Te lek yachʼil kʼop ya yal te Marcos

7 Te fariseoetik sok chaʼoxtul escribaetik te talemik ta Jerusalén la sjoytayik te Jesuse. 2 La yilik te bitʼil boloben skʼoplal te skʼabik te ochik ta weʼel chaʼoxtul jnopojeletik yuʼun te Jesús, melel maba spokojik.* 3 (Te fariseoetik sok spisil te judioetik maba ya xweʼik teme maba spokoj skʼabik kʼalalto ta xujkʼubik,* melel jaʼ stʼunojbeyik scostumbreik te antiguo smeʼ statike. 4 Te kʼalal ya sujtik tal ta mercadoe, maba ya xweʼik teme maba nail ya spok sbaike. Jaʼnix jich ya stʼunik yantik namey costumbreetik, jich bitʼil te ya smulik ochel ta jaʼ te copaetik, jarraetik sok te bintik pastiklanbil ta cobre). 5 Jich yuʼun, te fariseoetik sok te escribaetik jich la sjojkʼoybeyik te Jesuse: «¿Bin yuʼun te jnopojeletik awuʼun ma stʼunik te costumbre yuʼun te antiguo jmeʼ jtatike? ¿Bin yuʼun te boloben skʼoplal skʼabik te kʼalal ya x-ochik ta weʼele?». 6 Jich albotik yuʼun te Jesús: «Jchaʼlam-oʼtanex,* jaʼ swentail te jich la stsʼibaybeyex jilel akʼoplalik te j-alwanej Isaiase: ‹Te ants winiketik ini ta sbanax ye ya yichʼonik ta mukʼ, pero te yoʼtanike namal* ay ta jtojol. 7 Tojolnax te ya awichʼonik ta mukʼe, melel skʼopnax winiketik te bin ya awakʼik ta nopele›. 8 Te jaʼexe ya awijkitayik stʼunel te mantaliletik yuʼun te Diose, jaʼ ya atʼunik te costumbreetik yuʼun te winiketike».

9 Jich albotikxan yuʼun te Jesús: «¡Mero ya anaʼik ta lek smukel jilel te mantaliletik yuʼun te Diose, yuʼun jaʼ ya awakʼik ta chʼuunel te costumbreetik awuʼunike! 10 Te Moisés jich la yal: ‹Ichʼa ta mukʼ te atat sok te anan›,* sok ‹Te machʼa ya sbolkʼoptay te stat o te snan, yame yichʼ milel›. 11 Yan te jaʼexe jich ya awalik: ‹Te machʼa jich ya yalbey te stat o te snan:* «Spisil te bin ay kuʼun te ya xjuʼ ya kakʼbate jaʼ corbán»› —te ya skʼan ya yal te jaʼ jun majtanil ta stojol te Diose—. 12 Jich maba ya awakʼikix-a te ya skoltay te stat o te snan* te ants winike. 13 Jaʼ jich ya alajinbeyik skʼoplal te skʼop Dios ta skaj te ya awakʼik ta nopel te costumbreetik awuʼunike. Sok aytoxan bayal bintik ya apasik te pajal sok ini». 14 Tey-abi la skʼanbey yan buelta te ants winiketik te akʼa noptsajukik* tal ta stojol sok jich la yaltiklanbey: «Chʼambon awaʼiyik te jkʼope sok kʼotuk ta awoʼtanik te bin ya kalbeyexe. 15 Te winike maba ya xbolobtesot yuʼun te bin ya x-och ta ye, jaʼ ya xbolobtesot yuʼun te bin ya xlokʼ tal ta yoʼtane». 16 *

17 Te kʼalal la yijkitay jilel te ants winiketike, te Jesús och ta yutil na sok jojkʼoybotik yuʼun te jnopojeletik te bin swentail te lokʼombakʼop la yale. 18 Jich albotik yuʼun te Jesús: «¿Yuʼunbal mato xkʼot ta awoʼtanik-euk te bin la kale? ¿Yuʼunbal ma xa anaʼik te ma xbolobtesot yuʼun te bin ya x-och ta ye te winike? 19 Melel maba ya x-och bael ta yoʼtan, ya xkʼot ta schʼujt, patil ya xbajt schʼay jilel ta letrina». Jich la yakʼ ta naʼel te lek spisil te weʼelile. 20 Jich la yalxan: «Te bin ya xlokʼ tal ta yoʼtan te winike, jaʼ ya xbolobtesot yuʼun. 21 Melel ta yoʼtan te ants winiketik ya xjajch tal spisil te bin ma lekuke: mulwej,* elekʼ, milaw, 22 antsiwej, antsinel, bikʼtal oʼtanil, bintik ma lek ta pasel, loʼlaywanej, maʼyuk kʼexlalil ta skʼaxuntayel mantal,* sbikʼtal oʼtantayel te bintik ay yuʼun te yantike, bolkʼoptaywanej, toybail sok bol-oʼtanil. 23 Spisil ini ya xlokʼ tal ta oʼtanil sok jaʼ ya sbolobtes te ants winike».

24 Lokʼ bael tey-a te Jesuse, bajt ta skʼinal Tiro sok Sidón. Och ta na, melel ma la skʼan te ya yichʼ naʼel te kʼot tey-ae, pero lananix snaʼik stojol-a. 25 Ay jtul ants te ay jtul achʼix yuʼun te ochem pukuj ta yoʼtane. Te kʼalal la yaʼiybey skʼoplal te Jesuse, tal ta oranax, la skejan sba ta stojol. 26 Jaʼ griega-ants, te jaʼ slumal Fenicia te ay ta skʼinal Siria, la skʼanbey bayal wokol te Jesús te yakuk slokʼesbey te pukuj te ochem ta yoʼtan te achʼix yuʼune. 27 Jich albot yuʼun te Jesús: «Jaʼ nail akʼa nojuk schʼujtik te alnichʼanetike, melel ma snujpʼuk te ya yichʼ pojbeyel span te alnichʼanetik yuʼun ya yichʼ akʼbeyel te alal tsʼiʼetike». 28 Jich la yal te ants: «Melelnix-a, Kajwal, pero te alal tsʼiʼetik te ay ta yeʼtal mesa jaʼ ya sweʼik te xejtʼelul weʼelil ya xchʼay koel yuʼun te alaletike». 29 Jich la yalbey te ants: «Junukme awoʼtan ya xbaat. Ta swenta te jich la awale, lokʼix te pukuj te ochem ta yoʼtan te achʼix awuʼune». 30 Jich bajt ta sna te antse. Te kʼalal kʼote, wayal kʼot sta te achʼix yuʼune sok lokʼemix-a te pukuj ochem ta yoʼtane.

31 Te Jesús la yijkitay jilel te skʼinal Tiro, kʼax bael ta Sidón sok ta skʼinal Decápolis,* kʼot ta mar yuʼun Galilea. 32 La yikʼik tal ta stojol jtul kojkchikin te jaʼnix jich wokol ya xlokʼ te skʼope sok la skʼanbeyik wokol te yakuk skajan skʼab ta stojole. 33 Te Jesús namal* la yikʼ bael ta stojol te ants winiketike. La yotses te yal skʼab ta jujun schikin te winike. Te kʼalal tubataj te Jesuse, la spikbey te yakʼe. 34 Ta patil la yil moel te chʼulchane, la sjikʼ yoʼtan sok jich la yal «Éffatha» te ya skʼan ya yal «Akʼa jamuk». 35 Oranax jam te schikine sok lek jajch ta kʼop. 36 Tey-abi, te Jesús la yalbey ta mantal te ants winiketik te manchuk ayuk machʼa ya yalbeyik yaʼiye. Manchukme bayal buelta jich la spastiklan ta mantal, kʼaxtoxan la spukik ta alel-a. 37 Mero chamnax yoʼtanik* yuʼun, sok jich la yalik: «Kʼax lek spisil te bin ya spase. ¡Ya yakʼ jamuk schikin te kojkchikinetik sok ya yakʼ kʼopojuk te umaʼetike!».