Tunaweza kujifunza kuhusu umuhimu wa kuwa na moyo mnyoofu kwa kuchunguza pindi Yesu na Nathanaeli walipokutana kwa mara ya kwanza. Filipo alipomleta Nathanaeli, rafiki yake, akutane na Yesu, jambo la pekee lilitukia. Ingawa Yesu hakuwa amewahi kukutana na Nathanaeli, alisema hivi: “Ona, Mwisraeli kwa hakika ambaye hamna udanganyifu ndani yake.” (Yoh. 1:47) Yesu aliona unyoofu wa pekee wa Nathanaeli. Kama tu sisi, Nathanaeli alikuwa mtu ambaye si mkamilifu. Lakini hakuwa na unafiki wowote, badala yake alikuwa mnyoofu katika mambo yote. Yesu alivutiwa na jambo hilo na akampongeza Nathanaeli. Matakwa mengi ya kumpendeza Yehova yaliyoorodheshwa kwenye Zaburi ya 15 yanahusu jinsi tunavyowatendea wengine. Zaburi 15:3 inasema kwamba mgeni katika hema la Yehova “hachongei kwa ulimi wake, hamtendei jirani yake jambo lolote ovu, naye hawaharibii sifa rafiki zake.” Kutumia usemi wetu vibaya katika njia hizo kunaweza kuwadhuru sana wengine.—Yak. 1:26. w24.06 24:7, 9-10

Ukijitayarisha vizuri kwa ajili ya huduma, inaelekea kwamba utajihisi huru zaidi unapozungumza na wengine. Yesu aliwasaidia wanafunzi wake wajitayarishe kabla ya kuwatuma kwenda kuhubiri. (Luka 10:​1-11) Kwa kuwa wanafunzi hao walitumia mambo ambayo Yesu aliwafundisha, waliweza kutimiza mambo mengi na hilo lilifanya wawe na shangwe sana. Tunawezaje kujitayarisha kwa ajili ya huduma? Tunahitaji kufikiria jinsi tunavyoweza kuelezea kweli kwa njia yenye matokeo kwa maneno yetu wenyewe. Pia, ingefaa ikiwa utafikiria mapema njia mbili au tatu ambazo watu huitikia katika eneo tunalohubiri na kufikiria jinsi utakavyowajibu. Kisha, tunapozungumza na watu, tutajitahidi kutulia, kutabasamu, na kuwa wenye urafiki. w24.04 16:6-7

Kumpenda Yehova Mungu na jina lake takatifu ndiyo sababu muhimu zaidi inayotuchochea kuhubiri habari njema. Tunaiona huduma yetu kuwa njia ya kumsifu Mungu tunayempenda. Tunakubali kwa moyo wote kwamba Yehova Mungu anastahili kupokea utukufu, heshima, na nguvu kutoka kwa waabudu wake washikamanifu. Tunampa utukufu na heshima tunaposhiriki na wengine uthibitisho wenye kuridhisha kwamba Mungu ‘aliumba vitu vyote’ na kwamba tunaishi kwa sababu ametupatia uhai. Tunampa nguvu—nguvu zetu—tunapotumia wakati, nishati, na mali zetu ili tushiriki kikamili katika huduma kadiri hali zetu zinavyoturuhusu. (Mt. 6:33; Luka 13:24; Kol. 3:23) Kwa ufupi, tunapenda kuzungumza kumhusu Mungu tunayempenda. Pia, tunachochewa kuwaambia wengine kuhusu jina lake na maana ya jina hilo. w24.05 20:11