• E nafea oe e faufaahia ˈi i te putuputuraa a te mau Ite no Iehova?
    Ia ora oe e a muri noa ˈtu! (Aparauraa Bibilia)
    • Haapiiraa 10. I te hoê putuputuraa a te mau Ite no Iehova, te hiˈo ra te hoê taata i te irava Bibilia ta te hoê Ite no Iehova e faaite ra.

      HAAPIIRAA 10

      E nafea oe e faufaahia ˈi i te putuputuraa a te mau Ite no Iehova?

      Ua haere aˈena anei oe i te hoê putuputuraa a te mau Ite no Iehova? Mai te peu aita, e taiâ rii paha oe i te taime matamua. E uiui paha ïa oe: ‘Mea nafea te tereraa? Mea faufaa iho â anei ia haere vau?’ I roto i teie haapiiraa, e ite oe e nafea te putuputuraa e tauturu ai ia oe, e maoti te reira, e piri atu â oe i te Atua.

      1. Eaha te tumu e putuputu ai te mau Ite no Iehova?

      Te horoa ra te hoê papai Salamo i teie tumu: “E arue au ia Iehova i roto i te amuiraa rahi.” (Salamo 26:12) No reira ïa te mau Ite no Iehova e oaoa ˈi ia putuputu ratou. E putuputu te mau Ite no Iehova pauroa te hebedoma no te arue i te Atua, no te himene e no te pure. E putuputu atoa râ ratou tau taime i te matahiti, mea rahi aˈe râ te taata te putuputu.

      2. Eaha ta oe e haapii i ta matou mau putuputuraa?

      I te mau putuputuraa, e faahohonu oe i to oe ite i te Parau a te Atua, “ma te faataa papu i te reira e ma te horoa i te auraa.” (A taio i te Nehemia 8:8.) E haapii hau atu â oe no nia ia Iehova e to ˈna mau huru maitatai faahiahia mau. Ia ite oe e mea here na Iehova ia oe, e piri atu â oe ia ˈna. E haapii atoa oe e nafea oia e tauturu ai ia oe ia oaoa i roto i to oe oraraa.—Isaia 48:17, 18.

      3. E nafea oe e faufaahia ˈi i te farereiraa i te taata i te putuputuraa?

      Te faaue nei Iehova ia tatou ia “manaˈo . . . te tahi i te tahi, a turai atu ai te tahi i te tahi ia faaite i te here e ia rave i te ohipa maitai roa, eiaha e faarue i ta tatou mau putuputuraa.” (Hebera 10:24, 25) I te mau putuputuraa, e farerei oe i te taata mea haapao na ratou i te tahi e te tahi e ua anaanatae i te Parau a te Atua. E fanaˈo oe i te faaitoitoraa no roto i te Bibilia. (A taio i te Roma 1:11, 12.) E farerei oe i te taata, tei faaipoipohia anei aore ra o tei faaea taa noa, ua roaa ia ratou i te faatitiaifaro i te mau fifi o te oraraa. Teie te tahi mau tumu e hinaaro ai Iehova ia putuputu tatou!

      A FAAHOHONU ATU Â

      A hiˈo mea nafea te tereraa o te putuputuraa a te Ite no Iehova e no te aha mea faufaa ia faaitoito oe i te amui atu.

      4. Te putuputuraa a te mau Ite no Iehova

      I te tau o te mau Kerisetiano matamua, mea pinepine ratou i te putuputu no te haamori ia Iehova. (Roma 16:3-5) A taio i te Kolosa 3:16, e a aparau i teie uiraa:

      • Mea nafea te mau Kerisetiano matamua i haamori ai ia Iehova?

      I teie atoa mahana, mea pinepine te mau Ite no Iehova e putuputu i ta ratou mau vahi haamoriraa. No te ite i te tereraa o ta ratou mau putuputuraa, a pata i te VIDEO. Ia oti, a mataitai i te hohoˈa o te hoê putuputuraa e a aparau i te mau uiraa i muri nei.

      VIDEO: Eaha te ravehia i te hoê Piha a te Basileia? (2:12)

      • Eaha te tahi mau tuatiraa ta oe i tapao i rotopu i te ravehia i te hoê Piha a te Basileia e ta oe i taio i roto i te Kolosa 3:16?

      • I roto i te video e i nia i te hohoˈa, ua ite anei oe i te tahi mea ta oe e anaanatae ra i te mau putuputuraa?

      A taio i te Korinetia 2, 9:7, e a aparau i teie uiraa:

      • No te aha e ere i te mea tamoni te putuputuraa a te mau Ite no Iehova?

      A hiˈopoa e ta oe taata haapii i te tahi o te mau tumu parau e tatarahia i te putuputuraa o teie hebedoma.

      • Teihea mau tumu parau ta oe e manaˈo ra mea faufaa aˈe no oe?

      Ua ite anei oe?

      I nia jw.org, e ite oe ihea e afea te putuputuraa a te mau Ite no Iehova e tupu na te ao atoa nei.

      : E hohoˈa no tei tupu i te Piha a te Basileia a tupu ai te tahi putuputuraa, hou e i muri aˈe i te reira. Te faataa ra te mau tuhaa A, B, C, D i te hohoˈa tataitahi. A. E tane Ite no Iehova e horoa ra i te oreroraa parau na mua mai. B. E vahine Ite no Iehova e pahono ra i te hoê uiraa tei tuuhia mai. C. E Ite no Iehova e paraparau ra i te hoê utuafare i muri aˈe i te putuputuraa. D. E tane Ite no Iehova e tapea ra i te opani ia tomo mai te hoê taata paari e haere mai ra no te putuputuraa.

      1. I ta matou mau putuputuraa, te vai ra te oreroraa parau, te tumu parau e te mau video. E haamata e e opani te putuputuraa na roto i te himene e te pure

      2. I roto i te tahi mau tuhaa, e nehenehe atoa te taata e horoa i to ratou manaˈo

      3. Te feia atoa te farii-popou-hia: te mau utuafare, te feia taa noa, te feia paari e te mau tamarii

      4. Mea tamoni ore ta matou mau putuputuraa. Eita te mau Ite no Iehova e faaaufau no te apiti mai i ta ratou putuputuraa, eita atoa e faahaere i te tôtô

      5. E titauhia ia faaitoito no te haere i te mau putuputuraa

      E hiˈoraa maitai roa to te utuafare o Iesu. Pauroa te matahiti e haere na ratou na raro, mai Nazareta e tae roa i Ierusalema, i te hoê atea 100 kilometera na te fenua mouˈa. A taio i te Luka 2:39-42, e a aparau i teie mau uiraa:

      • I to oe manaˈo, e titauhia anei ia ratou te itoito no te haere i Ierusalema?

      • No te aha e tia ˈi ia oe ia faaitoito atoa no te haere i te mau putuputuraa?

      • Ia manaˈo oe, mea hoona anei ia haere iho â oe? No te aha?

      Hohoˈa: Iosepha, Maria, Iesu e hoê o to Iesu taeae e faaineine ra i to ratou tere. 1. Te faauta ra Iosepha i ta ratou mau tauihaa i nia i te asini e te faaineine ra Maria i te maa. 2. E hohoˈa fenua e faaite ra i te tere mai Nazareta mai tae roa i Ierusalema.

      Te parau ra te Bibilia e mea faufaa roa ia putuputu tatou. A taio i te Hebera 10:24, 25, e a aparau i teie uiraa:

      • No te aha e tia ˈi ia tamau tatou i te putuputu?

      TE MANAˈO O VETAHI: “Aita e faufaa ia putuputu oe e te tahi atu. Mai te peu te haapii ra oe i te Bibilia i te fare, ua navai noa te reira.”

      • Eaha te irava aore ra te hiˈoraa Bibilia e faaite ra i ta Iehova e titau ra ia tatou?

      HAAPOTORAA

      Maoti te mau putuputuraa e haapii hau atu â ˈi oe no nia ia Iehova, e piri atu â ˈi oe ia ˈna e e haamori ai oe ia ˈna i pihai iho i te tahi atu o ta ˈna mau tavini.

      Haamanaˈoraa

      • No te aha Iehova e faaitoito ai ia tatou ia putuputu?

      • Eaha ta oe e haapii mai i te putuputuraa a te mau Ite no Iehova?

      • E nafea ˈtu â oe e faufaahia ˈi i te putuputuraa?

      Fa

      HIˈOPOA

      Te taiâ ra anei i te haere i te hoê putuputuraa? Teie te hoê taata tei taiâ atoa na e ua au roa i te mau putuputuraa i teie nei.

      Aore e moˈe ia matou te farereiraa (4:16)

      A hiˈo no te aha te hoê taurearea i au ai i te mau putuputuraa e eaha ta ˈna i rave no te tamau i te putuputu atu.

      Ua au roa vau i te mau putuputuraa! (4:33)

      A hiˈo eaha te manaˈo o te tahi atu no nia i te mau putuputuraa.

      “No te aha e apiti ai i te mau putuputuraa i te Piha a te Basileia?” (Tumu parau natirara)

      A hiˈo mea nafea te oraraa o te hoê taata ohipa ino i te tauiraa i muri aˈe i to ˈna apitiraa i te hoê putuputuraa a te mau Ite no Iehova.

      “E afai na vau i ta ˈu pupuhi i te mau vahi atoa” (Tumu parau o Te Pare Tiairaa)

  • Te faatere ra te Faatereraa arii a te Atua i teie nei!
    Ia ora oe e a muri noa ˈtu! (Aparauraa Bibilia)

    • 5. Ua taui te ao mai te matahiti 1914

      A pata i te VIDEO.

      VIDEO: Ua taui te ao mai te matahiti 1914 (1:10)

      Ua tohu Iesu mai te aha te ao i muri aˈe i to ˈna riroraa mai ei Arii. A taio i te Luka 21:9-11, e a aparau i teie uiraa:

      • Eaha te tahi o teie mau tupuraa ta oe i ite aore ra i faaroo?

      Ua faataa te aposetolo Paulo i te huru o te mau taata i te mau mahana hopea o te faatereraa a te taata. A taio i te Timoteo 2, 3:1-5, e a aparau i teie uiraa:

      • Eaha te tahi o teie mau haerea ta oe i tapao i nia i te taata i teie mahana?

      Hohoˈa: Te faaitehia ra te mau tupuraa na te ao nei i te mau mahana hopea. 1. Te hoê raatira faehau i nia i te tahua e te tutuô ra ma te tuu i to ˈna rima i nia. 2. Te mau faehau i te tamaˈi te aro ra. 3. Te hoê nahoa taata te haere ra na rapae e to ratou paruru vaha. 4. Te hoê taata e rave ra i te raau taero. 5. Te hoê tane o te tutuô ra i nia i ta ˈna vahine. 6. Rave rau raau taero e ava. 7. E piti vahine mahu e pata ra ia raua i te hohoˈa. 8. Te hoê taata faahuehue o te taora ra i te hoê mauhaa.

      6. E turai te faatereraa o te Faatereraa arii a te Atua ia tatou ia ohipa

      A taio i te Mataio 24:3, 14, e a aparau i teie mau uiraa:

      • Eaha te ohipa faufaa o te faaite ra e te faatere ra te Faatereraa arii a te Atua i teie nei?

      • Nafea oe e nehenehe ai e apiti i roto i teie ohipa?

      Te faatere ra te Faatereraa arii a te Atua i teie nei, e te fatata mai ra te mahana e faatere roa ˈi te Faatereraa arii a te Atua i te fenua nei. A taio i te Hebera 10:24, 25, e a aparau i teie uiraa:

      • Eaha ta tatou tataitahi e rave “a ite ai tatou i taua mahana ra e fatata mai ra”?

      Hohoˈa: 1. Te apiti ra te hoê piahi i te putuputuraa a te mau Ite no Iehova. 2. Te poro ra to piahi Bibilia noa â i te tahi atu taata ta ˈna i farerei.

      Ia haapii oe i te tahi mea o te nehenehe e tauturu aore ra e faaora ia vetahi ê, e turai te reira ia oe ia rave i te aha?