Ao

Auraa: Ia huri oia i te parau Heleni ra koʹsmos, teie te mau auraa o te parau “ao”: (1) te taatoaraa o te huitaata, noa ˈtu eaha to ratou huru oraraa aore ra to ratou haerea morare, (2) te totaiete i reira e fanauhia ˈi e e ora ˈi te hoê taata, aore ra (3) te mau taata paatoa o te ore e fariihia ra e Iehova. Ua faaohipa hape atoa vetahi feia huri i te Bibilia i te parau “ao” no te iriti e rave rau mau parau Heleni oia hoi te auraa “fenua,” “fenua taatahia” e “faanahoraa o te mau mea.” E tuatapapa iho â râ tatou i te toru o te auraa i faahitihia i nia nei.

E haamouhia anei te ao i te auahi?

Pet. 2, 3:7: “Area te raˈi e te fenua e vai nei, te tapeahia nei ïa e taua parau ra [a te Atua] no te auahi ia tae i te mahana haavaraa, i te poheraa o te feia paieti ore ra.” (A tapao na e o “te feia paieti ore,” eiaha râ te mau taata atoa, te haamouhia. Oia atoa, te faahiti ra te irava 6 (MN) i te haamouraa i roohia i “te ao” i te tau o Noa. I taua tau ra, o te feia iino tei haamouhia, eiaha râ te fenua e te mau taata paieti mai ia Noa e to ˈna utuafare. E auahi mau anei te “auahi” o te mahana haavaraa i mua nei aore ra e taipe no te hoê haamouraa taatoa? E nehenehe anei te hoê auahi mau e ohipa i nia i te mau taoˈa no te raˈi materia, mai te mahana e te mau fetia o tei riro hoi ei mau auahi ura puai? No te mau haamaramaramaraa hau no nia i teie irava, hiˈo i te mau api 136-139, i te tumu parau “Fenua.”)

Mas. 2:21, 22: “Na te feia piˈo ore hoi e parahi i te fenua, e te feia parau-tia te haapapuhia i reira; e tâpû-ê-hia ra te paieti ore i te fenua nei, e te feia i rave i te hara ra, e taihitumuhia ïa.”

Na vai e faatere ra i te ao nei—na te Atua anei aore ra na Satani?

Dan. 4:35: “E te rave nei [te Atua Teitei, o Iehova] i tana hinaaro i te nuu atoa o te raˈi ra, e te taata atoa o te fenua nei: e aore roa e faaore i ta ˈna e rave ra, e e tia hoi ia parau atu e, Te aha noa na oe?” (Oia atoa, ua parauhia Iehova te “Arii no te mau fenua” i roto i te Ieremia 10:6, 7. O o ˈna mau â te Arii hau aˈe, o o ˈna te nehenehe e titau e o te titau â i te utua i te mau arii taata e i te mau nunaa ta ratou e faatere ra; i te mea e o ˈna tei Poiete i te fenua, o Iehova ïa te Arii tia; aita roa ˈtu oia i faarue noa ˈˈe i teie tiaraa.)

Ioa. 14:30: “[Ua parau o Iesu e:] Te haere mai nei hoi te arii o teie nei ao, aore râ a ˈna i roto ia ˈu nei.” (Teie arii, e ere iho â ïa te Atua ra o Iehova, ua rave noa hoi o Iesu i to ˈna hinaaro ma te haapao maitai. Ma te feaa ore, taua “arii o teie nei ao” ra, o te “varua ino” ïa, oia hoi te Diabolo ra o Satani, tei raro aˈe “to te ao atoa” ia ˈna, ia au i te Ioane 1, 5:19. Noa ˈtu e te ora nei te mau taata i nia i te hoê palaneta o te Atua te fatu, ua riro te feia i rotopu ia ratou o te ore e tavini ra ia Iehova ei ao faaterehia e Satani no te mea te auraro ra ratou ia ˈna. E ere te taata o te auraro ma to ˈna mafatu atoa i te faatereraa a Iehova, no teie nei ao. Hiˈo Korinetia 2, 4:4.)

Apo. 13:2: “Ua horoa maira te teni [te Diabolo ra o Satani] i to ˈna iho puai, e to ˈna iho terono, e te mana rahi no [te puaa].” (Ia faaauhia i te parauhia ra no nia i teie “puaa” e ta te Daniela 7 e faataa ra, e taa ia tatou e te faahohoˈa ra oia i te faatereraa taata, eiaha te hoê noa faatereraa, tera râ te taatoaraa o te faanahonahoraa politita a te ao nei. Te haapapuhia ra e o Satani te raatira o teie puaa, i roto i te Luka 4:5-7 e te Apokalupo 16:14, 16 i reira te faaitehia ra e te turai nei te mau parau i faauruahia mai e te mau demoni i te mau arii o te fenua taatoa ia aro atu i te Atua i Aramagedo. Te vaiiho noa nei te Atua i te faatereraa a Satani i nia i teie nei ao e tae noa ˈtu i te taime faataahia e faatitiaifaro ai Oia i te tumu parau o te mana arii i nia i te ao taatoa nei.)

Apo. 11:15: “E mau reo rarahi atura tei nia i te raˈi, i te na ôraa e, O te basileia ra o teie nei ao ua riro ei basileia no to tatou Fatu [o Iehova] e no ta ˈna ra Mesia.” (Ua haamata “te mau mahana hopea” o te faanahoraa ino o te mau mea na roto i teie ohipa i tupu i te matahiti 1914 ra. Ua itehia mai te hoê huru apî o te mana arii o Iehova na roto ïa i te arai o te Basileia Mesia a ta ˈna iho Tamaiti. Fatata roa te ao ino i te haamouhia, e o Satani, to ˈna raatira varua ino i te ruuruuhia, ma te ore roa e mana faahou i nia i te huitaata.)

Eaha te haerea o te mau Kerisetiano mau i mua i teie nei ao e i mua i te feia no teie nei ao?

Ioa. 15:19: “E ere outou [te mau pǐpǐ a Iesu] i to teie nei ao, o vau i maiti ia outou no roto i teie nei ao.” (No reira, e ere te mau Kerisetiano mau no roto i te totaiete taata tei atea ê roa i te Atua. Te ora nei ratou mai te tahi atu mau taata, tera râ, te haapae nei ratou i te huru feruriraa, te huru paraparau e te haerea o teie nei ao o te patoi ra i te mau eˈa tia o Iehova.) (Hiˈo i te mau api 389-396 e 175-179.)

Iak. 4:4: “E te mau faaturi vahine, aore outou i ite e, o te hinaaro i teie nei ao, o taua au ore ïa i te Atua ra? E teie nei, o tei titau e ei taua oia no teie nei ao, ua taa maite ïa oia, e e enemi ïa no te Atua.” (I te mea e e feia tia ore te mau Kerisetiano, te haaviivii nei vetahi ia ratou i te tahi mau taime na roto i to ratou mau taairaa e teie nei ao. Tera râ, ia aˈohia mai ratou ia au i te Parau a te Atua, e tatarahapa e e faatitiaifaro ratou i to ratou haerea. Teie râ, te taata e amui atu ma te opua mau i teie nei ao aore ra o te pee i to ˈna huru feruriraa, te faaite ra ïa e e ere faahou oia i te Kerisetiano mau, tera râ, no roto oia i teie nei i te ao e patoi ra i te Atua.)

Roma 13:1: “Ia auraro maite te taata atoa i te feia mana toroa ra. Aore roa hoi e mana maori râ no ǒ mai i te Atua ra; te feia mana e vai nei, ua haapaohia ïa e te Atua.” (Eita te feia e pee ra i teie aˈoraa e orure hau na roto i te tamataraa i te faataahuri i te mau faatereraa o te ao nei. Te farii nei ratou i te mana o te mau tia politita, e ia ore teie mau tia e ani mai ia rave i te mau mea e patoi ra i te mau ture a te Atua, e auraro ïa ratou. Ua tohu e ua faaite atea mai te Atua e e vai mai teie mau faatereraa. Noa ˈtu e e ere na ˈna i faatoroa ia ratou, te faatia nei oia ia ratou ia faaohipa i te mana. E haamou atoa oia ia ratou i te taime ta ˈna i faataa.)

Gal. 6:10: “E teie nei, te vai nei ta tatou ravea, e hamani maitai tatou i te taata atoa, ia rahi atu râ i to te fetii faaroo ra.” (Eita te mau Kerisetiano mau e tapeapea i te hamani maitai i to ratou taata-tupu. Te pee nei ratou i te hiˈoraa o te Atua, o te faahiti nei i te mahana i nia i te feia maitatai e te feia iino.—Mat. 5:43-48.)

Mat. 5:14-16; MN: “O outou te maramarama o teie nei ao. . . . To outou maramarama, ia anaana ïa i mua i te aro o te taata nei, ia hiˈo ratou i ta outou [ohipa] maitai, e ia [faahanahana] i to outou Metua i te ao ra.” (Ia faahanahana te mau taata i te Atua ia ite ratou i te mau ohipa a te mau Kerisetiano, e tia i teie mau Kerisetiano ia poro ma te itoito i te iˈoa o Iehova e ta ˈna opuaraa e ati noa ˈˈe teie nei ao. Tera te ohipa ta te mau Kerisetiano mau e tuu nei i te parahiraa matamua i roto i to ratou oraraa.)

Eaha ta te mau ohipa e tupu ra na te ao nei e faaite ra no te tau i mua nei?

Hiˈo i te tumu parau “Mahana hopea.”