Te lek yachʼil kʼop ya yal te Mateo

14 Ta yorail-abi, te Herodes* te jaʼ ajwalil ta skʼinal Galilea la yaʼiybey skʼoplal te Jesús, 2 jich la yalbey te j-abatetik yuʼune: «Jaʼ te Juan J-akʼ-ichʼjaʼ te la yichʼ chaʼkuxajtesel ta yolil te machʼatik lajemike, jaʼ yuʼun ya xjuʼ yuʼun spasel te milagroetik-abi». 3 Te Herodes la yakʼ ta tsakel te Juan, la schuk ta cadena sok la yakʼ ta chukel ta skaj te Herodías te jaʼ yinam te Filipo, te jaʼnix sbankil te Herodese. 4 Melel bayal buelta jich alulanbot yuʼun te Juane: «Ma lekuk te awinaminoj te ants ini». 5 Te Herodes yoʼtan ya smil te Juane, pero ma la spas ta skaj te xiʼoj te ants winiketike, melel jich yilojik bin-utʼil j-alwanej te Juane. 6 Te kʼalal yak ta pasbeyel skʼin-a te Herodes ta skaj te lokʼ yaʼbilal, te achʼix yuʼun te Herodías ajkʼotaj ta kʼin-abi, kʼaxto la smulan te Herodes, 7 jaʼ yuʼun jamal la yalbey te achʼix te ya yakʼbey chikan te bin ya xkʼanbot yuʼune. 8 Ta skaj te sujot yuʼun te snane,* jich la yal te achʼixe: «Akʼbon liʼ ta mukʼul plato te sjol te Juan J-akʼ-ichʼjaʼe». 9 La smel yoʼtan yuʼun te ajwalile; pero ta skaj te ay bin yalojix ta jamale sok te la yaʼiy stojol te machʼatik ikʼbilik yuʼune, la yal mantal te akʼa yichʼ akʼbeyel te bin la skʼan te achʼixe. 10 Jich yuʼun la stikun ta xotʼbeyel* lokʼel sjol te Juan te ay ta chukojibal-ae. 11 Jich la spachbeyik tal ta mukʼul plato te sjol te Juane sok la yakʼbeyik te achʼixe, patil bajt yakʼbey te snane.* 12 Tey-abi, te jnopojeletik yuʼun te Juan tal yichʼbeyik bael te sbakʼetal sok la smukik. Patil bajt yalbeyik yaʼiy te Jesuse. 13 Te kʼalal la yaʼiy stojol te Jesús te bin kʼot ta pasele, lokʼ bael tey-a, och ta barco, kʼejel bajt yuʼun, melel stukel ya skʼan ya x-ayin. Te kʼalal la yaʼiyik stojol te banti bajte, bayal ta tul ants winiketik la stʼunik bael ta yokik.

14 Te kʼalal kʼot ta stiʼil mar te Jesuse, la yil te kʼax bayal ta tul te ants winiketike, kʼaxto la snaʼbey yoʼbolil sbaik, jaʼ yuʼun la slekubteslan te machʼatik ayik ta chamele. 15 Te kʼalal malix-a te kʼajkʼale, te jnopojeletik noptsajik* ta stojol te Jesús sok jich la yalbeyik: «Kʼax namal* te banti ayotike sok malix te kʼajkʼale. Tikunaix bael spisil te ants winiketik ta smanel sweʼelik ta chʼin lumetik». 16 Pero, jich albotik yuʼun te Jesús: «Ma puersauk te ya xbajtike. Akʼbeya sweʼelik jaʼex». 17 Jich la yalbeyik te Jesús: «Jaʼnax ay joʼpejch pan kuʼunkotik sok chaʼkojt chay». 18 «Ichʼbonik tal», xchi te Jesuse. 19 Tey-abi la yalbey te ants winiketik te akʼa snajkan sbaik ta akiltik. La stsak te joʼpejch pan sok te chaʼkojt chaye, la stoy moel sit ta chʼulchan sok la skʼopon te Diose. Ta patil la xetʼtiklan te panetik sok la yakʼbey te jnopojeletik, jich te jnopojeletik la spukbeyik te tsobol ants winiketike. 20 Jich weʼik ta spisilik sok noj schʼujtik. La stsobik te sobrail jile, noj 12 ta pajch moch. 21 Ayniwan 5 mil ta tul winiketik te weʼike, maba la yichʼ ajtayel tey-a te antsetik sok te alaletike. 22 Tey-abi, ta oranax la stikun moel ta barco te jnopojeletik swenta ya xkʼaxik ta jejch mar, yan stukel te Jesús jil ta skʼoponel te ants winiketike.

23 Te kʼalal bajtikix-a te ants winiketike, te Jesús mo bael stukel ta wits ta skʼoponel te Diose. Teyto ay stukel-a te kʼalal ijkʼub te kʼinale. 24 Ta yorail-abi ayix cheʼoxeb kilómetro yochel bael-a te barcoe, tulan yak ta yukʼilanel yuʼun te yip sbul te mare, melel yak ta tenel sujtel yuʼun te ikʼe. 25 Pero, te kʼalal ya sakubix-a te kʼinale,* te Jesús bajt te banti ayik te jnopojeletike, yak ta beel ochel ta ba jaʼ. 26 Te kʼalal la yilik te jnopojeletik te ay machʼa yak ta beel tal ta sba te mare, xiwik yuʼun sok jich la yalik: «¡Aay!, ¿bin-a te yak ta talele?», xchiik. Jajchik ta aw yuʼun xiwel. 27 Pero, jich albotik ta oranax yuʼun te Jesuse: «¡Ayukme smukʼul awoʼtanik! Joʼonme. Mame xiwex». 28 Jich la yal te Pedro: «Kajwal, teme jaʼate ala ta mantal te ya xbeenon tal ta ba jaʼ te banti ayate». 29 Jich albot yuʼun te Jesús: «¡Laʼ!». Jich lokʼ ta barco te Pedro, och ta beel ta ba jaʼ, bajt ta stojol te Jesuse. 30 Pero, te kʼalal la yil te tulan ikʼe, xiw yuʼun. Te bitʼil jajch ta mulel koel ta jaʼe, jich jajch ta aw: «¡Kajwal, koltayawon!». 31 Te Jesús oranax la stsakbey skʼab te Pedroe, jich la yalbey: «Winik te maʼyuk lek schʼuunel awoʼtane, ¿bin yuʼun te xchebet awoʼtane?». 32 Te kʼalal ochik ta barcoe, lamaj te ikʼe. 33 Te machʼatik ayik ta barcoe la snijan sbaik ta stojol te Jesuse sok jich la yalbeyik: «Ta melel, jaʼat te sNichʼanat te Diose». 34 Te kʼalal kʼaxik ta jejch mar, kʼotik ta skʼinal Genesaret.

35 Te kʼalal la yilik te jaʼ te Jesuse, te winiketik yuʼun te lugar-abi la spukbeyik skʼoplal ta spamal te skʼinalike. Jich te ants winiketike la yikʼik tal ta stojol spisil te machʼatik ayik ta chamel yuʼunike. 36 La skʼanbeyik wokol te jaʼuknax ya x-akʼbotik spikik te stiʼil snajtil kʼuʼe, spisil te machʼatik la spikbeyik te skʼuʼe, lekubik yuʼun.