e au mau taeae, te poto nei te taime: e au i te feia tara vahine ra, ia riro mai te mea e, aore; e te feia i oto ra, mai te mea e, aore i oto; . . . e te feia i hoo ra, mai te mea e, aita a ratou; e te feia i rave i to teie nei ao ra, mai te mea e aore i rave; te mou nei hoi te huru o teie nei ao.”—Korinetia 1, 7:29-31; Luka 13:23, 24; Philipi 3:13-15; Kolosa 1:29; Timoteo 1, 4:10; Timoteo 2, 2:4; Apokalupo 22:20.

¹⁸ Taa ê roa ˈtu i te parau e ua riro te aratairaa tatou i te hoê oraraa ona ei tapao no tatou, ua papai Paulo ma te faauruahia e: “Aita roa hoi a tatou e taoˈa i hopoi mai i teie nei ao; e ua itea-papu-hia hoi e aita roa e taoˈa e tia ia hopoi atoa ia haere ê tatou ra. E teie nei, e maa ta tatou, e te ahu, ia mauruuru tatou i te reira. . . . Rohi hua oe i te rohiraa maitai ra i te faaroo; e huru i te ora mure ore, i parauhia ˈi hoi oe na, e ua faˈi hoi i te faˈiraa parau maitai i mua i te aro o te ite e rave rahi ra.”—Timoteo 1, 6:7-12.

19. Eaha te mau faahopearaa o te ohipa i nia i te hoê amuiraa ia farii to ˈna mau melo i te huru hiˈoraa no nia i te oraraa ta Iesu i faaitoito na?

¹⁹ Ia vai i roto i te hoê amuiraa te mau kerisetiano itoito o te tutava uˈana nei i te ‘pûpû i te hoê faaiteraa maitai i mua i te taata,’ e itehia iho â te au-maite-raa. Aita ratou e auraro ra i te haerea, “E taoˈa rahi ta oe ua pue i te vairaa no te mau matahiti a muri nei e rave rahi; e faaea maite, e amu, e inu, e ia rearea maite.” (Luka 12:19) Area râ, te tahoê nei ratou i roto i te hoê â tutavaraa, te haaraa i te rave i te mau haapaeraa no te apiti mai ta ratou e nehenehe i roto i taua ohipa ra o te ore roa ˈtu e rave-faahou-hia.—A faaau e te Philipi 1:27, 28.

Ia ara tatou i te mau manaˈo turu faahema

20. Eaha vetahi atu vahi o te nehenehe e haavare i te mau kerisetiano?

²⁰ Papu maitai, te vai ra vetahi atu mau ravea o te nehenehe e ‘haavare’ i te mau kerisetiano ‘e te mau manaˈo turu faahema’ aore ra te mau manaˈo hape faufaa ore o te ohipa i nia i te ‘au-tahi-maite-raa i roto i te here.’ Ua papai te amaa a te Taiete Watch Tower no Helemani e: “Te aratai ra hoê hiˈoraa i te aimârôraa, oia hoi te tururaa te mau taata poro tae noa ˈtu te mau matahiapo i te mau tuhaa taa ê o te mau manaˈo turu no nia i te mau huru rapaauraa faaohipahia e te hoê taeae.” Ua na ô faahou ratou e: “No te huru rau o te mau ravea faaohipahia e te numera rahi o te mau taata maˈi, ua riro te reira ei tuhaa no te aimârôraa e, mai te peu e e mau ravea rapaauraa tahutahu rii, e mea atâta atoa te reira.”—Ephesia 6:12.

21. Nafea te hoê kerisetiano e nehenehe ai e erehia i te pu tano i teie nei mahana?

²¹ Te hinaaro nei te mau kerisetiano ia vai ora noa e ia oraora maitai ia nehenehe hoi ratou e haamori i te Atua. Teie râ, i roto i teie nei faanahoraa te roohia ra tatou i te ruhiruhia e te maˈi no to tatou tiaraa taata tia ore. Maoti i te tapitapi i nia i te mau fifi o te oraora-maitai-raa, e tia ia tatou ia haamau i te feruriraa i nia i te ravea mau, no tatou e no vetahi ê. (Timoteo 1, 4:16) O te Mesia te pu faufaa o taua ravea ra, mai tei riro na i roto i te aˈoraa a Paulo no te feia no Kolosa. A haamanaˈo râ, ua faataa Paulo e e nehenehe te tahi e tuu mai i te mau ‘manaˈo turu faahema’ o te fariu ê to tatou ara-maite-raa i te Mesia, peneiaˈe tia ˈtu i te mau ravea arairaa i te maˈi, te mau huru rapaauraa, aore ra te mau tabula maa.—Kolosa 2:2-4.

22. Eaha te haerea aifaito te tia ia tatou ia rave no te mau poroi faatianiani huru rau no nia i te mau ravea arairaa i te maˈi e te rapaauraa?

²² Te haaatihia ra te mau taata na te ao taatoa nei e te mau poroi faatianiani e te mau faaiteraa no nia i te mau ravea rapaauraa huru rau atoa e te mau ravea arairaa i te maˈi. Te faaohipa-rahi-hia ra e ua matauhia vetahi o ratou; te faaino-rahi-hia ra te tahi atu aore ra te hiˈo-ino-hia ra.b Na te taata tataitahi te hopoia no te ite e eaha ta ˈna e rave no to ˈna oraora-maitai-raa. E paruruhia râ te feia o te farii i te aˈoraa a Paulo i roto i te Kolosa 2:4, 8 i mua i te haavareraahia e te mau ‘manaˈo turu faahema’ aore ra te mau ‘manaˈo hape faufaa ore’ o tei faafariu ê e rave rahi, ma te erehia i te tiaturiraa o te Basileia, o te tiai noa ra i te tiaturiraa. Noa ˈtu e ua papu i te hoê kerisetiano e e mea maitai te tahi huru rapaauraa no ˈna, eita e tia ia ˈna ia faaitoito i te reira i roto i te autaeaeraa kerisetiano, no te mea e nehenehe te reira e riro ei tumu parau rahi no te tauaparauraa e ei aimârôraa. E faaite ïa oia e te faatura rahi nei o ˈna i te faufaaraa o te au-maitai-raa i roto i te amuiraa.

23. No te aha e tumu iho â ta tatou no te oaoa?

²³ Ua haapapu o Paulo e ua riro te au-maitai-raa kerisetiano ei niu no te oaoa mau. I to ˈna tau e mea iti aˈe te numera o te mau amuiraa i to teie nei mahana. Ua nehenehe râ oia e papai i to Kolosa e: “Taa ê noa mai â tau tino nei, tei o outou â tau varua, i te oaoaraa i te hiˈoraa ˈtu i ta outou haapao maitai, e te papu o to outou faaroo i te Mesia ra.” (Kolosa 2:5; a hiˈo atoa Kolosa 3:14.) Auê te tumu rahi no tatou no te oaoa! E nehenehe tatou e ite i te haapapuraa mau o te au-maitai-raa, te nahonaho-maitai-raa, e te etaeta o te faaroo i roto i ta tatou iho amuiraa, o te faaite ra i te huru taatoa o te nunaa a te Atua na te fenua atoa nei. No reira i te taime poto e toe ra i roto i teie nei faanahoraa, ia papu ia tatou tataitahi i te ‘au-tahi-maite-raa i roto i te here.’

[Nota i raro i te api]

Ua tapao anei outou?

◻ Eaha te irava no te matahiti 1995 a te mau Ite no Iehova?

◻ No te aha ua titau te mau kerisetiano no Kolosa i te au-tahi-maite i roto i te here, e no te aha tatou e na reira atoa ˈi?

◻ Eaha te huru hiˈoraa haavarevare no nia i te oraraa te tia iho â râ i te mau kerisetiano ia vai ara i teie nei mahana?

◻ No te aha e tia i te mau kerisetiano ia ara ia ore e vare i te mau manaˈo turufaahema no nia i te oraora-maitai-raa e te mau ravea arairaa i te maˈi?

[Hohoˈa i te api 17]

Ua niuhia anei ta outou mau opuaraa no a muri aˈe i nia i te vairaa mai o Iesu?