Schebal carta ta stojol te Tesalonicenseetik

2 Jich yuʼun, kermanotak, ta swenta te kʼalal liʼ ayix-a* te Kajwaltik Jesucristo sok te kʼalal jun-nax ya jtsob jbatik soke, ya jkʼanbeyexkotik 2 te manchuk orauknax ya xjelon te lek snopojibal awuʼunik sok mame xa axiʼik te ay bin ya awichʼik albeyel te jich yilel te talem ta stojol Dios o te ay bin ya awichʼik albeyel o ta swenta jun carta te joʼonkotik jtikunojtik yilel te banti ya yal te julix te skʼajkʼalel te Jehová.*

3 Mame ayuk machʼa xa awakʼ sloʼlayex, melel te kʼalal mato xjul te kʼajkʼal-abi, nail ya xchiknaj te machʼatik ma xyakʼik ta nopel te bin smelelile sok te ya xchiknaj-euk te winik te ya skʼaxuntay te ley, jaʼ te snichʼan te lajinele. 4 Te winik-abi, jaʼ jkontrainwanej sok ya stoy sba ta stojol spisil te bintik kuybil ta dios o spisil te bintik ya yichʼ ichʼel ta mukʼ, jich yuʼun ya snajkan sba ta templo yuʼun Dios sok ya yakʼ sba ta naʼel ta komonsitil jich te bin-utʼil dios. 5 ¿Yuʼunbal ma xjul ta awoʼtanik te la kalbeyex awaʼiyik spisil ini te kʼalal jokinojexto-ae?

6 Ta ora ini anaʼojik te bin kombil yuʼune, swenta jaʼto ya xchiknaj-a te kʼalal ya sta yoraile. 7 Melelnix-a te muken jajchix ta spasel te bin chopole,* pero yame xchiknaj ta ilel te bin muken yak ta spasel te kʼalal ya xlaj skʼoplal te bin kombil yuʼune. 8 Jichme ya xchiknaj te winik te ya skʼaxuntay te leye, jaʼ te machʼa ta sjabnax ye ya yichʼ lajinel yuʼun te Kajwaltik Jesús sok yame slajin te kʼalal ya xchiknaj te liʼ ayix-a* te Kajwaltike. 9 Te winik te ya skʼaxuntay te leye, liʼ ayix ini ta swenta yaʼtel te Satanás sok jaʼ ya x-akʼbot yuʼel yuʼun ta spasel spisil ta chajp aʼteliletik, mukʼul aʼteliletik sok milagroetik* ta swenta loʼlaywanej 10 sok ya stuuntes spisil ta chajp mulil yuʼun ya sloʼlay te machʼatik ya yichʼik lajinele, jaʼ stojol ya xkʼot ta skaj te maba kʼux ta yoʼtanik te smelelil kʼop te ya xjuʼ x-akʼbotik skolelik yuʼune. 11 Jaʼ yuʼun, te Dios ya yakʼ te ya yichʼik loʼlayel swenta ya schʼuunik te lotil kʼope, 12 yuʼun jich ya yichʼik ichʼel ta kʼop ta spisilik ta swenta te ma la schʼuunik te smelelil kʼope, melel jaʼ la smulanik te bintik ma stojiluk ta pasel.

13 Pero, spisil-ora jich la kaʼiy ta koʼtankotik te ya kalbeytik wokol Dios ta atojolike, jaʼex kermanotak te kʼuxex ta yoʼtan te Jehová,* melel ta sjajchibalto la stsaex te Dios yuʼun ya ata akolelik te kʼalal la schʼultesex ta swenta te chʼul espíritu* yuʼune sok te ay schʼuunel awoʼtanik ta swenta te smelelil kʼope. 14 Jaʼ swentail te la yikʼex ta swenta te lek yachʼil kʼop te la kalbeykotik skʼoplale, yuʼun jich ya xjuʼ ya atabeyik yutsilal te Kajwaltik Jesucristoe. 15 Jich yuʼun, kermanotak, junukme awoʼtanik sok akʼa ta awoʼtanik te bintik la awichʼik akʼbeyel anopike, chikan teme la yichʼ alel o la yichʼ tsʼibayel ta jun carta kuʼunkotik. 16 Jaʼnix jich, te Kajwaltik Jesucristo sok te jTatik Dios te kʼux la yaʼiyotik ta yoʼtan sok te la yakʼbotik smukʼul kʼinal kaʼiytik ta sbajtelkʼinal sok te ay bin tʼujbil ya yakʼ jmaliytik ta swenta te slekil yoʼtan te ma snujpʼuk ya kichʼtike, 17 akʼame yakʼbeyex smukʼul awoʼtanik sok yip awoʼtanik ta spasel spisil lekil aʼtelil sok ta yalel spisil te bin leke.