Schebal carta ta stojol te Corintioetik

2 La jta ta nopel te maba ya jkʼan ya kakʼbeyex amel awoʼtanik te kʼalal ya xbajt kilex yan bueltae. 2 Melel teme ya kakʼbeyex amel awoʼtanike, ¿machʼa ya yakʼbon smukʼul kʼinal kaʼiy? Jaʼnax te machʼa la kakʼbey smel yoʼtane. 3 Jaʼ swentail te la jtsʼibaybeyex ini yuʼun jich te kʼalal ya xkʼoon, ma jkʼan te ya yakʼbonik jmel koʼtan te machʼatik ya skʼan ya yakʼbonik stseʼelil koʼtane, melel schʼuunoj koʼtan te bin ya yakʼbon stseʼelil koʼtane, jaʼnix jich ya yakʼbeyex stseʼelil awoʼtanik-euk te jaʼexe. 4 Ayon ta okʼel-a te kʼalal la jtsʼibaybeyex te carta ini ta skaj te ayon ta mel-oʼtan-a sok te pichʼil koʼtan ta atojolike, pero ma jaʼuk la jtsʼibaybeyex yuʼun ya kakʼbeyex amel awoʼtanik, jaʼ la jkʼan te la kakʼbeyex anaʼik te bayal kʼuxex ta koʼtane.

5 Jich yuʼun, teme ay machʼa yakʼoj mel-oʼtane, maba yakʼojbon jmel koʼtan te joʼone, jaʼex la yakʼbeyex amel awoʼtanik ta apisilik sok ay chaʼoxtulex te kʼaxtoxan ameloj awoʼtanik yuʼune (ma jkʼan ya kalbeyxan bayal skʼoplal-abi). 6 Tikʼukix-a te tulan tojobtesel la awakʼbeyik te winik-abi te jteb ma apisilukik la awakʼbeyike. 7 Ta ora ini ya skʼan ya apasbeyik perdón sok slekil awoʼtanik sok te yakuk awakʼbeyik smukʼul kʼinal yaʼiye, yuʼun jich ma jkʼaxeluk ya xtenot yuʼun te mel-oʼtane. 8 Jaʼ yuʼun ya kalbeyex ta mantal te yakuk awakʼbeyik yil te kʼux ta awoʼtanike. 9 Jaʼ swentail te jich la jtsʼibaybeyexe: yuʼun jich ya kil teme ya achʼuunik spasel spisil te mantale. 10 Teme ay machʼa la apasbeyik perdone, jaʼnix jich ya jpasbey perdón-euk. Ta melel, spisil te bin jpasoj perdón yuʼun (teme ay bin jpasoj perdón yuʼune) jaʼ ta swenta alekilalik ta stojol te Cristo, 11 jich maba ya sloʼlayotik-a te Satanás, melel jnaʼojtik te bintik-utʼil ya xloʼlaywane.

12 Te kʼalal kʼoon ta Troas ta yalel te lek yachʼil kʼop ta swenta te Cristo sok te jamboton jun tiʼnail ta spasbeyel yaʼtel te Kajwaltike, 13 maba jun koʼtan la kaʼiy jba, melel maba la jta tey-a te kermanotik Tito. Jich la jpatbey jilel yoʼtanik, boon ta skʼinal Macedonia.

14 ¡Ya kalbeytik wokol te Diose! Melel spisil-ora ya stojobtesotik jich bin-utʼil soldadoetik te yakik ta sujtel tal ta guerra te juʼ yuʼunik tsalaw te jokinbilik yuʼun te Cristoe sok te joʼotik ta jwentatik te ya yichʼ naʼbeyel sba te Dios te jich kʼoem te bin-utʼil te bin sumetnax* yikʼ te bayuknax ya spuk sbae. 15 Melel te joʼotike sumet* kikʼtik ta stojol Dios ta swenta te lek yachʼil kʼop yuʼun Cristo. Te bin sumetnax yikʼ ini ya xkʼot ta stojol te machʼatik ya staik te kolel sok ta stojol te machʼatik ya xbajtik ta chʼayele. 16 Te machʼatik chʼayel ya xbajtike jaʼ yikʼ lajel ya xkʼot ta stojolik te ya x-ikʼotik bael ta lajel, yan te machʼatik ya staik skolelike jaʼ yikʼ kuxlejalil ya xkʼot ta stojolik te ya x-ikʼotik bael ta kuxlejalile. ¿Machʼa chapal ta lek yuʼun ya spas ini? 17 Melel te joʼotik maba ya jchontik te skʼop Dios jich te bin-utʼil jchonbajeletik te bayuknax ya xbeenik, jich te bitʼil bayal machʼatik ya spasike. Te bin smelelile jaʼ te tikunbilotik yuʼun Dios te smelelil ya xkʼopojotik ta stojol sok te sjokinojotik te Cristoe.