Yaʼtel te Jpuk-kʼopetik

2 Ta yorail-abi, ta skʼajkʼalel te Kʼin yuʼun Pentecostés, ta spisilik jun-nax te banti stsoboj sbaik-ae. 2 Ta repentenax ay bin kʼopoj tal ta chʼulchan, jich te bin-utʼil tulan ikʼ te xjuʼetnaxe,* jul spul sba ta yutil na te banti nakajtike. 3 La yilik te chiknaj chʼin kʼajkʼ te jich yilel te bin-utʼil xlemlon kʼajkʼ te la spuk sba ta stojolik ta jujuntul. 4 Ta spisilik noj ta yoʼtanik te chʼul espíritu,* jich jajchik ta kʼop ta yanyantik kʼopiletik, jaʼ chikan te bin kʼopil akʼotik ta kʼop yuʼun te chʼul espíritu.

5 Ta yorail-abi ay judioetik ta Jerusalén te jun yoʼtan schʼuunojik Dios te talemik ta spisil nacionetik te ayik ta balumilal. 6 Jich yuʼun, te k’alal la yaʼiyik stojol te bin kʼopoje, la stsob sbaik tal te ants winiketik te ma snaʼik te bin kʼot ta pasele, melel ta jujuntul la yaʼiyik ta skʼopiknix te bin yakik ta yalel te jnopojeletike. 7 Ta swenta-abi chamnax yoʼtanik* yuʼun sok jich la yalik: «Ilawilik, ¿mabal jaʼuk galileoetik te machʼatik yakik ta kʼope? 8 ¿Bin-utʼil ay-a te ya skʼoponotik ta jkʼoptiknix ta jujuntule? 9 Melel ay talemotik ta Partia, Media, Elam, ta skʼinal Mesopotamia, Judea, Capadocia, Ponto sok ta skʼinal Asia, 10 ta Frigia, Panfilia, Egipto sok ta skʼinal Libia te nopol* ay ta Cirene, jaʼnix jich ay judioetik sok jyanlumetik te yakʼoj sbaik ta judioil te talemik ta Roma, 11 ay talemotik ta Creta sok ta Arabia, ta jpisiltik la kaʼiytik ta jkʼoptiknix te yutsil yaʼtel te Diose». 12 Ta melel, ta spisilik chamnax yoʼtanik* yuʼun sok ma snaʼik te bin ya spasik yuʼune, jich jajch yalbey sbaik: «¿Bin swentail ini?». 13 Pero, ay yantik te jajchik ta labanwanej sok jich la yalik: «Yuʼun yuchʼojik chiʼil vino».*

14 Pero, te Pedro la stejkʼan sba sok te 11 ta tul jpuk-kʼopetike, jich tulan kʼopoj ta stojol te ants winiketik: «Winiketik yuʼun Judea sok ta apisilik te nainemex ta Jerusalén, chʼama awaʼiyik ta lek te bin ya kalbeyexe sok naʼaik ini. 15 Ta melel, maba yakubenik te ants winiketik ini jich te bin-utʼil ya awalike, melel balunebtonax ora sakubel kʼinal. 16 Te bin yak ta kʼoel ta pasele jaʼ te bin albil jilel yuʼun te j-alwanej Joel: 17 ‹Ta slajibal kʼajkʼal bael —xchi te Diose— ya jmal koel tal te chʼul espíritu* kuʼun ta stojol spisil te ants winiketik. Te achʼix keremetik awuʼunik yame xkʼopojik jich bin-utʼil j-alwanejetik, te jchʼieletik awuʼunik ayme bin ya yilik ta najalsitil,* te meʼel mamaletik awuʼunik ayme bin ya swayichinik, 18 ta yorailnix-abi ya jmal koel tal te chʼul espíritu* kuʼun ta stojol te j-abatetik kuʼun chikan teme ants o winik, yame xkʼopojik jich bin-utʼil j-alwanejetik. 19 Yame jpas mukʼul aʼteliletik ta chʼulchan sok milagroetik* ta balumilal: yame xchiknaj chʼichʼ, kʼajkʼ sok bayal chʼail. 20 Yame x-ijkʼub te kʼajkʼale sok yame xkʼatpʼuj ta chʼichʼ te u te kʼalal mato xtal-a te smukʼul kʼajkʼalel te Jehová* te ay yutsilal. 21 Spisil te machʼa ya skʼan koltayel ta sbiil te Jehová* yame sta skolel›.

22 »Winiketik yuʼun Israel, aʼiya awaʼiyik stojol ini: te Jesús te Nazarenoe jaʼ jtul winik te lek ilot yuʼun Dios kʼalal la spas mukʼul aʼteliletik sok milagroetik* ta awolilik ta swenta te Diose, jich te bin-utʼil anaʼojike. 23 Te winik ini la yichʼ akʼel ta kʼabal jich te bitʼil chajpanbilix skʼoplal-ae sok te snaʼojix ta nailal-a te Diose, jaʼexnix la ajijpanik ta teʼ ta swenta te chopol winiketik* te la smilike. 24 Pero chaʼkuxajtesot yuʼun te Diose, koltayot lokʼel yuʼun ta skʼuxul te lajele, melel te lajele ma juʼ yuʼun te jkʼaxel la yuʼunine. 25 Melel jich la yal te David ta stojol: ‹Spisil-ora ay ta jtojol te Jehová,* melel ay ta jwaʼel kʼab yuʼun jich maʼyuk bin ya syukʼilanon. 26 Jaʼ yuʼun, ay sbujtsʼ koʼtan sok tseʼelnax koʼtan ya xkʼopojon. Ay smukʼul koʼtan te ay bin ya jmaliye, 27 melel maba ya awijkitayon ta Mukenal,* sok maba ya awakʼ te ya xkʼaʼ sbakʼetal te j-abat awuʼun te jun yoʼtane. 28 Awakʼojbon kil te beetik yuʼun te kuxlejalile. Ya awakʼbon bayal stseʼelil koʼtan te kʼalal ayonix ta atojol-ae›.

29 »Kermanotak, ya jkʼan ya kalbeyex ta jamal ta swenta te jtatik David, laj sok la yichʼ mukel, sok chikanto te smukenal jaʼto ta ora ini. 30 Jich bin-utʼil j-alwanej sok te snaʼoj te albil ta jamal yuʼun Dios te jtul ta stsʼumbal ya xnajkaj ta smukʼul naktajib. 31 Jich kʼoem te nail la yil te chaʼkuxaj te Cristo sok la yalbey skʼoplal, la yal te maba la yichʼ ijkitayel jilel ta Mukenal* sok te maba kʼaʼ te sbakʼetale. 32 Te Jesús chaʼkuxajtesot yuʼun te Diose, jpisiltik testigootik yuʼun te jich kʼot ta pasel. 33 Te bitʼil la yichʼix toyesbeyel skʼoplal ta swaʼel kʼab te Diose sok te akʼbotix yuʼun te Tatil te chʼul espíritu* te albil skʼoplale jaʼixme te bin yakex ta yilel sok te yakex ta yaʼiyel stojol te la yichʼix malel ta jtojolkotike. 34 Melel te David maba mo bael ta chʼulchan, pero jaʼnix la yal: ‹Te Jehová* jich la yalbey te Kajwale: «Naklan ta jwaʼel kʼab 35 jaʼto te kʼalal ya kakʼbat te akontratak jich te bin-utʼil skajtajib awok»›. 36 Jich yuʼun, akʼa snaʼik ta jamal spisil te lum Israel te Dios la yakʼ kʼotuk ta Kajwaltik sok ta Cristo te Jesús te jaʼexnix la amilik te kʼalal la ajijpanik ta teʼe».

37 Te kʼalal la yaʼiyik stojol ini, kʼax kʼux la yaʼiyik kʼalalto ta yoʼtanik, jaʼ yuʼun jich la sjojkʼoybeyik te Pedro sok te yantik jpuk-kʼopetike: «Kermanotak, ¿bin ya skʼan ya jpaskotik?». 38 Jich albotik yuʼun te Pedro: «Sujtesa awoʼtanik, sok ichʼaik jaʼ* ta jujuntul ta swenta sbiil te Jesucristo, yuʼun jich ya awichʼik pasbeyel perdón yuʼun te amulike, sok jich ya awichʼik te majtanil te jaʼ te chʼul espiritue.* 39 Melel te bin yaloj ta jamal te Diose jaʼ awuʼunik sok te awal anichʼnabike, ta spisil te machʼatik namal ayik soknix spisil te machʼatik ya skʼan ya yikʼ tal te Jehová* te Dios kuʼuntike». 40 Te Pedro la scholbeyxan yaʼiyik ta lek* te skʼop Diose sok jich la yakʼtiklanbey tsitsel:* «Lokʼanik tal ta yolil te chopol jkaj tsʼumbalil ini». 41 Jich la yichʼik jaʼ* spisil te machʼatik la schʼuunik te bin la yal te Pedro. Ta kʼajkʼal-abi ayniwan 3 mil ta tul te ochik ta jnopojele. 42 Jaʼ bajt ta yoʼtanik snopel te bin la yakʼik ta nopel te jpuk-kʼopetike, jun-nax yoʼtan la sjokin sbaik,* jaʼnix jich la sjokin sbaik ta weʼel sok ta skʼoponel Dios.

43 Spisil te ants winiketik jajchik ta xiwel, te jpuk-kʼopetik jajchik ta spasel bayal mukʼul aʼteliletik sok milagroetik.* 44 Spisil te machʼatik la schʼuunik Dios jun-nax la yakʼ sbaik sok la yakʼbey sbaik spisil te bintik ay yuʼunike, 45 la schon skʼinalik sok te bintik ay yuʼunik, te takʼin la staike la spuktiklanbey te yantik jaʼ chikan te bin-utʼil ya xtuun yuʼunike. 46 Jujun kʼajkʼal la stsob sbaik ta templo sok jun-nax te bin ya spasik tey-ae, la yikʼ sbaik ta weʼel ta snaik sok tseʼelnax yoʼtan la yakʼbey sbaik te sweʼelike, jaʼnix jich spisil yoʼtanik 47 la yalbeyik yutsil skʼoplal te Dios sok leknax jajchik ta ilel yuʼun te ants winiketik. Ta yorailnix-abi, ta jujun kʼajkʼal te Jehová* la yikʼtiklan tal te machʼatik yakik ta stael skolelik sok jun-nax la yakʼ sok te yantik jnopojeletike.