I te aahiata o te sabati, ua rave aˈera o Maria i Magadala e o Maria te metua vahine o Iakobo, e oia atoa o Salome, o Ioana, e te tahi atu mau vahine, i te mau raau noanoa i te menema no te faaineine i te tino o Iesu. A haere noa ˈi ratou, ua na ô aˈera ratou ratou iho: “Na vai ra e huri i te ofai i te uputa o te menema ra ia tatou?” I to ratou râ taeraa ˈtu, ua ite atura ratou e ua aueue te fenua e ua huri ê te melahi a Iehova i te ofai. Ua haere te mau tiai, e aita e tino faahou i roto i te menema! Mataio 27:57–28:2; Mareko 15:42–16:4; Luka 23:50–24:3, 10; Ioane 19:14, 31 – Ioane 20:1; 12:42; Levitiko 23:5-7; Deuteronomi 21:22, 23; Salamo 34:20; Zekaria 12:10.

Pene 128

Ua ora o Iesu!

I TO te mau vahine iteraa e aita e tino faahou i roto i te menema o Iesu, ua horo atura o Maria i Magadala e faaite ia Petero raua o Ioane. Teie râ, ua faaea noa te tahi atu mau vahine i te menema. Aita i maoro, ua fa maira te hoê melahi e ua ani maira ia ratou ia tomo mai i roto.

I reira, ua ite atura te mau vahine i te tahi atu melahi, e ua na ô maira hoê o te mau melahi e: “Eiaha orua e mǎtaˈu, ua ite hoi au e te imi nei orua ia Iesu i [rîhia] nei [i nia i te pou]. Aore oia i ǒ nei, ua tia faahou aˈenei ïa, ta ˈna i faaite atea maira. A haere mai na, a hiˈo i te vairaa o te Fatu ra. A haere oioi na orua a parau atu i ta ˈna mau pǐpǐ, e ua tia faahou oia mai te pohe mai.” Ma te mǎtaˈu e te oaoa rahi, ua horo atoa ˈtura teie mau vahine.

I roto i taua area taime ra, ua farerei o Maria ia Petero e o Ioane, e ua faaite atura oia ia raua e: “Ua hopoi-ê-hia e ratou te Fatu i te menema ra i rapae, e aore matou i ite i te vahi i vaiihohia ˈi oia e ratou ra.” I reira iho, ua horo atura na aposetolo e piti. Mea vitiviti aˈe o Ioane—mea apî aˈe hoi oia—e o ˈna tei tapae na mua ˈtu i te menema. Ua reva ê na ïa te mau vahine, no reira, aita e taata faahou i reira. Ua piˈo ihora o Ioane i roto i te menema, e ua ite atura i te ahu vehî, ua faaea noa râ oia i rapae.

Ua tae maira o Petero, aita râ o ˈna i haamarirau e ua tomo atura i roto i te menema. Ua ite ihora oia i te ahu vehî e vai noa ra i reira e te ahu i ravehia no te vehî i te upoo o Iesu. Ua tavirivirihia i te hoê vahi. Ua tomo atoa maira o Ioane i roto i te menema, e ua tiaturi atura oia i te parau a Maria. Aita râ raua toopiti atoa ra i taa e ua faatia-faahou-hia mai o Iesu, noa ˈtu e mea pinepine To ˈna parauraa mai e e tia faahou mai Oia. Ma te ahoaho, ua hoˈi atura raua i te fare, area o Maria ra, o tei hoˈi mai i te menema ra, ua faaea mai ïa oia.

I roto i taua taime ra, ua horo te tahi atu mau vahine e faaite i te mau pǐpǐ e ua faatia-faahou-hia mai o Iesu, mai ta te mau melahi i faaue mai ia raua. A horo noa ˈi raua, ua farerei maira o Iesu ia raua e ua na ô atura: “Ia ora na.” Ua tipapa ihora raua i mua i to ˈna avae, e ua tahopu atura ia ˈna. Ua na ô atura o Iesu: “Eiaha e mǎtaˈu; a haere a parau atu i tau mau taeae e haere ratou i Galilea, ei reira ratou e ite mai ai ia ˈu.”

Na mua ˈtu, a aueue ai te fenua e a fa mai ai te mau melahi, ua rurutaina te mau faehau e tiai ra i te mǎtaˈu e ua riro maira mai te taata pohe ra te huru. I te îho-faahou-raa mai to ratou hiroa, ua haere oioi atura ratou i te oire e faaite i te mau tahuˈa rahi i te ohipa i tupu. I muri aˈe i to ratou paraparauraa e te “feia paari” i rotopu i te mau ati Iuda, ua faaotihia ˈtura e tamata i te tapoˈi i teie ohipa na roto i te petaraa i te mau faehau. Ua faaue atura ratou e: “E parau outou e, Na ta ˈna iho mau pǐpǐ i tii mai e i eiâ ia ˈna i te po te taoto ra matou.”

I te mea e e nehenehe te mau faehau roma e faautuahia i te utua pohe no te mea ua varea ratou i te taoto i to ratou tiairaa, ua tǎpǔ atura te mau tahuˈa e: “E ia tae noa ˈtu teie nei parau [e ua varea outou i te taoto] i te tariˈa o te tavana ra, na matou ïa e taparu atu ia ˈna, e ora outou.” Ua rave ihora te mau faehau mai tei faauehia mai, no te mea e moni rahi tei petahia mai. No reira, ua parare roa ˈˈera te parau haavare no nia i te eiâraahia te tino o Iesu i rotopu i te mau ati Iuda.

Te oto noa ra o Maria i Magadala, tei faaea mai i te menema. Teihea roa o Iesu? Ua piˈo ihora oia no te hiˈo i roto i te menema, ite atura oia na melahi e piti ma te ahu teatea o tei fa faahou mai! Te parahi noa ra hoê i te pae upoo e te tahi i te pae avae i te vahi i reira te tino o Iesu i te taravaraa i mutaa iho. Ua ani maira raua: “Eaha oe i oto ai, e tera ra vahine?”

Ua pahono atura o Maria e: “No tau Fatu i hopoi-ê-hia e ratou nei, e aore au i ite i te vaiihoraahia e ratou ra.” Ua fariu atura oia i muri e ua ite atura i te tahi atu taata o tei ani faahou mai: “E tera ra vahine, eaha oe i oto ai?” E ua ani atoa mai oia e: “O vai ta oe e imi na?”

Ua manaˈo oia e o te taata tiai i te ô tei reira te memena, e ua na ô atura oia ia ˈna e: “E hoa, na oe oia i hopoi ê ra, e faaite mai oe i te vaiihoraahia oia e oe na, e na ˈu oia e tii atu e hopoi ê.”

Ua parau maira teie taata e: “E Maria.” I reira iho, ua taa ˈtura ia ˈna e o Iesu tera, na roto i ta ˈna huru paraparauraa mai ia ˈna. Ua pii atura oia: “E Raboni,” (oia hoi te auraa, “E te Orometua!”). E ma te oaoa rahi, ua haru ihora oia ia ˈna. Ua na ô atura râ o Iesu e: “Eiaha e tapea mai ia ˈu; aore â vau i tae i nia i tau Metua ra: e haere râ oe i tau mau taeae ra, e parau atu ia ratou e, Te haere nei au i tau Metua ra e to outou Metua ra, e i tau Atua ra e to outou Atua ra.”

Ua horo atura o Maria i te vahi i reira te mau aposetolo e te mau pǐpǐ i haaputuputu ai. Ua apiti atoa ˈtura oia i ta ˈna faatiaraa i te parau ta te tahi atu mau vahine i faaite atu no nia i to ratou iteraa ia Iesu tei faatiahia mai. Teie râ, mai ta ratou i ore i tiaturi i te mau vahine matamua, aita atoa teie mau taata i tiaturi i te parau a Maria. Mataio 28:3-15; Mareko 16:5-8; Luka 24:4-12; Ioane 20:2-18.

▪ I muri aˈe i to ratou iteraa e aita e tino faahou i roto i te menema, eaha ta Maria i Magadala i rave, e eaha te ohipa ta te tahi atu mau vahine i farerei?

▪ Eaha te huru o Petero raua o Ioane i to raua iteraa i te menema aore e tino i roto?

▪ Eaha ta te tahi atu mau vahine i ite i to ratou haereraa ˈtu e faaite i te parau no te tia-faahou-raa mai o Iesu i te mau pǐpǐ?

▪ Eaha tei roohia i nia i te faehau tiai, e eaha tei pahonohia mai i to ratou faaiteraa ˈtu i te parau i te mau tahuˈa ra?

▪ Eaha te ohipa i tupu i to Maria i Magadala faaea-noa-raa i te menema, e eaha te huru o te mau pǐpǐ i mua i te mau parau a te mau vahine?

UA PARUPARU roa te manaˈo o te mau pǐpǐ. Aita ratou e taa ra e no te aha e ua moe te tino i roto i te menema, e aita atoa hoi ratou e tiaturi ra i te parau a te mau vahine. No reira, i muri aˈe i taua mahana sabati ra, ua faarue maira o Keleopa e te tahi atu pǐpǐ ia Ierusalema no te haere atu i Emausa, fatata e 11 kilometera te atearaa.

I nia i te eˈa, ua paraparau noa raua no nia i te mau ohipa i tupu i taua mahana ra, e ua haere maira te hoê taata ěê ia raua ra. Ua ani maira: “Eaha tena na parau ta orua i paraparau noa na?”

Ua tapea ihora na pǐpǐ, ma te mata peapea, e ua pahono atura o Keleopa e: “O oe anaˈe na paha te taata ê i Ierusalema nei aore i ite i te mau mea i tupu i reira e teie nei pue mahana?” Ua ani maira oia: “Eaha ïa mau mea?”

“Ia Iesu i Nazareta ra,” o ta raua ïa i pahono atu. “E to tatou mau tahuˈa rarahi e te mau haava, i te tuuraa ˈtu ia ˈna ia faautuahia ia pohe, e ua [rî] hoi ia ˈna [i nia i te pou]. Area matou nei manaˈo ïa matou e, o te taata ïa e ora ˈi Iseraela nei.”

Ua faataa ˈtura o Keleopa e to ˈna hoa i te mau ohipa maere atoa i tupu i taua mahana ra—te parau no te faraa mai hau aˈe i te mana taata nei o te mau melahi e te menema aore e tino faahou i roto—ua faaite atoa râ raua i to raua taa ore no nia i te auraa o teie mau ohipa. Ua aˈo atura te taata ěê ia raua i te na ôraa ˈtu e: “Auê ïa pue taata manaˈo ore e, e te faaroo taiata i tei hope i te parauhia mai e te mau peropheta ra e! E ere anei ia na reirahia to te Mesia pohe e tia ˈi, a reva ˈtu ai i to ˈna ra ao?” I reira, ua tatara ˈtura oia i te auraa o te mau irava o te papai moˈa no nia i te Mesia.

I te pae hopea, ua tapae atura ratou i pihai iho ia Emausa, e ua rave ihora te taata ěê mai te mea râ e e haere noâ oia. No to raua hinaaro e ite hau atu â, ua titau atura na pǐpǐ e: “E faaea na tatou; ua huru ahiahi hoi.” Ua faaea maira oia no te tamaa. I to ˈna râ faahitiraa i te pure, to ˈna vahiraa i te pane e to ˈna horoaraa ˈtu na raua, ua ite aˈera raua e o ˈna mau â teie tei rave mai i te hoê tino taata. Ua moê râ oia.

Ua taa ˈtura ia raua i teie nei e mea nafea teie taata ěê i ite ai i teie mau parau atoa! Ua aniani ihora raua: “E ere, e hoa, i anaanatae to tâua aau ia ˈna i te paraparau mai ia tâua i te aratia ra, a faaite mai ai ia tâua i te auraa i te mau parau i papaihia ra.” Ma te ore e faataere, ua tia maira raua i nia e ua haere ru atura i Ierusalema, i reira to raua farereiraa i te mau aposetolo e te feia i haaputuputu e o ratou ra. Hou o Keleopa e to ˈna hoa i faaite ai i te parau, ua parau maira te tahi pae ma te horuhoru rahi: “Ua tia mau â te Fatu i nia, e ua faaite mai ia Simona.” Ua faaite atura na feia e piti e mea nafea to Iesu faraa mai i mua ia raua. E maha ˈtura ïa taime to ˈna faraa mai i taua mahana ra i mua i te mau pǐpǐ taa ê.

Ua fa taue maira o Iesu no te paeraa o te taime. Noa ˈtu e ua ponaohia te mau opani no te mea te mǎtaˈu ra te mau pǐpǐ i te mau ati Iuda, ua tomo maira oia, ua tia ˈtura i ropu mau ia ratou, e ua na ô maira: “Ia ora na outou.” Ua mehameha roa ˈˈera ratou, ma te tiaturi e te ite ra ratou i te hoê tupapau. No reira, ma te faaite atu e e ere oia i te tupapau, ua na ô atura Iesu e: “Eaha outou i hitimaue ai? eaha i tupu ai te manaˈo i to outou aau? A hiˈo mai na i tau rima e tau avae; o vai mau â; a fâfâ mai na ia ite; aita o te varua e iˈo e te ivi mai to ˈu nei, ta outou e hiˈo mai nei.” Aita râ ratou i tiaturi.

No te tauturu ia ratou ia tiaturi e o Iesu mau oia, ua ani atura oia e: “E maa ta outou e vai nei?” Ua rave maira oia i te tahi maa iˈa tunu, ua amu ihora e ua na ô atura: “Oia teie ta ˈu i parau atu ia outou a parahi atoa ˈi tatou ra [na mua ˈˈe i to ˈna pohe], e ia hope te mau parau atoa no ˈu i papaihia i roto i te ture a Mose, e te mau peropheta, e te salamo i te faatupuhia e tia ˈi.”

Ma te tamau noâ i te faataa ˈtu i te parau tei riro mai te hoê haapiiraa no nia i te Bibilia, ua aˈo maira o Iesu: “I na reirahia taua parau ra i te papai, e ia na reirahia to te Mesia pohe e tia ˈi, e ia tia faahou mai te pohe mai i te rui toru; e ia poro-haere-hia te tatarahapa e te faaoreraa i te hara i to ˈna ra iˈoa, na Ierusalema ˈtu nei â, e ati noa ˈˈe te mau fenua atoa e tia ˈi.”