Carta ta stojol te Galataetik

3 Galataetik te maʼyuk spʼijil awoʼtanike, ¿machʼa la sloʼlayex, te jamal la awichʼik cholbeyel te bin-utʼil la yichʼ jijpanel ta teʼ te Jesucristoe? 2 Jaʼnax ya jkʼan ya jojkʼoybeyex ini: ¿jaʼbal la awichʼik chʼul espíritu* yuʼun te bitʼil la achʼuunik spasel te bin ya yal te ley, o jaʼbal ta swenta te schʼuunel awoʼtanik ta swenta te bin la awaʼiyik stojole? 3 ¿Yuʼunbal jkʼaxel maʼyuk spʼijil awoʼtanik? Jich bitʼil la achʼuunik spasel ta nailal te bin ya skʼan te chʼul espiritue,* ¿bin yuʼun te ya xchaʼsujtex ta spasel te bin swenta chʼichʼbakʼete? 4 ¿Tojolnaxbal te kʼaxemix bayal awokolike? Jnaʼoj ta lek te maba tojolnax te kʼaxem awokolike. 5 Jich yuʼun, te machʼa ya yakʼbeyex te chʼul espíritu* sok te ya spas milagroetik ta awolilike, ¿jaʼbal ya spas ta swenta te achʼuunojik spasel te bin ya yal te ley, o jaʼbal ta swenta te schʼuunel awoʼtanik ta swenta te bin la awaʼiyik stojole? 6 Jich te bin-utʼil la spas te Abrahán: «La yakʼ schʼuunel yoʼtan ta stojol te Jehová,* jich toj ilot yuʼun».

7 Ta melel, anaʼojik te jaʼ yal snichʼnab Abrahán te machʼatik ay schʼuunel yoʼtanike. 8 Te sJun Dios la yakʼbey snaʼ ta nailal te Abrahán te lek yachʼil kʼop te kʼalal jich la yale: «Spisil te nacionetik yame staik bendición ta awenta». Jich la yakʼ ta naʼel te toj ya x-ilot yuʼun Dios te jyanlumetik ta swenta te schʼuunel yoʼtanike. 9 Jich yuʼun, te machʼatik ay schʼuunel yoʼtanik pajalme ya yichʼik bendición sok te Abrahán te la yakʼ ta ilel schʼuunel yoʼtane.

10 Spisil te machʼatik yakʼoj smukʼul yoʼtanik ta spasel te bin ya yal te ley ayme ta swentaik te ya yichʼik castigo, melel jich tsʼibaybil: «Akʼa yichʼ castigo spisil te machʼatik maba ya spasik tulan ta spasel te bin tsʼibaybil ta balbil jun yuʼun te Leye». 11 Jaʼnix jich, jamal chikan ta ilel te maʼyuk machʼa toj ya x-ilot yuʼun Dios ta swentanax te ya schʼuun spasel te bin ya yal te leye, melel «te machʼa toj yoʼtan ya xkuxin ta swenta te schʼuunel yoʼtane». 12 Te Ley maba talem skʼoplal ta chʼuunel oʼtanil, melel ya yal «te machʼa ya spas te bin ya yal te Ley jichme ya xkuxin ta swenta-abi». 13 Te Cristo la smanotik sok libre la yakʼotik ta swenta te ya kichʼtik castigo yuʼun te Leye, jaʼ la sjelolinotik ta lajel, melel jich tsʼibaybil: «Boloben skʼoplal spisil te machʼatik ya yichʼik jijpanel ta teʼe». 14 Jich kʼot ta pasel ini yuʼun jich te bendición la yichʼ te Abrahán ya xkʼot ta stojol-euk te jyanlumetik ta swenta te Cristo Jesús, sok jich ta swenta te schʼuunel koʼtantik ya kichʼtik te chʼul espíritu* te albil skʼoplal te ya kichʼtike.

15 Kermanotak, ya kalbeyex awaʼiyik jun ejemplo ta swenta te bin ya xkʼax ta jkuxlejaltik: teme ay la yichʼ pasel jun chapbilkʼop, manchukme jaʼnax jtul jmulawil winik ya yakʼbey yip te chapbilkʼope, maʼyuk machʼa ya xjuʼ ya slajinbey skʼoplal sok maʼyuk machʼa ya xjuʼ ya yakʼbey sjoy te bin la schape. 16 Ta melel, jaʼnax ta stojol te Abrahán sok te stsʼumbal te ay bin jamal la yichʼik albeyel yuʼun te Diose. Ma jichuk la yichʼ albeyel «ta spisil atsʼumbal», te jich yaʼiyel te bayalik ta tule, jaʼnax la yal, «sok te atsʼumbal», jtulnax ta stsʼumbal la yalbey skʼoplal: jaʼ te Cristo. 17 Jaʼnix jich ya kalbeyex ini: te Ley te la yichʼ akʼel 430 jaʼbil ta patil maba la slajinbey skʼoplal te chapbilkʼop la spas te Diose, jich yuʼun maba ya slajinbey skʼoplal te bin jamal yaloje. 18 Te jaʼuk ta swenta te ley te ay bin ya yichʼ akʼele, ma jaʼukix ta swenta te bin jamal yaloj Dios te jichuke. Pero, ta swenta slekil yoʼtan Dios la yalbey ta jamal te Abrahán te ay bin ya yichʼe.

19 Jich yuʼun, ¿bin yuʼun-nix-a te la yichʼ akʼel te Leye? Yuʼun jich ya xchiknaj ta ilel-a te skʼaxuntayel mantal jaʼto teme jul te stsʼumbal te machʼa ay bin jamal la yichʼ albeyele, chʼul-abatetik la yakʼ ta naʼel te ley ta swenta jtul jkʼasesejkʼop. 20 Jich yuʼun, ma puersauk te ay jkʼasesejkʼop teme jtulnax te machʼa ya xkʼopoje, melel jtulnax te Diose. 21 Jich yuʼun, ¿yabal skontrain te Ley te bin jamal yaloj te Diose? ¡Ma jichuk stukel-abi! Melel te yuʼunuk ay la yichʼ akʼel jun ley te ya xjuʼ ya yakʼ kuxlejalile, toj ya xjuʼ ya yilotik Dios ta swenta te ley te jichuke. 22 Te sJun Dios la yakʼbey ta skʼab te mulil spisil te bintik aye, yuʼun jich ya yichʼik akʼbeyel te bin jamal yaloj Dios te machʼatik ya schʼuunbeyik smantal te Jesucristo te jaʼnax ya yichʼ tael ta swenta te chʼuunel oʼtanile.

23 Pero, te kʼalal mato xjul-a te chʼuunel oʼtanile, wentainbilotik yuʼun-a te ley, ayotik ta skʼab-a, jaʼ yakotik ta smaliyel-a te chʼuunel oʼtanil te nopol* ya yichʼix akʼel ta ilele. 24 Jaʼ yuʼun, te Ley jich kʼot bin-utʼil jtojobteswanej* te la yikʼotik bael ta stojol te Cristo, yuʼun jich toj ya xjuʼ ya yilotik-a te Dios ta swenta te schʼuunel koʼtantike. 25 Pero, te bitʼil julix te chʼuunel oʼtanile, maba ayotikix ta skʼab te jtojobteswaneje.*

26 Ta melel, apisilik yal snichʼnabex te Dios ta swenta te schʼuunel awoʼtanik ta stojol te Cristo Jesús. 27 Melel apisilik awichʼojik jaʼ* ta swenta te Cristo, akʼuʼinojik te Cristo. 28 Maʼyukix judío ni griego, maʼyukix moso ni maʼyukix machʼa ay ta libre, maʼyukix skʼoplal teme winik o ants, melel jun-nax kʼoemex ta apisilik sok te Cristo Jesús. 29 Jaʼnix jich, teme yuʼunex te Cristo, jaʼ stsʼumbalex te Abrahán te ya awichʼik te bin albil skʼoplale.