Génesis

16 Te Sarái, te yinam te Abrán, maba alajem. Ay jtul yabat te Agar sbiil, te jaʼ egipcia-ants. 2 Jaʼ yuʼun, te Sarái jich la yalbey te Abrán: «¡Chʼama awaʼiy, awokoluk! Te Jehová maba yakʼojbon kal. Jich yuʼun, awokoluk, jokina ta wayel te j-abat kuʼun, jichniwan ya jta kal ta swenta». Te Abrán la schʼuun spasel te bin albot yuʼun te Sarái. 3 Kʼalal te Abrán ayix lajuneb jaʼbil yak ta nainel ta skʼinal Canaán, te Sarái la yikʼ tal te yabat Agar yuʼun ya yakʼbey yinamin te Abrán, te smamalal. 4 Te Abrán la sjokin ta wayel te Agar, jich la sta yal te Agar. Pero, kʼalal la snaʼ stojol te yikʼoj yal ta schʼujt, jajch spʼaj te Sarái, te yajwale.

5 Ta swenta-abi, te Sarái jich la yalbey te Abrán: «Jaʼat amul te yak yakʼbelon jwokole. La kakʼbat ta akʼab te kabat, pero kʼalal la snaʼ stojol te yikʼoj yal ta schʼujt, jajch spʼajon. Akʼa schajpanotik ta jchebaltik te Jehová». 6 Te Abrán jich la yalbey te Sarái: «Jaʼat ay ta akʼab te j-abat awuʼun, pasa ta stojol te bin lek ya awile». Tey-abi, te Sarái la yutsʼin,* jich lokʼ bael ta anel te Agar.

7 Ta patil, te chʼul-abat yuʼun Jehová la sta te Agar te banti slokʼib jaʼ ta jochol takin kʼinal, te slokʼib jaʼ-abi ay ta be te ya xbajt ta stojol Sur. 8 Jich la yalbey: «Agar, te yabat Sarái, ¿banti talat sok banti ya xbaat?». Te Agar jich la yal: «Yakon ta anel ta stojol te Sarái, te kajwale». 9 Te chʼul-abat yuʼun Jehová jich la yalbey: «Sujtan bael ta stojol te awajwale, akʼa aba ta wentainel ta stojol sok spekʼelil awoʼtan». 10 Ta patil, te chʼul-abat yuʼun Jehová jich la yal: «Ya kakʼ te kʼax bayal ya xkʼot te atsʼumbale. Kʼax bayal ya xkʼot te ma xjuʼ ta ajtayel». 11 Te chʼul-abat yuʼun Jehová jich la yanxan: «Awikʼoj awal ta achʼujt sok ya x-ayin* jtul akerem-al. Yame awakʼbey sbiilin Ismael,* melel te Jehová la yaʼiy stojol te yakat ta okʼel yuʼun te awokole. 12 Te akerem-al jichme ya xkʼot te bin-utʼil jaʼmal burro.* Yame skontrain ta spisilik sok spisilik yame xkontrainotik yuʼun. Nopol* ya xnain* te banti ay te yermanotake».

13 Tey-abi, te Agar la yalbey sbiil te Jehová, te machʼa yak ta kʼop* soke, jich la yalbey: «Jaʼat jun Diosat te ya awil spisil». Jich la yal, melel jich la snop ta yoʼtan: «¿Yuʼun-nixbal jich-a te la yilon liʼi te machʼa ya yil spisile?». 14 Jaʼ yuʼun, te pozo-abi te ay ta yolil te Cadés sok Bered, la sbiilin Beer-Lahái-Roí.* 15 Te Agar ayin* yal te jaʼ snichʼan te Abrán. Te Abrán la yakʼbey sbiilin Ismael te snichʼan te akʼbot yuʼun te Agar. 16 K’alal te Agar la yayintes* te Ismael, ayix 86 yaʼbilal-a te Abrán.